Ti Umuna a Cronicas 11:1-47
11 Idi agangay, napan ti amin nga Israelita iti ayan ni David idiay Hebron+ ket kinunada: “Kakabagiannakami.*+
2 Idi ni Saul pay laeng ti ari, sika ti mangidadaulo iti Israel a mapan makigubat.*+ Kinuna kenka ni Jehova a Diosmo: ‘Ipastoramto ti ilik nga Israel, ket agbalinkanto a lider ti ilik nga Israel.’”+
3 Isu a napan ti amin a panglakayen ti Israel iti ari idiay Hebron, ket nakitulag kadakuada ni David iti sanguanan ni Jehova. Kalpasanna, dinutokanda* ni David kas ari ti Israel,+ maitunos iti imbaga ni Jehova ken ni Samuel.+
4 Idi agangay, napan ni David ken ti intero nga Israel idiay Jerusalem, wenno Jebus,+ a pagnanaedan dagiti Jebuseo.+
5 Ininsulto dagiti Jebuseo ni David: “Pulos a saanka a makastrek ditoy!”+ Ngem sinakup ni David ti napaderan a siudad ti Sion,+ a maawagan itan iti Siudad ni David.+
6 Gapuna, kinuna ni David: “Agbalinto a panguluen* ken prinsipe ti umuna a mangdarup kadagiti Jebuseo.” Ni Joab+ nga anak ni Zeruia ti immuna a simmang-at, ket nagbalin a panguluen.
7 Nagnaed ni David iti napaderan a siudad, isu nga inawaganda iti Siudad ni David.
8 Binangonna dagiti pader ken ti dadduma pay a patakder iti siudad, manipud iti Bunton* ken iti aglawlawna. Ni Joab ti nangtarimaan iti dadduma pay a paset ti siudad.
9 Gapuna, bimmileg a bimmileg ni David,+ ket adda kenkuana ni Jehova a panguluen dagiti armada.
10 Dagitoy ti pannakaulo dagiti nabileg a mannakigubat ni David, a naan-anay a nangsuporta iti panagturayna, agraman ti amin nga Israelita, tapno pagbalinenda nga ari maitunos iti imbaga ni Jehova maipapan iti Israel.+
11 Dagitoy ti nabileg a mannakigubat ni David: ni Jasobeam+ nga anak ti maysa a Hakmonita, ti panguluen dagiti tallo.+ Inusarna ti pikana a nangpapatay iti nasurok a 300 a lallaki iti maysa la a gundaway.+
12 Sumaruno, ni Eleazar+ nga anak ni Dodo nga Ahohita.+ Isu ket maysa kadagiti tallo a nabileg a mannakigubat.
13 Nakikadua idi ken David idiay Pas-dammim,+ a naguummongan dagiti Filisteo a makigubat. Adda idi maysa a paset ti talon a napno iti sebada, ket nagtalaw dagiti soldado sadiay gapu kadagiti Filisteo.
14 Ngem saan a pimmampanaw iti tengnga ti talon ket indepensana dayta ken intultuloyna a pinatay dagiti Filisteo, isu a nangipaay ni Jehova iti dakkel a balligi* iti ilina.+
15 Simmalog ti 3 kadagiti 30 a lider iti bato a bantay, a mapan ken David idiay kueba ti Adulam,+ bayat a nagkampo ti armada dagiti Filisteo idiay Tanap* ti Refaim.+
16 Adda idi ni David iti paglemlemmenganna, ket adda idiay Betlehem ti maysa a kampo dagiti Filisteo.
17 Inyebkas ni David ti tarigagayna: “Makain-inumak iti danum manipud iti pagurnongan iti danum iti abay ti ruangan ti Betlehem!”+
18 Iti kasta, sinarakusok dagiti tallo ti kampo dagiti Filisteo ket nagsakdoda iti pagurnongan iti danum iti abay ti ruangan ti Betlehem sa intedda ken David ngem saan nga ininum dayta ni David. Imbukbokna ketdi dayta iti sanguanan ni Jehova.
19 Kinunana: “Diak maitured nga inumen daytoy ta mabutengak iti Dios! Rumbeng kadi nga inumek ti dara dagitoy a lallaki a nangirisgo iti biagda?*+ Ta inrisgoda ti biagda* a nangala iti daytoy.” Isu a saanna nga ininum dayta. Kasta ti inaramid ti tallo a nabileg a mannakigubat.
20 Ni Abisai+ a kabsat ni Joab+ ti nagbalin a lider ti sabali pay a tallo. Inusarna ti pikana a nangpatay iti 300, ket nagdindinamag met a kas kadagiti immuna a tallo.+
21 Iti sabali a tallo, nalatlatak ngem iti dua kadakuada, ken isu ti panguluenda, ngem dina naragpat ti ranggo ti immuna a tallo.
22 Ni Benaias+ nga anak ni Jehoiada ket natured a lalaki.* Adu ti naaramidanna idiay Kabzeel.+ Pinatayna ti dua nga annak a lallaki ni Ariel a taga-Moab. Maysa nga aldaw, bayat nga agtudtudo iti niebe, bimmaba iti pagurnongan iti danum ket pinatayna ti maysa a leon.+
23 Pinatayna met ti maysa nga Egipcio a sobra ti kadakkelna—lima a kasiko* ti katayagna.+ Nupay nakaiggem ti Egipcio iti pika a kas kadakkel iti pagpulipolan iti sag-ut dagiti agab-abel,+ linabananna babaen ti baston sa inagawna ti pika ti Egipcio ket dayta ti pinangpatayna kenkuana.+
24 Dagita ti inaramid ni Benaias nga anak ni Jehoiada, ket nagdindinamag met a kas iti tallo a nabileg a mannakigubat.
25 Nupay ad-adda a mabigbigbig ngem iti 30, dina naragpat ti ranggo dagiti tallo.+ Nupay kasta, isu ti dinutokan ni David a lider dagiti personal a guardiana.
26 Dagiti nabileg a mannakigubat iti armada ket ni Asael+ a kabsat ni Joab, ni Elhanan nga anak ni Dodo a taga-Betlehem,+
27 ni Samot a Harorita, ni Helez a Pelonita,
28 ni Ira+ nga anak ni Ikes a Tekoita, ni Abi-ezer+ nga Anatotita,
29 ni Sibecai+ a Husatita, ni Ilai nga Ahohita,
30 ni Maharai+ a Netofatita, ni Heled+ nga anak ni Baanah a Netofatita,
31 ni Itai nga anak ni Ribai manipud Gibea a teritoria dagiti Benjaminita,+ ni Benaias a Piratonita,
32 ni Hurai manipud kadagiti karayan* ti Gaas,+ ni Abiel nga Arbatita,
33 ti annak ni Azmavet a Baharumita, ni Eliaba a Saalbonita,
34 ti annak ni Hasem a Gizonita, ni Jonatan nga anak ni Sage a Hararita,
35 ni Ahiam nga anak ni Sacar a Hararita, ni Elifal nga anak ni Ur,
36 ni Hefer a Mekeratita, ni Ahias a Pelonita,
37 ni Hezro a Carmelita, ni Naarai nga anak ni Ezbai,
38 ni Joel a kabsat ni Natan, ni Mibhar nga anak ni Hagri,
39 ni Zelek nga Ammonita, ni Naharai a Berotita, ti paraawit iti kabal ni Joab nga anak ni Zeruia;
40 ni Ira nga Itrita, ni Gareb nga Itrita,
41 ni Urias+ a Heteo, ni Zabad nga anak ni Alai,
42 ni Adina nga anak ni Siza a Rubenita, a pannakaulo dagiti Rubenita, ken 30 ti kaduana;
43 ni Hanan nga anak ni Maaca, ni Josafat a Mitnita,
44 ni Uzia nga Asteratita, da Shama ken Jeiel, nga annak ni Hotam nga Aroerita;
45 ni Jediael nga anak ni Simri, ken ni Joha a kabsatna a Tizita;
46 ni Eliel a Mahavita, da Jeribai ken Josavias nga annak ni Elnaam, ken ni Itma a Moabita;
47 da Eliel, Obed, ken Jaasiel a Mezobaita.
Footnotes
^ Lit., “Dakami ti tulang ken lasagmo.”
^ Lit., “sika ti mangiruruar ken mangiserserrek iti Israel.”
^ Wenno “pinulotanda.”
^ Lit., “ulo.”
^ Wenno “Millo.” Hebreo a sao a kaipapananna, “gabur.”
^ Wenno “pannakaisalakan.”
^ Wenno “Kapatagan.”
^ Wenno “kararuada.”
^ Wenno “kararuada.”
^ Lit., “anak ti maingel a lalaki.”
^ Karayan a maaddaan laeng iti danum no panagtutudo.
