Manipud Oktubre 14 agingga iti Disiembre 16, 2023, ti baro nga eksibit a napauluan iti “Naibalud Gapu iti Konsiensiada” ket nakadispley iti dati a pagbaludan a La Modelo, a maysa itan a museo ken cultural center, iti Barcelona, Spain. Ti uppat a seksion ti eksibit ket nadisenio tapno maammuan ti publiko, agraman dagiti opisial ti gobierno ken dagiti propesor ken titser, ti naidumduma a pammati nga impakita dagiti agtutubo a Saksi ni Jehova a saan a nangikompromiso iti neutral a takderda kas Kristiano.

Ipakita ti eksibit ti maipapan kadagiti kakabsattayo iti Spain a nangrugi a naibalud idi 1930’s gapu ta saanda a kayat ti makipaset iti inkapilitan a panagserbi iti militar. Bayat ti 1960’s ken 1970’s, immabut iti dandani 1,000 ti bilang dagiti kakabsat a naibalud. Nasurok nga 40 kadakuada ti naibalud iti La Modelo.

Ilawlawag ti eksibit no apay a pinili dagiti Saksi ti saan a makipaset iti militar gapu kadagiti narelihiosuan a patpatienda ken no kasano idi ti biag dagiti agtutubo a Saksi iti pagbaludan. Gapu iti kinatured nga impakita dagiti matalek a kakabsattayo iti adu a tawen, binigbig ti gobierno ti Spain idi 1984 a kalintegan dagiti tattao ti agkedked nga agsoldado gapu kadagiti narelihiosuan a patpatienda.

Naawis ti propesor ti history a ni Miguel Ángel Plaza kas ispiker para iti opening ceremony ti eksibit. Adda dagiti nakasaritana a Saksi ni Jehova a naibalud idi iti La Modelo. Maipapan kadagiti kapadasanda, imbagana: “Awan kadakuada ti nangkritikar wenno negatibo ti komentona iti napasaranda iti La Modelo—uray kadagiti guardia iti pagbaludan. Nakaisemda ketdi a manges-estoria iti kapadasanda.” Karaman kadagiti immay iti seremonia ni Brother Fernando Trepat, a maysa kadagiti Saksi a naibalud idi iti La Modelo. Imbagana: “Uray no nasurok a 50 a tawenen ti napalabas, kombinsidoak latta a nakatulong kaniak dagiti prinsipio ti Biblia tapno makaaramidak idi iti umiso a desision. Saan nga agbaliw dayta a desisionko uray ita.”

Imbaga ni Brother David Báidez, a nangorganisar iti eksibit: “Uray no maipapan daytoy nga eksibit iti maysa a pasamak iti napalabas, mapaspasamak pay laeng ti kastoy iti dadduma a lugar. Iti agdama, agarup 200 a Saksi ni Jehova ti nakabalud iti nadumaduma a pagilian gapu iti naibatay iti Biblia a patpatienda.”

Ipatpategtayo unay ti kinamatalek ken panagibtur nga impakita dagiti kakabsattayo iti Spain iti adun a dekada, ken itultuloytayo nga iraman iti kararagtayo dagiti nakabalud ita gapu iti pammatida.—Hebreo 13:3.