Ti Maikadua a Samuel 14:1-33
14 Naammuan ni Joab nga anak ni Zeruia+ a kailiw ti ari ni Absalom.+
2 Pinaayaban ni Joab ti maysa a masirib a babai idiay Tekoa,+ ket kinunana: “Agpammarangka nga agladladingit, pangngaasim, ken agpaneska, ken dika agsapsapo iti lana.+ Ipakitam a kasla nabayagen nga agdungdung-awka gapu ta nagminatayka.
3 Mapanka iti ari ket ibagam kenkuana ti sawek kenka.” Isu nga imbaga ni Joab ti sawen ti babai.
4 Napan ti babai a Tekoita iti ari ket nagrukob ken nagruknoy, sana kinuna: “Tulongannak, O ari!”
5 Kinuna ti ari kenkuana: “Ania ti problema?” Insungbat ti babai: “Ay, maysaakon a balo, natayen ni lakayko.
6 Adda dua nga annak a lallaki daytoy adipenmo. Idi addada idiay away, nagapada ngem awan ti nanganawa kadakuada, ket pinatay ti maysa ti kabsatna.
7 Ket nagkaykaysa ti intero a pamilia a bumusor kaniak nga adipenmo, ken ibagbagada, ‘Itedmo ti anakmo ta patayenmi gapu iti panangpatayna iti kabsatna,+ uray no kaipapanan dayta a mapapatay ti agtawid!’ Kayatda a patayen ti nabati nga anakko a kas iti panangiddepda iti beggang,* isu nga awanton ti makalasat* a putot daydi lakayko a mangtawid iti naganna iti rabaw ti daga.”
8 Kinuna ti ari iti babai: “Agawidkan, siakton ti makaammo iti dayta a banag.”
9 Isu a kinuna ti babai a Tekoita iti ari: “O apo ari, siak koma ken ti pamilia ni amak ti agikaro iti basol ti anakko tapno saan a mairamraman ti ari ken ti tronona.”
10 Kinuna ti ari: “No adda pay la agsao maikontra kenka, ipulongmo kaniak, tapno dinakanton pulos riribuken.”
11 Ngem kinuna ti babai: “Pangngaasim, apo ari, ta lagipem ni Jehova a Diosmo, tapno daydiay mangibales iti dara ti napapatay a tao+ ket saan a mangdadael ken dina patayen ti anakko.” Isu a kinuna ti ari: “Isapatak iti nagan ti sibibiag a Dios a ni Jehova,+ awanto a pulos ti maregreg a buok* ti anakmo.”
12 Kinuna ti babai: “Adda pay koma ibaga daytoy adipenmo, apo ari.” Kinuna ti ari: “Agsaoka!”
13 Kinuna ti babai: “Apay ngarud a nangaramidka iti makadangran iti ili ti Dios?+ Nakabasolka, apo ari, gapu iti imbagam ta saanmo nga impalubos nga agsubli ti mismo nga anakmo.+
14 Sigurado a mataytayto ken kaslatayto iti danum a maibukbok iti daga a saanen a maurnong. Ngem saan a kayat ti Dios a mataytayo, ken adda dagiti inkabilanganna a rason tapno agsubli kenkuana dagidiay napagtalaw.
15 Immayak tapno ibagak dagitoy kenka, apo ari, gapu ta binutbutengdak dagiti tattao. Isu a napanunotko nga ibaga kenka daytoy, apo ari, ta nalabit patgam ti kiddaw daytoy adipenmo.
16 Amangan no denggen ken isalakan ti ari daytoy adipenna manipud iti tao a mayat a mangala iti impatawid ti Dios kaniak ken iti kakaisuna nga anakko.+
17 Kinunak pay iti bagik, ‘Sapay koma ta pakabang-arak ti ibagam, apo ari,’ ta kaslaka iti maysa nga anghel ti pudno a Dios a makailasin iti naimbag ken iti dakes. Adda koma kenka ni Jehova a Diosmo.”
18 Simmungbat ti ari iti babai: “Adda saludsodek ket ibagam koma kaniak ti agpayso.” Kinuna ti babai: “Ania kadi daydiay, apo ari?”
19 Dinamag ti ari: “Ni kadi Joab ti nangibaga iti amin nga insaom kaniak?”+ Insungbat ti babai: “Ikarik kenka, apo ari, nga agpayso ti* imbagam, ta ti adipenmo a ni Joab ti nangisuro iti amin nga aramiden ken ibaga kenka daytoy adipenmo.
20 Inaramid daytoy ti adipenmo a ni Joab tapno ad-adda a maawatam ti kasasaad, ngem masiribka apo a kas iti anghel ti pudno a Dios ken ammom ti amin a mapaspasamak iti daga.”
21 Kalpasanna, kinuna ti ari ken Joab: “Sige, aramidek daytoy.+ Mapanmo alaen ni Absalom.”+
22 Nagrukob ken nagruknoy ni Joab ken dinaydayawna ti ari. Kinuna ni Joab: “Ammo itan daytoy adipenmo a maay-ayoka kaniak, apo ari, ta pinatgam ti kiddaw daytoy adipenmo.”
23 Timmakder ni Joab sa napan idiay Gesur+ ket insangpetna ni Absalom idiay Jerusalem.
24 Ngem kinuna ti ari: “Pagawidem idiay balayna, ngem saan a mabalin a makitanak.” Isu a nagawid ni Absalom idiay balayna, a saanna a nakita ti ari.
25 Iti intero nga Israel, ni laeng Absalom ti maidaydayaw gapu iti kinaguapona. Awan depektona manipud ulo agingga iti dapanna.
26 No pukisanna ti buokna, 200 a siklo* ti dagsenna sigun iti pagtimbangan ti ari.* (Masapul a pukisanna ti buokna iti ngudo ti kada tawen ta nadagsen unay no umatiddog.)
27 Tallo a lallaki ken maysa a babai ti annak ni Absalom.+ Nakapimpintas ti anakna a babai a ti naganna ket Tamar.
28 Dua a tawen a nagnaed ni Absalom idiay Jerusalem ngem dina pulos nakitkita ti ari.+
29 Isu a pinaayaban ni Absalom ni Joab tapno ipanna iti ayan ti ari, ngem saan nga immay ni Joab. Pinaayabanna manen iti maikadua a daras, ngem kaskasdi a saan nga immay.
30 Isu nga imbagana kadagiti adipenna: “Adda talon ni Joab iti abay ti talonko, a namulaan ita iti sebada. Inkay puoran.” Isu a pinuoran dagiti adipen ni Absalom dayta a talon.
31 Kalpasanna, napan ni Joab iti balay ni Absalom, ket kinunana: “Apay a pinuoran dagiti adipenmo ti talonko?”
32 Insungbat ni Absalom ken Joab: “Impaibagak kenka, ‘Umayka ta kayatko a mapanka iti ari ket isaludsodmo kenkuana: “Apay a pinaalanak pay laeng idiay Gesur?+ Nasaysayaat koma lattan nga addaak sadiay. Kayatko a makita ti ari, ket no adda basolko, patayennak koma.”’”
33 Isu a napan imbaga dayta ni Joab iti ari ket pinaayabanna ni Absalom. Napan ni Absalom ket nagrukob ken nagruknoy iti ari. Kalpasanna, inagkan ti ari ni Absalom.+
Footnotes
^ Kayatna a sawen, ti nabati a pangnamnamaan a mangituloy iti henerasion.
^ Lit., “mabati.”
^ Kayatna a sawen, saan a pulos a maan-ano.
^ Wenno “awan ti makapagpakannigid wenno makapagpakannawan iti.”
^ Mabalin a daytoy ti maus-usar a timbangan iti palasio ti ari wenno “naarian” a siklo a naiduma iti gagangay a siklo.
