Ti Umuna a Samuel 16:1-23
16 Idi agangay, kinuna ni Jehova ken Samuel: “Apay a pagladladingitam pay laeng ni Saul+ idinto ta inlaksidkon nga ari ti Israel?+ Punnuem ta pagkargaam iti lana+ ket mapanka ken Jesse+ a Betlehemita, ta pinilik ti maysa kadagiti annakna nga agbalinto nga ari.”+
2 Ngem kinuna ni Samuel: “Kasanoak a mapan? No madamag ni Saul, patayennakto la ketdi.”+ Insungbat ni Jehova: “Mangikuyogka iti urbon a baka ket ibagam, ‘Umayak agdaton ken Jehova.’
3 Awisem ni Jesse iti panagidatonmo; ket ipakaammokto kenka ti aramidem. Masapul a bukbokam iti nasantuan a lana ti ulo daydiay ibagak kenka.”+
4 Inaramid ni Samuel ti imbaga ni Jehova. Idi nakadanon idiay Betlehem,+ agpigpigerger dagiti panglakayen ti siudad idi masabatda, ket kinunada: “Talna kadi ti kaipapanan ti iyaaymo?”
5 Insungbatna: “Wen. Umayak agidaton ken Jehova. Pagbalinenyo a nasantuan ti bagbagiyo, ket kumuyogkayo kaniak iti panagdatonko.” Kalpasanna, pinagbalinna a nasantuan ni Jesse ken dagiti annakna, sa pinaayabanna ida nga agidaton.
6 Idi sumsumrekda ket nakitana ni Eliab,+ kinunana: “Sigurado a daytoy ti dinutokan ni Jehova.”
7 Ngem kinuna ni Jehova ken Samuel: “Saan a ti langa ken ti katayagna ti kitaem,+ ta saan nga isu ti pinilik. Ta ti panagkita ti tao ket saan a kas iti panagkita ti Dios, ta dagiti laeng makita ti mata ti kitkitaen ti tao, ngem ti puso ti kitkitaen ni Jehova.”+
8 Kalpasanna, inayaban ni Jesse ni Abinadab+ ket impakitana ken Samuel, ngem kinunana: “Saan met nga isu ti pinili ni Jehova.”
9 Insaruno nga impakita ni Jesse ni Shammah,+ ngem kinunana: “Saan met nga isu ti pinili ni Jehova.”
10 Impakita ni Jesse ti pito nga annakna ken Samuel, ngem kinuna ni Samuel ken Jesse: “Awan kadakuada ti pinili ni Jehova.”
11 Kinuna itan ni Samuel ken Jesse: “Dagitoy kadi aminen ti annakmo?” Insungbat ni Jesse: “Awan ditoy ti inaudi+ ta madama nga agpaspastor kadagiti karnero.”+ Kinuna ni Samuel ken Jesse: “Paayabam ta mangantayto laeng inton makasangpet.”
12 Isu a pinaayabanna ket impakitana ken Samuel. Lumabbaga ti kudilna, napintas dagiti matana, ken naguapo.+ Ket kinuna ni Jehova: “Tumakderka, bukbokam ti ulona iti nasantuan a lana, ta isu ti pinilik!”+
13 Innala ni Samuel ti pagkargaan iti lana+ ket imbukbokna iti ulona iti sango dagiti kakabsatna. Manipud idi nga aldaw, nagtignay ti espiritu ni Jehova ken ni David ket bimmileg.+ Kalpasanna, nagawiden ni Samuel idiay Rama.+
14 Inikkat ni Jehova ti espirituna ken Saul,+ ket impalubos ni Jehova a mariribuk ti panunot ni Saul.+
15 Kinuna dagiti adipen ni Saul: “Apo, rirriribuken ti Dios ti panunotmo.
16 No kayatmo, mapankami agbirok iti lalaki a nalaing nga agtokar iti arpa.+ Ket tunggal riribuken ti Dios ti panunotmo, agtokarto iti arpa tapno sumayaat ti riknam.”
17 Isu a kinuna ni Saul kadagiti adipenna: “Sige, pangngaasiyo ta ibirokandak iti lalaki a nalaing nga agtokar, ket iyegyo kaniak.”
18 Kinuna ti maysa kadagiti katulongan: “Nakitak no kasano kalaing nga agtokar ti maysa kadagiti annak ni Jesse a Betlehemita. Natured pay ken nabileg a mannakigubat.+ Nalaing nga agsao, naguapo,+ ken adda kenkuana ni Jehova.”+
19 Nangibaon ni Saul kadagiti mensahero a mapan ken Jesse ket kinunana: “Paumayem ditoy ni David nga anakmo nga agpaspastor iti arban.”+
20 Imbaon ni Jesse ni David a mapan ken Saul. Nangisagana iti asno a nangilugananna iti impabalonna a tinapay, pagkargaan a lalat a napno iti arak, ken urbon a kalding.
21 Dimteng ni David ken Saul ket nagserbi kenkuana.+ Nagustuan unay ni Saul ni David, ket nagbalin a paraawit iti kabalna.
22 Impaibaga ni Saul ken Jesse: “Palubosam koma nga agtultuloy nga agserbi kaniak ni David, ta maay-ayatanak kenkuana.”
23 Tunggal riribuken ti Dios ti panunot ni Saul, alaen ni David ti arpa ket agtokar, isu a sumayaat ti rikna ni Saul ken agtalna ti panunotna.+
