Idi Oktubre 10, 2018, timmama ti Bagyo a Michael idiay Florida ken nangdadael iti makin-abagatan a daya ti United States. Ti Category 4 a bagyo ket maibilang a maysa kadagiti kapigsaan a timmama iti United States a nakaro a nangdadael iti adu a sanikua ken nakaigapuan iti ipapatay ti di kumurang a 18 a tattao.

Naapektaran iti dayta a bagyo dagiti kakabsat iti 94 a kongregasion ken 13 a sirkito. Awan kadakuada ti natay, ngem tallo ti nadangran. Dinadael met ti bagyo ti 528 a balbalay dagiti kakabsat ken 34 a Kingdom Hall, ken naawanan iti koriente ti 39 a Kingdom Hall.

Ti sanga nga opisina ti United States, agraman ti Disaster Relief Committee ken nasurok nga 40 a manangaywan iti sirkito, ti madama a mangiwanwanwan iti trabaho a panangsaranay. Karaman iti daytoy a trabaho ti panangipaay kadagiti kakabsat iti taraon ken inumen, medikal a tulong, pagdagusan, panangpalagda iti balbalay babaen ti panangikabil kadagiti trapal kadagiti atep ken panangdalus gapu iti nagadu a rugit a naggapu kadagiti natumba a kaykayo. Naaramid metten dagiti urnos tapno maipaay ti naespirituan a tulong ken panangipastor kadagiti kakabsattayo.

Nupay apektado dagiti kapammatiantayo kadagiti narigat a kasasaad iti daytoy a sistema, agraman kadagiti resulta dagiti natural a didigra, naan-anay ti panagtalekda iti Diostayo gapu iti mapangnamnamaan a tulongna.—Salmo 142:5.