Nagapelar dagiti Saksi ni Jehova iti Russia kontra iti desision ti Korte Suprema a nairanta a mangiparit iti panagdaydayawda. Ti desision idi Abril 20 nga inruar ni Judge Yuriy Ivanenko pinasardengna ti amin nga aktibidad dagiti legal a korporasion dagiti Saksi iti intero a pagilian. Maysa a panel ti Appellate Chamber ti Korte Suprema a buklen ti tallo a hues ti mangdengngegto iti kaso inton Hulio 17, 2017.

Kidkiddawen ti apela a mabaliktad ti desision. Ipagpaganetget dayta a saan a naibatay ti desision ti Korte Suprema iti pudpudno nga ebidensia ken awan ti aniaman nga extremist nga aktibidad nga ar-aramiden dagiti Saksi ni Jehova. Naibaga pay iti apela a dagiti akusasion a nagresulta iti desision ti Korte Suprema ket kapada met laeng dagiti akusasion nga inusar dagiti autoridad kas rason tapno idadanesda dagiti Saksi idi panawen ti Soviet. Idi agangay, nadalusan ti naganda ken naabsueltoda. Kanayonanna, inggunamgunam ti apela a maikontra ti desision ti Korte iti wayawaya ti relihion a gargarantisaran ti Konstitusion ti Russia ken iti obligasion ti pagilian iti dadduma a nasion.

Gapu iti dayta a desision, maipaspasango dagiti Saksi iti nakaro a pannakabusor a kas iti napadasanda bayat ti Komunista a turay. Idardarum dagiti autoridad ti dadduma a Saksi gapu iti ibilangda nga extremist nga aktibidad, sinesante dagiti employer dagiti Saksi nga empleadoda, binutbuteng dagiti titser dagiti Saksi nga estudianteda iti sango dagiti kaklaseda, ken dagiti mangidumduma a tattao dinadaelda dagiti Kingdom Hall ken pinuruakanda iti bomba ti dua a balay dagiti Saksi isu a napuoran dagita.

Mangnamnama dagiti Saksi ni Jehova iti intero a lubong a makita ti Appellate Chamber ti Korte Suprema ti Russia ti kinaawan hustisia iti naipaulog a desision ket baliktadenda dayta tapno maprotektaran ti wayawaya ti relihion ken ti seguridad dagiti Saksi ni Jehova iti Russia.