Ti Maikadua a Samuel 5:1-25
5 Idi agangay, napan ti amin a tribu ti Israel iti ayan ni David idiay Hebron+ ket kinunada: “Kakabagiannakami.*+
2 Idi ni Saul pay laeng ti arimi, sika ti mangidadaulo iti Israel a mapan makigubat.*+ Kinuna kenka ni Jehova: ‘Ipastoramto ti ilik nga Israel, ket agbalinkanto a lider ti Israel.’”+
3 Isu a napan ti amin a panglakayen ti Israel iti ari idiay Hebron, ket nakitulag kadakuada+ ni Ari David iti sanguanan ni Jehova. Kalpasanna, dinutokanda* ni David kas ari ti Israel.+
4 Agtawen ni David iti 30 idi nagbalin nga ari, ket nagturay iti 40 a tawen.+
5 Idiay Hebron, inturayanna ti Juda iti 7 a tawen ken 6 a bulan, ket idiay Jerusalem,+ inturayanna ti intero nga Israel ken Juda iti 33 a tawen.
6 Napan ti ari ken dagiti tattaona idiay Jerusalem tapno rautenda dagiti Jebuseo+ nga agnanaed sadiay. Ininsultoda ni David: “Pulos a saanka a makastrek ditoy! Uray dagiti bulsek ken pilay papanawendakanto.” Ta pinanunotda: ‘Saanto a makastrek ditoy ni David.’+
7 Ngem sinakup ni David ti napaderan a siudad ti Sion, a maawagan itan iti Siudad ni David.+
8 Imbaga ni David iti dayta nga aldaw: “Dagidiay rumaut kadagiti Jebuseo masapul a magnada iti pagayusan ti danum tapno papatayenda ‘dagiti pilay ken bulsek,’ a manggurgura ken David!” Isu nga adda dagidiay mangibagbaga: “Dinto pulos makastrek dagiti bulsek ken pilay iti balay.”
9 Nagnaed ni David iti napaderan a siudad, ket naawagan* iti Siudad ni David. Binangon ni David dagiti pader ken ti dadduma pay a patakder manipud iti Bunton*+ ken iti dadduma pay a paset ti siudad.+
10 Gapuna, bimmileg a bimmileg ni David,+ ket adda kenkuana ni Jehova a Dios dagiti armada.+
11 Nangibaon ni Ari Hiram+ ti Tiro kadagiti mensahero a mapan ken David. Nangipatulod met kadagiti kayo a sedro,+ ken nangibaon kadagiti karpintero ken parakabite iti bato ti pader, ket imbangonanda ni David iti balay.*+
12 Napaneknekan ni David a ni Jehova ti nangisaad kenkuana kas ari iti Israel+ ken nangitan-ok iti pagarianna+ para iti Israel nga ili ti Dios.+
13 Idi naggapu idiay Hebron, nangala ni David idiay Jerusalem iti adu nga assawana ken sabali pay nga assawa,+ isu nga immadu ti annakna a lallaki ken babbai.+
14 Dagitoy ti nagan dagiti annakna a nayanak idiay Jerusalem: Samua, Sobab, Natan,+ Solomon,+
15 Ibar, Elisua, Nefeg, Jafia,
16 Elisama, Eliada, ken Elifelet.
17 Idi nadamag dagiti Filisteo a nadutokan ni David kas ari ti Israel,+ binirbirok ti amin a Filisteo ni David.+ Naglemmeng ni David idi nadamagna dayta.+
18 Immay dagiti Filisteo ken nagwawarasda iti Tanap* ti Refaim.+
19 Dinamag ni David ken Jehova:+ “Labanak kadi dagiti Filisteo? Iyawatmonto kadi ida kaniak?” Insungbat ni Jehova: “Mapanka, ta iyawatkonto kenka dagiti Filisteo.”+
20 Gapuna, nakadanon ni David idiay Baal-perazim ket pinatayna ida sadiay. Kinunana: “Pinarmek ni Jehova dagiti kabusorko+ a kas iti pannakarba ti pader gapu iti napegges a danum.” Dayta ti makagapu a pinanagananna dayta a lugar iti Baal-perazim.*+
21 Pinanawan dagiti Filisteo dagiti rebultoda sadiay, ket innala dagita ni David ken dagiti tattaona.
22 Di nagbayag, immay manen dagiti Filisteo ket nagwawarasda iti Tanap* ti Refaim.+
23 Nagsaludsod ni David ken Jehova, ngem insungbatna: “Saanka a rumaut iti sanguananda. Imbes ketdi, manglikawka iti likudanda, ket rautem ida iti sango dagiti babassit a kayo a baca.
24 Inton mangngegmo dagiti kasla danapeg dagiti tattao iti ngatuen dagiti babassit a kayo a baca, rumautkayo a dagus ta umun-unanto ni Jehova a mangpapatay iti armada dagiti Filisteo.”
25 Inaramid ni David dagiti imbilin ni Jehova, ket naparmekna dagiti Filisteo+ manipud Geba+ agingga idiay Gezer.+
Footnotes
^ Lit., “Dakami ti tulang ken lasagmo.”
^ Lit., “mangiruruar ken mangiserserrek iti Israel.”
^ Wenno “pinulotanda.”
^ Wenno mabalin nga, “inawaganna.”
^ Wenno “Millo.” Hebreo a sao a kaipapananna, “gabur.”
^ Wenno “palasio.”
^ Wenno “Kapatagan.”
^ Kaipapananna, “Eksperto iti Panangraut.”
^ Wenno “Kapatagan.”
