Ti Maikadua nga Ar-ari 8:1-29
8 Kinuna ni Eliseo iti babai a makin-anak iti pinagbiagna:*+ “Tumakderka agraman ti sangakabbalayam ket inkay agnaed kas ganggannaet iti sadinoman a mabalinyo a pagnaedan, ta imbaga ni Jehova nga addanto nakaro a bisin+ iti daytoy a daga iti pito a tawen.”
2 Iti kasta, timmakder ti babai ket inaramidna ti imbaga ti adipen ti pudno a Dios. Napan agraman ti sangakabbalayanna ket nagnaedda iti daga dagiti Filisteo+ iti pito a tawen.
3 Iti ngudo ti pito a tawen, pinanawan ti babai ti daga dagiti Filisteo ket napan nagpakaasi iti ari a maisubli ti balay ken talonna.
4 Kinuna ti ari ken Gehazi a katulongan ti adipen ti pudno a Dios: “Pangngaasim ta ibagam kaniak ti amin a nakaskasdaaw a banag nga inaramid ni Eliseo.”+
5 Bayat nga es-estoriaenna iti ari no kasano a pinagbiag ni Eliseo daydiay natay,+ dimteng ti babai a makin-anak iti pinagbiagna ket impakaasina iti ari a maisubli ti balay ken talonna.+ Dagus a kinuna ni Gehazi: “Apo ari, isu daytoy ti babai, ket daytoy ti anakna a pinagbiag ni Eliseo.”
6 Nagdamag ti ari iti babai, ket inyestoriana ti napasamak. Kalpasanna, nangayab ti ari iti maysa nga opisial ti palasio sa kinunana: “Isublim iti daytoy a babai ti amin a kukuana ken ti amin a naapit iti talonna manipud idi aldaw a pimmanaw iti daga agingga ita.”
7 Masakit ni Ben-hadad+ nga ari ti Siria idi napan ni Eliseo idiay Damasco.+ Gapuna, naipadamag kenkuana: “Immay ditoy ti adipen ti pudno a Dios.”+
8 Iti kasta, kinuna ti ari ken ni Hazael:+ “Mangalaka iti sagut ket mapanka iti adipen ti pudno a Dios.+ Ibagam kenkuana a saludsodenna ken Jehova no umimbagakto iti daytoy a sakit.”
9 Napan ni Hazael iti ayan ni Eliseo ket nangitugot iti sagut, amin a kita ti naimbag a banag iti Damasco, nga inawit ti 40 a kamelio. Nagtakder iti sanguananna ket kinunana: “Imbaonnak ti anakmo, ni Ben-hadad nga ari ti Siria, tapno damagek kenka no umimbagto ti sakitna.”
10 Insungbat ni Eliseo: “Mapanka ket ibagam kenkuana, ‘Sigurado nga umimbagkanto,’ ngem impakita kaniak ni Jehova a sigurado a matayto.”+
11 Pinerrengna ni Hazael agingga a nabainan. Kalpasanna, nagsangit ti adipen ti pudno a Dios.
12 Insaludsod ni Hazael: “Apo, apay nga agsangsangitka?” Insungbatna: “Gapu ta ammok no anianto ti aramidem a panangdangran kadagiti umili ti Israel.+ Uramemto dagiti napaderan a siudadda, papatayemto iti espada dagiti napili a lallakida, rangrangkayemto dagiti annakda, ken butiakamto dagiti masikog kadakuada.”+
13 Kinuna ni Hazael: “Kasano koma a maaramid dayta daytoy adipenmo, a kasla maysa laeng nga aso?” Ngem kinuna ni Eliseo: “Impakita kaniak ni Jehova nga agbalinkanto nga ari iti Siria.”+
14 Kalpasanna, pinanawanna ni Eliseo ket napan iti apona nga ari. Insaludsod ti ari: “Ania ti imbaga ni Eliseo?” Insungbatna: “Kinunana a sigurado nga umimbagkanto.”+
15 Ngem iti simmaganad nga aldaw, nangala ni Hazael iti maysa nga abbong ket binabasana sa inyabbongna* iti rupa ti ari agingga a natay.+ Ni Hazael ti simmukat nga ari.+
16 Iti maikalima a tawen ti panagturay ni Jehoram+ nga anak ni Ahab nga ari ti Israel, bayat nga agar-ari ni Jehosafat iti Juda, nagbalin nga ari ni Jehoram+ nga anak ni Ari Jehosafat ti Juda.
17 Agtawen iti 32 idi nagbalin nga ari, ket nagturay iti walo a tawen idiay Jerusalem.
18 Tinuladna ti inaramid dagiti ari ti Israel,+ kas iti inaramid dagiti kameng ti sangakabbalayan ni Ahab,+ ta nagbalin nga asawana ti anak ni Ahab.+ Inar-aramidna ti dakes iti imatang ni Jehova.+
19 Ngem saan a kayat ni Jehova a dadaelen ti Juda maigapu ken David nga adipenna,+ ta inkarina a kanayon nga ikkanna iti lampara+ kasta met dagiti annakna.
20 Idi kaaldawanna, bimmusor ti Edom iti Juda+ sa nangipatugawda iti bukodda nga ari.+
21 Iti kasta, napan ni Jehoram idiay Zair agraman ti amin a karuahena. Rimmaut bayat ti rabii ket inabakna dagiti Edomita a nangpalikmut kenkuana ken dagiti komander ti karuahe. Nagkamang dagiti Edomita a soldado kadagiti toldada.
22 Ngem intultuloy ti Edom ti bimmusor iti Juda agingga ita nga aldaw. Bimmusor met ti Libna+ iti daydi a tiempo.
23 Ti dadduma pay a pasamak iti pakasaritaan ni Jehoram, ti amin nga inaramidna, ket naisurat iti libro dagiti pasamak idi tiempo dagiti ari ti Juda.
24 Naginana ni Jehoram a kas kadagidi ammana ket naitabon a kaduana dagidi ammana iti Siudad ni David.+ Ni Ahazias+ nga anakna ti simmaruno nga ari.
25 Iti maika-12 a tawen ti panagturay ni Jehoram nga anak ni Ahab nga ari ti Israel, nagbalin nga ari ni Ahazias nga anak ni Ari Jehoram ti Juda.+
26 Agtawen ni Ahazias iti 22 idi nagbalin nga ari, ket nagturay iti makatawen idiay Jerusalem. Ti nanangna ket ni Atalia+ nga apoko* ni Ari Omri+ ti Israel.
27 Tinuladna ti inaramid ti sangakabbalayan ni Ahab+ ket inar-aramidna ti dakes iti imatang ni Jehova, kas iti sangakabbalayan ni Ahab, ta naikamang iti sangakabbalayan ni Ahab.+
28 Iti kasta, kimmuyog ken Jehoram nga anak ni Ahab a napan nakigubat ken Ari Hazael ti Siria idiay Ramot-gilead,+ ngem sinugatan dagiti Siriano ni Jehoram.+
29 Nagsubli ngarud ni Ari Jehoram idiay Jezreel+ tapno agpaimbag iti sugat a linak-amna kadagiti Siriano idiay Rama idi nakilaban ken Ari Hazael ti Siria.+ Napan idiay Jezreel ni Ahazias nga anak ni Jehoram nga ari ti Juda tapno kitaenna ni Jehoram nga anak ni Ahab, ta nasugatan* idi.
