Umuna a Surat ni Juan 3:1-24
3 Nagdakkel la ketdin ti ayat nga impakita kadatayo ti Ama!+ Inawagannatayo kas annakna ket agpayso nga annaknatayo ti Dios.+ Dayta ti makagapu a saannatayo nga am-ammo ti lubong,+ ta dida naam-ammo ti Dios.+
2 Patpatgek a kakabsat, annaknatayo itan ti Dios,+ ngem saan pay a nalawag no anianto ti pagbalinantayo.+ Ammotayo nga inton maipalgak, agbalintayto a kas kenkuana, gapu ta talaga a makitatayto isuna.
3 Ket amin a mangnamnama kenkuana dalusanda ti bagida+ gapu ta nadalus ni Jesu-Kristo.
4 Agar-aramid met iti kinakillo ti amin a mangyugali iti panagbasol, ta ti basol ket kinakillo.
5 Ammoyo met nga isu ket naipalgak tapno ikkatenna dagiti basoltayo,+ ket awan ti basol kenkuana.
6 Amin nga agtalinaed a naikaykaysa kenkuana ket saanda nga iyugali ti agbasol.+ Asinoman a mangyugali iti panagbasol saanna a nakita wenno naam-ammo ni Jesus.
7 Ay-ayatek nga annak, awan koma ti mangallilaw kadakayo. Nalinteg daydiay agar-aramid iti kinalinteg a kas ken Jesus a nalinteg.
8 Ti mangyugali iti panagbasol ket nagtaud iti Diablo, ta agbasbasolen ti Diablo sipud pay idi damo.*+ Iti daytoy a panggep, naiparangarang ti Anak ti Dios, tapno dadaelenna* dagiti aramid ti Diablo.+
9 Saan nga iyug-ugali ti amin nga annak ti Dios ti agbasol,+ ta adda kadakuada ti bin-i* ti Dios, isu a saanda a mabalin nga iyugali ti agbasol, ta annak ida ti Dios.+
10 Daytoy ti nalawag a nagdumaan ti annak ti Dios ken ti annak ti Diablo: Saan a nagtaud iti Dios ti asinoman a saan nga agar-aramid iti kinalinteg, wenno uray daydiay saan nga agayat iti kabsatna.+
11 Ta daytoy ti mensahe a nangngegyo sipud idi damo, a masapul nga agiinnayattayo;+
12 saan a kas ken Cain, a nagtaud iti daydiay managdakdakes ket pinatayna ti kabsatna.+ Ket apay a pinatayna? Gapu ta dakes dagiti aramidna,+ ngem nalinteg dagiti aramid ti kabsatna.+
13 Kakabsat, dikay masdaaw a kaguranakayo ti lubong.+
14 Ammotayo a kas man la nataytayo idin ngem ita sibibiagtayon,+ ta ay-ayatentayo dagiti kakabsat.+ Ti saan nga agayat ket agtalinaed a kasla natay.+
15 Mammapatay ti amin a manggurgura iti kabsatna,+ ket ammoyo nga awan ti mammapatay a maaddaan iti biag nga agnanayon.+
16 Babaen iti daytoy a naammuantayo ti ayat, ta insakripisiona ti biagna* para kadatayo;+ ket obligasiontayo nga isakripisio ti biagtayo* para kadagiti kakabsattayo.+
17 Ngem asinoman nga addaan kadagiti material a sanikua iti daytoy a lubong ket makitana nga agkasapulan ti kabsatna ngem dina ipakita a makipagrikna kenkuana, kasano koma nga agtalinaed kenkuana ti ayat ti Dios?+
18 Ay-ayatek nga annak, agayattayo koma, saan nga iti sao wenno iti dila,+ no di ket iti aramid+ ken kinapudno.+
19 Babaen iti daytoy, ammotayto a nagtaudtayo iti kinapudno, ket ipasiguradotayo iti* pusotayo nga ay-ayatennatayo ti Dios
20 uray no adda dagiti pangbabalawan kadatayo ti pusotayo, ta dakdakkel ti Dios ngem ti pusotayo ken ammona ti amin a banag.+
21 Patpatgek a kakabsat, no dinatayo babalawen ti pusotayo, adda wayawayatayo a makisao iti Dios;+
22 ket itedna ti aniaman a dawatentayo,+ ta tungtungpalentayo dagiti bilinna ken ar-aramidentayo dagiti makaparagsak kenkuana.
23 Kinapudnona, daytoy ti bilinna: a maaddaantayo iti pammati iti nagan ti Anakna a ni Jesu-Kristo+ ken agiinnayattayo,+ kas iti imbilinna kadatayo.
24 Daydiay mangtungtungpal kadagiti bilin ti Dios ket agtalinaed met a naikaykaysa iti Dios, ken naikaykaysa ti Dios kenkuana.+ Babaen ti espiritu nga intedna kadatayo, ammotayo nga isu ket agtalinaed a naikaykaysa kadatayo.+
Footnotes
^ Wenno “pagpatinggaenna.”
^ Wenno “sipud idi nangrugi a kasta.”
^ Kayatna a sawen, bin-i a makapagpaadu, wenno makapagbunga.
^ Wenno “kararuana.”
^ Wenno “kararuatayo.”
^ Wenno “kombinsirentayo ti; allukoyentayo ti.”
