Maragragsakan ti adu a Saksi ni Jehova a mangasaba babaen ti letter writing. Ipakita dagiti sumaruno a kapadasan iti United States nga epektibo daytoy a pamay-an tapno maipakaammo ti makapabang-ar a mensahe ti Biblia.

Nakita ni Sister Carlee Ruggles, nga agtawen iti 13, a taga-Blue Ash, Ohio, nga epektibo ti letter writing idi adda dina ninamnama a resulta ti suratna.

Maysa a malem, adda ni Carlee iti paraanganda idi adda nakamotor a lalaki a simmardeng iti sango ti balayda. Dimsaag ti lalaki nga adda igge-iggemna a sobre, sa impukkawna: “Makinsurat iti daytoy?” Nailasin ni Carlee a maysa dayta kadagiti insuratna idi nag-letter writing-da.

Nagdardaras a rimmuar dagiti nagannak ni Carlee ket nangngegda a situtured nga imbagana, “Suratko, Sir.”

Nasorpresada idi insungbat ti lalaki, “Daytoy ti eksakto a kasapulak!” Inyestoria ti lalaki a nakalidliday isuna gapu iti pandemic, ngem limmag-an ti riknana iti nabasana. Imbagana met a nabiit pay a natay ti kabsatna a lalaki ket naliwliwa gapu iti dayta a surat ni Carlee.

Imbagana pay: “Saankayo koma a maum-uma nga agsurat. Uray no awan ti maawatyo a sungbat, adu a tattao ti matultulonganyo.”

Mas determinado itan ni Carlee nga agtultuloy nga agsurat. Imbagana, ‘Nakaragragsakak ta inusarnak ni Jehova a tumulong iti maysa a tao. Talaga a dakkel ti maaramidan dagiti surattayo tapno madanon ti puso dagiti tattao.’

Saan idi a sigurado ni Sister Myrna Lopez, a taga-Center, Texas, no adda met la serserbi ti panagsursuratna. Ngem idi kuan, naammuanna a naibalud ti kaanakanna a lalaki, isu a napanunotna a suratan. Napadpadasanen ti kaanakanna ti makigimong idi ubing pay, ket kayat ni Myrna nga ipasigurado kenkuana a saan isuna a nalipatan ni Jehova.

Nagsubalit ti kaanakanna. Imbagana a madandanagan ken mariknana nga awanen ti direksion ti biagna idi naaresto. Bayat nga adda iti pagbaludan, linaglagipna ti kinaubingna ken nagbasa manen iti Biblia ken nagkararag ken Jehova. Imbagana a ti surat ni Myrna ket sungbat dagiti kararagna ken ebidensia nga ipatpateg latta isuna ni Jehova.

Nakaawat ni Sister Natalie Bibbs, a taga-Norcross, Georgia, iti surat manipud iti maysa a babai. Imbaga ti babai a nakitana ti nakupin a surat ni Natalie iti igid ti dalan bayat nga agjog-jogging, ngem linabsanna laeng. Ngem saanna a mailawlawag no apay a nariknana a kayatna ti agsubli tapno pidutenna ti surat.

Kastoy ti insurat ti babai: “Makapa-stress ti makalawasko, isu a kayatko nga adda koma met banag a pakabang-arak. Ket ti suratmo ti nakabang-arak!”

Imbaga ni Natalie: “Gapu iti dayta a surat, napaneknekak nga aniaman a pamay-an ti panangasaba ti aramidentayo, sigurado a tulongannatayo ni Jehova.”

No mapan ni Sister Laura Martinez, a taga-Athens, Texas, iti grocery store iti lugarda, gundawayanna nga ikkan iti surat dagiti trabahador a mangipan kadagiti ginatangna iti luganna. Imbaga ti maysa a trabahador a babai a naparegta unay iti suratna. Isu a namindua pay a sinuratan ni Laura ti babai. Ita, iyad-adalannan iti Biblia.

Ipakita dagita a kapadasan nga uray no saantayo nga ammo no ania kadagiti immulatayo a bukel ti kinapudno ti “agballigi” wenno agtubo, mabalin nga usaren ni Jehova ti aniaman a pamay-an ti panangasaba tapno maliwliwa ken maaddaan iti namnama dagiti nasingpet ti panagpuspusona a tattao.—Eclesiastes 11:6.