Ti Maikadua a Samuel 19:1-43
19 Naipadamag ken Joab: “Agsangsangit ti ari ken agdungdung-aw gapu ken Absalom.”+
2 Isu a ti balligi* iti dayta nga aldaw ket nagbalin a dung-aw para iti amin a tattao, gapu ta nadamagda nga agladladingit ti ari iti ipapatay ti anakna.
3 Nakaul-ulimek dagiti tattao a nagsubli iti siudad+ iti dayta nga aldaw. Kasda la tattao a napabainan ta nagtalawda iti paggugubatan.
4 Inabbongan ti ari ti rupana, ket inrungrungaabna: “Anakko nga Absalom! Absalom nga anakko, anakko!”+
5 Napan ni Joab iti palasio ket kinunana iti ari: “Ita nga aldaw, imbabainmo ti amin nga adipenmo a nangsalbar iti biagmo,* ken iti biag* dagiti annakmo a lallaki+ ken babbai,+ assawam, ken sabali pay nga assawam.+
6 Ay-ayatem dagiti manggurgura kenka ken gurguraem dagiti mangay-ayat kenka, ta imparupam ita nga aldaw nga awan serserbi kenka dagiti panguluen ken ad-adipenmo, ta siguradok a kaykayatmo pay a sibibiag koma ni Absalom ita nga aldaw uray no nataykami aminen.
7 Isu a tumakderka, rummuarka, ket pabilgem* dagiti adipenmo, ta isapatak iti nagan ni Jehova a no dika rummuar, awanto ti taom a mabati kenka ita a rabii. Nakarkaronto daytoy ngem iti isuamin a napasaram a rigat manipud idi agtutuboka agingga ita.”
8 Isu a timmakder ti ari ket napan nagtugaw iti ruangan, ket naipadamag iti amin nga umili: “Agtugtugaw ita ti ari iti ruangan.” Ket immay ti amin a tattao iti sanguanan ti ari.
Ngem nagtatalaw ti dadduma nga Israelita* ket nagawidda iti balbalayda.+
9 Nagririri ti amin a tattao iti amin a tribu ti Israel, nga ibagbagada: “Insalakannatayo ti ari kadagiti kabusortayo,+ ken inispalnatayo kadagiti Filisteo; ngem ita, pinanawanna ti dagatayo gapu ken Absalom.+
10 Dinutokantayo idi ni Absalom a mangituray kadatayo,+ ngem natayen iti paggugubatan.+ Apay ngarud nga awan ti ar-aramidenyo a mangpasubli iti ari?”
11 Impaibaga ni Ari David kada Zadok+ ken Abiatar+ a papadi: “Ibagayo kadagiti panglakayen iti Juda,+ ‘Apay a dakayo ti maudi a mangisubli iti ari iti palasiona, idinto ta nakadanonen iti palasio ti ari ti imbaga ti intero nga Israel?
12 Kakabsatkayo; agkakadaraantayo.* Apay a dakayo ti maudi a mangisubli iti ari?’
13 Ibagayo met ken Amasa,+ ‘Saan kadi nga agkadaraanta?* Manipud ita, sikan ti pagbalinek a pangulo ti armada a kasukat ni Joab, ket dusaennak koma ti Dios no diak aramiden dayta.’”+
14 Naimpluensiaan ti ari ti puso* ti amin a taga-Juda, ket impaibagada kenkuana: “Agsublikan, sika ken ti amin nga adipenmo.”
15 Nagsubli ti ari ket idi nakadanon idiay Jordan, nakisinnabat dagiti taga-Juda idiay Gilgal+ tapno kaduaenda a bumallasiw iti Jordan.
16 Nagdardaras ni Simei+ nga anak ni Gera a Benjaminita a taga-Bahurim tapno sabtenna ni Ari David. Kaduana dagiti taga-Juda,
17 ken ti 1,000 a tattao a naggapu iti tribu ni Benjamin. Nagdardaras met a simmabat ni Ziba+ a katulongan ti pamilia ni Saul a kakuyogna ti 15 nga annakna a lallaki ken ti 20 nga adipenna. Immun-unada a nakadanon idiay Jordan ngem iti ari.
18 Bimmallasiw* iti karayan tapno maiballasiwna ti sangakabbalayan ti ari ken aramidenna ti aniaman a kayat ti ari. Ngem idi dandanin makaballasiw ti ari iti Jordan, sinabat ni Simei nga anak ni Gera ket nagruknoy iti sakaananna.
19 Kinunana iti ari: “Apo ari, pakawanennak koma iti inaramidko, ket lipatemon ti dakes nga inaramid daytoy adipenmo+ idi aldaw a pimmanawka idiay Jerusalem. Saan koman nga ing-ingpen daytoy ti ari,
20 ta ammok a nakabasolak; isu a siak nga adipenmo ti immuna kadagiti amin a naggapu iti tribu ni Jose nga immay simmabat ita kenka, apo ari.”
21 Dagus a kinuna ni Abisai+ nga anak ni Zeruia:+ “Saan kadi a rumbeng a mapapatay ni Simei gapu ta inlunodna ti dinutokan ni Jehova?”+
22 Ngem kinuna ni David: “Dikay makibiang, dakayo nga annak ni Zeruia,+ diyo kontraen ti pagayatak. Rumbeng kadi nga adda mapapatay ita iti Israel? Saan kadi a siak manen ita ti ari ti Israel?”
23 Kinuna ti ari ken Simei: “Saankanto a matay.” Inkari dayta ti ari.+
24 Immay met ni Mefiboset+ nga apoko ni Saul tapno sarabuenna ti ari. Manipud pimmanaw ti ari agingga a nagsubli a sitatalged, saan a binugbugguan ni Mefiboset dagiti sakana wenno saan a nagim-iming wenno saanna a linablabaan dagiti badona.
25 Idi napan* idiay Jerusalem tapno makisinnabat, kinuna kenkuana ti ari: “Mefiboset, apay a dika kimmuyog kaniak?”
26 Insungbatna: “Apo ari, inallilawnak ti adipenko.+ Imbagak kenkuana a siliaanna ti asnok tapno pagsakayak a makikuyog kenka, apo ari, ta pilay daytoy adipenmo.+
27 Ngem siak ketdin nga adipenmo ti pinadpadakesna kenka, apo ari.+ Nupay kasta, kaska la anghel ti pudno a Dios, apo ari, isu nga aramidem ti ammom a nasayaat.
28 Rumbeng laeng koma a pinataymo, apo ari, ti amin a miembro ti pamilia ni amak, ngem innalam daytoy adipenmo tapno makipangan kenka iti lamisaanmo.+ Isu nga ania koma ti kalintegak nga agreklamo pay iti ari?”
29 Ngem kinuna ti ari kenkuana: “Umdasen ti imbagam. Inkeddengkon a pagbingayanyo ken Ziba ti talon.”+
30 Kinuna ni Mefiboset iti ari: “Kukuana latta aminen, apo ari, uray ta nakasublikayon a sitatalged iti palasioyo.”
31 Manipud Rogelim, immay met ni Barzillai+ a taga-Gilead tapno kaduaenna ti ari a bumallasiw iti Jordan.
32 Lakay unayen ni Barzillai, ta agtawenen iti 80. Nakabakbaknang ken isu ti nangnangted iti taraon ti ari bayat nga adda idiay Mahanaim.+
33 Isu a kinuna ti ari ken Barzillai: “Kumuyogka kaniak a bumallasiw, ket kanayonto a kaduaka a mangan iti lamisaanko idiay Jerusalem.”+
34 Ngem insungbat ni Barzillai iti ari: “Mano laengen nga aldaw* ti nabatbati iti biagko, isu nga apay koma a sumurotak pay laeng iti ari idiay Jerusalem?
35 Agtawenakon iti 80.+ Mailasinko pay aya ti naimbag ken dakes? Mananamko pay aya ti imas ti kanek ken inumek? Mangngegko pay aya ti timek dagiti kumakanta?+ Apo ari, agbalin la a dadagsenmo daytoy adipenmo.
36 Saan a kasapulan a gunggonaannak, apo ari. Umdasen a pakaidayawan daytoy adipenmo ti panangitulod kenka ditoy Jordan.
37 Pangngaasim ta palubosam daytoy adipenmo nga agsubli ken matay iti siudadko nga asideg iti nakaitaneman ni amak ken ni inak.+ Adtoy ni Kimham+ nga adipenmo. Isu laengen ti kumuyog kenka a bumallasiw, apo ari. Sapay koma ta aramidem kenkuana ti aniaman nga ammom a nasayaat.”
38 Kinuna ti ari: “Ikuyogko ni Kimham a bumallasiw, ket aramidek kenkuana ti ammom a nasayaat; aramidek ti aniaman a kiddawem kaniak.”
39 Inrugin ti amin a tattao ti bumallasiw iti Jordan, ket idi bumallasiwen ti ari, inagkanna ni Barzillai+ ken binendisionanna; ket nagawiden ni Barzillai.
40 Idi bimmallasiw ti ari nga agturong idiay Gilgal,+ kakuyogna ni Kimham, agraman ti amin a taga-Juda ken kagudua iti bilang dagiti tattao ti Israel.+
41 Kalpasanna, immasideg kenkuana ti amin nga Israelita, ket kinunada kenkuana: “Apo ari, apay nga impanawdaka dagiti taga-Juda ken imballasiwdaka iti Jordan, agraman ti sangakabbalayam ken dagiti tattaom?”+
42 Kinuna ti amin a taga-Juda kadagiti tattao iti Israel: “Gapu ta kabagianmi ti ari.+ Apay a makapungtotkayo iti daytoy? Ti kadi ari ti naggasto iti kinkinnanmi, wenno adda aya in-intedna kadakami?”
43 Nupay kasta, kinuna dagiti tattao iti Israel kadagiti taga-Juda: “Sangapulokami a tribu isu nga ad-adu ti kalinteganmi ken Ari David ngem kadakayo. Apay a kaguradakami? Saan kadi a dakami ti immuna a nakapanunot a maisubli ti aritayo?” Ngem naturturay* ti panagsao dagiti taga-Juda ngem kadagiti tattao iti Israel.
Footnotes
^ Wenno “pannakaisalakan.”
^ Wenno “kararuam.”
^ Wenno “kararua.”
^ Lit., “kasaritam ti puso.”
^ Kayatna a sawen, dagidiay nangsuportar idi ken Absalom.
^ Wenno “dakayo ti tulang ken lasagko.”
^ Wenno “a sika ti tulang ken lasagko.”
^ Lit., “Pinagpakumbabana.”
^ Wenno mabalin a, “Bimmallasiwda.”
^ Wenno mabalin a, “naggapu.”
^ Lit., “al-aldaw ti tawtawenko.”
^ Wenno “nadagdagsen.”
