Ti Maikadua a Samuel 7:1-29
7 Idi agnanaeden ni Ari David iti balayna*+ ken pinaginana ni Jehova manipud iti amin a kabusorna iti aglawlawna,
2 kinunana ken propeta Natan:+ “Agnanaedak iti balay a sedro+ idinto ta ti Lakasa ti pudno a Dios ket adda iti tolda a lupot.”+
3 Insungbat ni Natan iti ari: “Aramidem ti aniaman a kayat ta pusom, ta adda kenka ni Jehova.”+
4 Iti dayta met la a rabii, kinuna ni Jehova ken Natan:
5 “Inka ibaga ken adipenko a David, ‘Daytoy ti kinuna ni Jehova: “Rumbeng kadi nga ibangonannak iti balay a pagnaedak?+
6 Ta saanak pay a nagnaed iti balay manipud idi aldaw nga inruarko dagiti Israelita idiay Egipto agingga ita nga aldaw,+ no di ket nagakar-akarak* iti tolda ken iti tabernakulo.+
7 Iti amin a tiempo a nakipagnaak iti amin nga Israelita,* adda kadi imbagak iti asinoman kadagiti lider dagiti tribu ti Israel a dinutokak a mangipastor iti ilik nga Israel, ‘Apay a didak imbangonan iti balay a sedro?’”’
8 Ibagam ken adipenko a David, ‘Daytoy ti kinuna ni Jehova a panguluen dagiti armada: “Innalaka iti pagpastoran, idi ay-aywanam ti arban,+ tapno agbalinka a lider ti ilik nga Israel.+
9 Addaakto kenka sadinoman a papanam,+ ken papatayekto* ti amin a kabusormo iti sanguanam;+ ket pagbalinekto a natan-ok ti naganmo+ a kas iti nagan dagiti natan-ok a tattao ditoy daga.
10 Mangpiliak iti lugar a pagnaedanto ti ilik nga Israel. Agnaeddanto sadiay ken awanto ti mangriribuk kadakuada; ket saanto a parigaten manen ida dagiti dakes a tattao a kas iti inaramidda kadakuada idi,+
11 manipud idi nangdutokak kadagiti ukom+ a mangituray iti ilik nga Israel. Paginanaenkanto manipud iti amin a kabusormo.+
“‘“Imbaga met kenka ni Jehova nga ibangonannakanto ni Jehova iti balaymo.*+
12 Inton matayka+ ken maitabonka iti tanem dagidi ammam, isaadkonto kas ari ti putotmo,* ti mismo nga anakmo a lalaki,* ket pagtalinaedekto ti pagarianna.+
13 Mangibangonto iti balay para iti naganko,+ ket pagtalinaedekto nga agnanayon ti trono ti pagarianna.+
14 Agbalinakto nga amana, ket agbalinto nga anakko.+ No agaramid iti dakes, tubngarek babaen ti pagbaut ti tattao ken pannaplit dagiti annak ti tattao.*+
15 Dinto maikkat ti napudno nga ayatko kenkuana. Saan a kas iti panangikkatko iti dayta ken Saul+ nga inikkatko iti imatangmo.
16 Natibkerto iti agnanayon ti balaymo ken ti pagariam; agnanayonto ti panagturaymo.”’”+
17 Imbaga amin daytoy ni Natan ken ni David agraman ti intero a sirmata.+
18 Nagtugaw ni Ari David iti sanguanan ni Jehova ket kinunana: “Asinoak, O Kangatuan* nga Apo Jehova? Ken asino koma ti pamiliak tapno aramidem amin dagitoy kaniak?+
19 Ken saan la a dayta, O Kangatuan nga Apo Jehova, imbagam pay ti maipapan iti pamilia ti adipenmo agingga iti adayo a masanguanan. O Kangatuan nga Apo Jehova, daytoy ti bilin* nga intedmo iti intero a sangatauan.
20 Ania pay koma ti maibaga kenka daytoy adipenmo a ni David, ta am-ammonak unay,+ O Kangatuan nga Apo Jehova?
21 Gapu iti saom ken pagayatan ti pusom,* inaramidmo amin dagitoy a naindaklan a banag ket impakaammom ida iti adipenmo.+
22 Dayta ti makagapu a pudno a naindaklanka,+ O Kangatuan nga Apo Jehova. Awan ti kas kenka,+ ken awan ti Dios malaksid kenka.+ Mapaneknekanmi dayta gapu iti amin a nangngegmi.
23 Ken ania a nasion ditoy daga ti kas iti ilim nga Israel?+ Sika, O Dios, ti nangsubbot kadakuada kas ilim,+ nga inyaramidam iti nagan ti bagim+ babaen ti naindaklan ken nakaskasdaaw a bambanag nga inaramidmo para kadakuada.+ Pinapanawmo dagiti nasion ken dagiti diosda gapu iti ilim a sinubbotmo idiay Egipto maipaay kenka.
24 Pinagbalinmo ti Israel kas ilim iti agnanayon;+ ket sika, O Jehova, nagbalinka a Diosda.+
25 “Ita, O Jehova a Dios, agnanayon a tungpalem ti karim maipapan iti adipenmo ken iti sangakabbalayanna, ken aramidem koma ti inkarim.+
26 Maitan-ok koma ti naganmo iti agnanayon+ tapno ibaga dagiti tattao, ‘Ni Jehova a panguluen dagiti armada ket Dios ti Israel,’ ken agtalinaed koma iti agnanayon ti sangakabbalayan daytoy adipenmo a ni David.+
27 Ta sika, Jehova a panguluen dagiti armada, ti Dios ti Israel, impakaammom iti adipenmo a kinunam, ‘Ibangonankanto iti balay.’*+ Dayta ti makagapu a daytoy adipenmo ket natured* a mangikararag kenka iti kastoy.
28 Ita, O Kangatuan nga Apo Jehova, sika ti pudno a Dios, ken pudno ti saom,+ ket inkarim iti adipenmo dagitoy naimbag a bambanag.
29 Pakaragsakam koma ngarud a bendisionan ti sangakabbalayan ti adipenmo, ken agtalinaed koma dayta iti agnanayon iti sanguanam;+ ta sika ti nagkari, O Kangatuan nga Apo Jehova, ket babaen ti bendisionmo, agnanayon koma a mabendisionan ti sangakabbalayan ti adipenmo.”+
Footnotes
^ Wenno “palasiona.”
^ Lit., “nagnagnaak.”
^ Lit., “annak ni Israel.”
^ Lit., “pukawekto.”
^ Wenno “dinastia.”
^ Lit., “bin-im.”
^ Lit., “daydiay agtaud kadagiti makin-uneg a pasetmo.”
^ Wenno mabalin a, “ni Adan.”
^ Wenno “Soberano.”
^ Wenno “linteg.”
^ Wenno “maitunos iti pagayatam.”
^ Wenno “dinastia.”
^ Lit., “nasarakanna ti pusona.”
