Ti Umuna a Cronicas 19:1-19
19 Idi natay ni Nahas nga ari dagiti Ammonita, ti anakna ti simmaruno nga ari.+
2 Gapuna, kinuna ni David: “Ipakitaakto iti napudno nga ayat+ ni Hanun nga anak ni Nahas, ta impakitaannak idi ni amana iti napudno nga ayat.” Isu a nangibaon ni David kadagiti mensahero a mangliwliwa kenkuana gapu iti ipapatay ni amana. Ngem idi nakadanon dagiti adipen ni David iti daga dagiti Ammonita+ tapno liwliwaenda ni Hanun,
3 kinuna dagiti prinsipe dagiti Ammonita ken ni Hanun: “Panagkunam, padpadayawan ni David daydi amam babaen ti panangibaonna kadagiti mangliwliwa kenka? Saan ngata nga immay dagiti adipenna tapno agsukimat ken ikkatendaka nga ari ken agespiada iti daga?”
4 Gapuna, innala ni Hanun dagiti adipen ni David ket kiniskisanna dagiti barbasda+ ken pinutedna dagiti badoda iti batog ti patongda sa pinapanawna ida.
5 Idi naibaga ken David ti napasamak kadagiti lallaki, dagus a nangibaon kadagiti sumabat kadakuada ta naibabainda unay. Kinuna ti ari kadakuada: “Agyankayo idiay Jerico+ ket agsublikayo inton umatiddog manen dagiti barbasyo.”
6 Idi agangay, nadlaw dagiti Ammonita a kagurgura idan ni David isu a nangted ni Hanun ken dagiti Ammonita iti 1,000 a talento* a pirak a pangtandan kadagiti kumakabalio ken karuahe manipud Mesopotamia,* Aram-maaca, ken Zoba.+
7 Iti kasta, nangabangda iti 32,000 a karuahe ken tinangdananda ti ari ti Maaca ken dagiti soldadona. Immayda ket nagkampoda iti sanguanan ti Medeba.+ Naguummong dagiti Ammonita kadagiti siudadda ket rimmuarda a makigubat.
8 Idi nadamag dayta ni David, imbaonna ni Joab+ ken ti intero nga armada, agraman dagiti kabibilgan a mannakigubatna.+
9 Rimmuar dagiti Ammonita ket nagpuestoda iti pagserkan ti siudad tapno makigubat idinto ta nagyan dagiti inayabanda nga ari iti nawayang a lugar.
10 Idi nakita ni Joab a dumarupen dagiti kabusor iti sanguanan ken iti likudanna, pinilina dagiti kalaingan a soldado ti Israel ket pinagsaganana ida a sumabat kadagiti Siriano.+
11 Intalekna ti dadduma pay a soldado iti panangidaulo* ti kabsatna a ni Abisai+ tapno pagpuestuenna ida a sumabat kadagiti Ammonita.
12 Kinunana: “No makitam a diak maabak dagiti Siriano,+ umaynakto tulongan. Ngem no makitak a dimo maabak dagiti Ammonita, umaykanto tulongan.
13 Masapul a bumilegta ken papigsaenta ti pakinakemta+ para kadagiti kailianta ken kadagiti siudad ti Diostayo, ket aramidento ni Jehova ti nasayaat.”
14 Dimmarup ni Joab ken dagiti soldadona, ket nagtataray a pimmanaw dagiti Siriano iti sanguananna.+
15 Idi nakita dagiti Ammonita a nagtataray dagiti Siriano, nagtatarayda met a pimmanaw iti sanguanan ni Abisai a kabsatna ket immatrasda. Kalpasanna, nagsubli ni Joab idiay Jerusalem.
16 Idi nakita dagiti Siriano nga inabak ida dagiti Israelita, nangibaonda kadagiti mensahero a mangayab kadagiti Siriano nga adda iti rehion ti Karayan,*+ nga indauluan ni Sofak a pangulo ti armada ni Hadadezer.+
17 Idi naipadamag dayta ken David, inummongna a dagus ti intero nga armada ti Israel. Binallasiwda ti Jordan ket nagpuestoda a makigubat. Dimmarup ni David kadagiti Siriano ket nakilabanda kenkuana.+
18 Ngem nagtataray a pimmanaw dagiti Siriano iti sanguanan dagiti Israelita. Pinatay ni David ti 7,000 a kumakaruahe ken 40,000 a soldado dagiti Siriano, agraman ni Sofak a pangulo ti armada.
19 Idi nakita dagiti adipen ni Hadadezer nga inabak idan ti Israel,+ dagus a nakikappiada ken David ket nagbalinda nga iturayanna.+ Saanen a kinayat dagiti Siriano ti tumulong kadagiti Ammonita.
