Ti Maikadua nga Ar-ari 14:1-29
14 Iti maikadua a tawen ti panagturay ni Jehoas+ nga anak ni Jehoahaz nga ari ti Israel, nagbalin nga ari ni Amazias nga anak ni Ari Jehoas ti Juda.
2 Agtawen iti 25 idi nagbalin nga ari, ket nagturay iti 29 a tawen idiay Jerusalem. Ti nanangna ket ni Jehoadin a taga-Jerusalem.+
3 Inar-aramidna ti umiso iti imatang ni Jehova, ngem saan a kas ken David+ nga apongna. Tinuladna ti amin nga inaramid ni Jehoas nga amana.+
4 Ngem saan a naikkat dagiti nangato a disso,+ ket nangipapaay latta sadiay dagiti tattao kadagiti daton a mangpataud iti asuk.+
5 Apaman a bimmileg ti panangiturayna iti pagarian, pinatayna dagiti adipenna a nangpatay iti amana nga ari.+
6 Ngem saanna a pinatay dagiti annakda, maitunos iti bilin ni Jehova a naisurat iti libro ti Linteg ni Moises: “Saan a mapapatay dagiti amma maigapu kadagiti annakda, ket saan met a mapapatay dagiti annak maigapu kadagiti ammada. Mapapatay ti maysa maigapu iti bukodna a basol.”+
7 Pinapatayna dagiti Edomita+ idiay Tanap ti Asin,+ 10,000 a lallaki. Nasakupna ti Sela babaen ti gubat,+ ket nagbalin a Joktel ti naganna agingga ita nga aldaw.
8 Kalpasanna, nangibaon ni Amazias kadagiti mensahero a mangibaga ken Jehoas nga anak ni Jehoahaz nga anak ni Jehu nga ari ti Israel: “Umayka ta aggubatta.”*+
9 Impaibaga ni Jehoas nga ari ti Israel ken ni Amazias nga ari ti Juda: “Impaibaga ti siitan a ruot ti Lebanon iti sedro ti Lebanon, ‘Itedmo ti anakmo a babai kas asawa ti anakko.’ Ngem adda limmabas nga atap nga animal ti Lebanon ket impayatpayatna ti siitan a ruot.
10 Agpayso a pinarmekmo ti Edom,+ isu a nagtangsit ta pusom. Tagiragsakem ti dayagmo ngem agtalinaedka iti balaymo.* Apay a mangaramidka iti pakadadaelam ken pakatnagam, agraman ti Juda?”
11 Ngem saan a dimngeg ni Amazias.+
Gapuna, rimmuar ni Ari Jehoas ti Israel ket naggubatda ken Ari Amazias ti Juda idiay Bet-semes,+ a kukua ti Juda.+
12 Inabak ti Israel ti Juda, ket nagawid ti tunggal maysa iti balayna.*
13 Inabak ni Jehoas nga ari ti Israel ni Amazias nga ari ti Juda, nga anak ni Ahazias, idiay Bet-semes. Kalpasanna, napanda idiay Jerusalem ket giniwanganna ti pader ti Jerusalem manipud iti Ruangan ti Efraim+ agingga iti Makinsuli a Ruangan,+ 400 a kasiko.*
14 Innalana ti amin a balitok ken pirak ken ti amin nga alikamen nga adda iti balay ni Jehova ken kadagiti pagidulinan iti gameng iti balay* ti ari, agraman dagiti balud. Kalpasanna, nagsubli idiay Samaria.
15 Ti dadduma pay a pasamak iti pakasaritaan ni Jehoas, ti inaramid ken panagballigina ken ti pannakilabanna ken Ari Amazias ti Juda, ket naisurat iti libro dagiti pasamak idi tiempo dagiti ari ti Israel.
16 Naginana ni Jehoas a kas kadagidi ammana ket naitabon idiay Samaria+ a kadua dagiti ari ti Israel. Ni Jeroboam*+ nga anakna ti simmaruno nga ari.
17 Nagbiag ni Amazias+ nga anak ni Jehoas nga ari ti Juda iti 15 a tawen kalpasan ti ipapatay ni Jehoas+ nga anak ni Jehoahaz nga ari ti Israel.+
18 Ti dadduma pay a pasamak iti pakasaritaan ni Amazias ket naisurat iti libro dagiti pasamak idi tiempo dagiti ari ti Juda.
19 Idi agangay, adda dagiti nagkukomplot maibusor kenkuana+ idiay Jerusalem, ket nagkamang idiay Lakis. Ngem nangibaonda kadagiti lallaki a mangsurot kenkuana idiay Lakis ket pinatayda sadiay.
20 Gapuna, insakayda kadagiti kabalio ket nayawid ken naitabon idiay Jerusalem a kas kadagidi ammana iti Siudad ni David.+
21 Kalpasanna, innala ti amin nga umili ti Juda ni Azarias,*+ nga agtawen idi iti 16,+ ket pinagbalinda nga ari a kasukat ni amana nga Amazias.+
22 Binangonna manen ti Elat+ ket insublina dayta iti Juda kalpasan a naginana ti ari* a kas kadagidi ammana.+
23 Iti maika-15 a tawen ti panagturay ni Amazias nga anak ni Jehoas nga ari ti Juda, nagbalin nga ari idiay Samaria ni Jeroboam+ nga anak ni Ari Jehoas ti Israel ket nagturay iti 41 a tawen.
24 Inar-aramidna ti dakes iti imatang ni Jehova. Tinuladna ti amin a basol ni Jeroboam nga anak ni Nebat a nakaigapuan ti panagbasol ti Israel.+
25 Insublina ti pagpatinggaan ti teritoria ti Israel manipud Lebo-hamat*+ agingga iti Baybay ti Araba,*+ maitunos iti sao ni Jehova a Dios ti Israel babaen ti adipenna a ni Jonas+ nga anak ni Amittai, ti propeta manipud Gat-hefer.+
26 Ta nakita ni Jehova ti nakaro a pannakaparigat ti Israel.+ Awan idi ti asinoman a tumulong iti Israel, uray dagiti awan pigsana wenno nakapuy.
27 Ngem inkari ni Jehova a saanna a punasen ti nagan ti Israel iti baba ti langit.+ Gapuna, insalakanna ida babaen ken Jeroboam nga anak ni Jehoas.+
28 Ti dadduma pay a pasamak iti pakasaritaan ni Jeroboam, ti amin nga inaramid ken panagballigina ken ti pannakilaban ken panangisublina iti Damasco+ ken Hamat+ iti Juda idiay Israel, ket naisurat iti libro dagiti pasamak idi tiempo dagiti ari ti Israel.
29 Naginana ni Jeroboam a kas kadagidi ammana, ket intabonda iti nakaitaneman dagiti ari ti Israel. Ni Zacarias+ nga anakna ti simmaruno nga ari.
Footnotes
^ Wenno “agkitata iti rupanrupa.”
^ Wenno “palasiom.”
^ Lit., “toldana.”
^ Wenno “palasio.”
^ Kayatna a sawen, ni Jeroboam II.
^ Kaipapananna, “Timmulong ni Jehova.” Naawagan iti Uzias iti 2Ar 15:13; 2Cr 26:1-23; Isa 6:1; ken Zac 14:5.
^ Kayatna a sawen, ni amana nga Amazias.
^ Wenno “pagserkan ti Hamat.”
^ Kayatna a sawen, ti Asin a Baybay, wenno Natay a Baybay.
