Maragragsakan ni Brother Ivan Puyda a manglagip kadagiti rabii nga ibasa ni tatangna kenkuana ken iti pito a kakabsatna Ti Librok Dagiti Estoria ti Biblia apaman a makaawid. Malaglagipna met ti panagkaduada ken tatangna a Grigoriy a mangasaba iti bassit a purokda a Kvitok. Kanayon idi a kaskasabaanda sadiay dagiti titser ken kaklasena. Idi tin-edyer pay ni Brother Puyda, kaduana met ni lolona a ni Brother Pyotr Partsey a nangasaba kadagiti di pay naasak a teritoria. Nakitana ti regta ken kinamanagsakripisio ni lolona iti ministerio.

Kanayon met idi a nakita ni Brother Puyda da tatang ken lolona nga agbasbasa iti Biblia ken kadagiti publikasion a naibatay iti Biblia. Kayatna met a tuladen ti ulidanda.

Ngem ita ta agtawenen ni Brother Puyda iti 41, tultuladenna pay laeng ti ulidanda ngem iti dina ninamnama a pamay-an—ti pannakaaresto ken pannakaibalud gapu iti panagserbina ken Jehova. Dagiti ahente ti Federal Security Service (FSB) inarestoda ni Brother Puyda idi Mayo 30, 2018. Imbaludda iti uppat a bulan. Idi nawayawayaan, nakaawid ngem innem a bulan a saan a makaruar wenno makapan iti sadinoman a lugar. Naaresto met idin ti lolona a ni Brother Partsey ken imbalud ti gobierno dagiti Nazi ken Soviet. Imbalud met ti Soviet Union ni tatangna a ni Brother Grigoriy Puyda.

Kuna ni Brother Ivan Puyda: “Insurat ni apostol Pablo iti 2 Timoteo 3:14, ‘Itultuloymo a suroten ti bambanag a nasursurom ken nakakombinsiram a patien, ta ammom no siasino ti nakasursuruam kadagita.’ Mapabpabilegak kadagiti nakaammuak iti kinapudno. Saan a napasardeng ida ti aniaman a sistema ti politika wenno gobierno iti panagserbida ken Jehova, ken addanto tiempo a sumardeng ti pannakaidadanes. Ita, mapaspasarak dagiti sinagabada ket tuladek ti ulidanda. Ammok a no agtalinaedak a matalek, tulongannak ni Jehova.” Ur-urayen ni Brother Puyda ti desision ti korte iti kasona.

Imbagana a no estoriaen idi da tatang ken lolona ti pannakaibaludda, dida estoriaen dagiti narigat a kasasaad iti pagbaludan no di ket dagiti kapadasanda a nangikasaba iti naimbag a damag.

Agtawenen ita ni Grigoriy iti 64. Nabautisaran idi 1975 kalpasan a naibalud iti makatawen iti labor camp ti Soviet gapu ta dina kayat ti agsoldado. Nawayawayaan idi 1977. Naibalud manen iti makatawen idi 1986 gapu ta addaan kano iti maiparit a publikasion. Ni tatangna, nga agnagan met laeng iti Ivan ket naibalud met iti labor camp manipud 1944 agingga idi 1950 gapu ta nagtalinaed a neutral kas maysa a Kristiano.

Imbaga ni Grigoriy: “Naibturak ti panangidadanes gapu ta nabileg ti pammatik. Uray apagbiit laeng, diak man la nagduadua nga agbibiagak maitunos iti kinapudno ken ni Jehova ti pudno a Dios.”

Ita, mapaspasaran met daytan ti anakna a ni Ivan. “Malagipko dagidi tawen a nagturay ti Soviet, ket kasta met laeng ti mapaspasamak manen,” kuna ni Grigoriy. “Ikarkararagko nga agtalinaed koma a matalek ni Ivan bayat daytoy a pannubok ken masantipikarna ti nagan ni Jehova babaen iti panagibturna.”

Natayen ti lolo ni Ivan a ni Brother Partsey. Ngem idi 1943, imbalud dagiti Nazi iti Majdanek camp ken iti Ravensbrück, gapu ta dina kayat a pirmaan ti maysa a dokumento a mangibagbaga a dinan kayat ti agserbi ken Jehova. Winayawayaan dagiti Allied forces idi 1945. Naaresto manen idi 1952 ket nasentensiaan a mapapatay. Nupay kasta, nabaliwan ti sentensiana isu a nawayawayaan idi 1956. Naaresto manen ni Brother Partsey idi 1958 gapu iti pammatina sa nawayawayaan idi 1964.

“Napabilegak iti integridad ni lolok,” kuna ni Ivan. “Inton mapagungar, iyestoriak kenkuana a gapu iti ulidanna, naibturak dagiti pannubok ta napabilegak nga agtalinaed a matalek ken natured.”

“Awan ti makapasardeng iti pammatik ken panagayatko iti Diosko a ni Jehova,” kuna ni Ivan. “Maulit-ulit nga imbagak kadagiti imbestigador: ‘Maaresto ken maibaluddak, ngem saanyo a pulos makontrol ti isip ken pusok.’”

Ania ti nakatulong kadagiti ay-ayatentayo a kakabsat bayat a mapaspasaranda dagiti pannubok?

Kinuna ni Ivan: “Mabasatayo iti Aramid 14:22, ‘Masapul a sumrektayo iti Pagarian ti Dios babaen ti adu a rigat.’ Mapasaran ti amin a Kristiano ti rigat. Saan a kanayon a tukoyen dayta ti sentensia a pannakaibalud. Mabalin nga agsakit ti maysa wenno matay ti ay-ayatentayo. Makapagibturtayo no positibotayo ken natibker ti relasiontayo iti Dios. Kanayon a sisasagana ni Jehova a tumulong kadagiti adipenna.”

Inestoria ni tatangna a ni Grigoriy: “Pabilgenyo ti relasionyo ken Jehova. Agbalinkayo a pudno a gayyemna. Napateg ti agbirok iti makakombinsir nga ebidensia nga adda kadatayo ti kinapudno. Iti kasta, nakasaganatayo a mangaramid iti amin tapno agtultuloytayo nga agserbi ken Jehova. Magunggonaanto dagiti panagreggetyo.”

Makaparegta a mabasa dagiti salaysay maipapan iti panangtultulong ni Jehova kadagiti kakabsattayo a maidaddadanes gapu iti pammatida. Itultuloytayo koma nga ikararagan dagiti kakabsattayo idiay Russia nga agtalinaedda a natured ken mapabilegda iti kari ni Jehova: “Dika agbuteng . . . Nakaad-adunto ti gunggonam.”—Genesis 15:1.