Ester 8:1-17
8 Iti dayta nga aldaw, inted ni Ari Ahasuero ken ni Reyna Ester ti amin a sanikua ni Haman,+ ti kabusor dagiti Judio.+ Napan ni Mardokeo iti sanguanan ti ari, ta imbaga ni Ester a kabagianna ni Mardokeo.+
2 Inuksot ti ari ti singsingna a pagmarka+ a naited idi ken Haman ket intedna ken Mardokeo. Dinutokan met ni Ester ni Mardokeo nga agaywan iti amin a sanikua ni Haman.+
3 Nakisarita manen ni Ester iti ari. Nagparintumeng, nagsangsangit, ken impakpakaasina a pasardengen ti ari ti dakes a panggep ni Haman nga Agageo kadagiti Judio.+
4 Impaturong ti ari ti balitok a setro ken Ester,+ ket timmakder ni Ester iti sanguanan ti ari.
5 Kinunana: “No pagayatan ken pakaragsakan ti ari ken no ibilang ti ari a naimbag ken no makaay-ayoak kenkuana, adda koma maisurat a bilin a mangwaswas iti dakes a plano ni Haman,+ nga anak ni Hamedata nga Agageo,+ nga insuratna tapno mapapatay dagiti Judio iti amin a probinsia a sakup ti ari.
6 Ta kasanok a maitured a buyaen a madidigra dagiti kailiak ken mapapatay dagiti kabagiak?”
7 Kinuna ni Ari Ahasuero kada Reyna Ester ken Mardokeo a Judio: “Impabitaykon ni Haman+ gapu iti panggepna a mangpapatay* kadagiti Judio ken intedkon ti amin a sanikuana ken Ester.+
8 Mabalinyo nga isurat ti aniaman a bilin nga ammoyo a pagimbagan dagiti Judio. Isuratyo dayta iti naganko ken markaanyo babaen ti singsingko, ta saan a mawaswas ti bilin a naisurat iti nagan ti ari ken namarkaan babaen ti singsing ti ari.”+
9 Iti maika-23 nga aldaw ti maikatlo a bulan a maawagan iti Sivan,* naayaban dagiti sekretario ti ari ket insuratda ti amin nga imbilin ni Mardokeo kadagiti Judio, kasta met kadagiti satrapa,+ gobernador, ken prinsipe iti 127 a probinsia*+ manipud India agingga iti Etiopia. Naisurat dayta a bilin iti estilo ti panagsurat ken lengguahe ti tunggal probinsia,* ken iti estilo ti panagsurat ken lengguahe dagiti Judio.
10 Naisurat dayta iti nagan ni Ari Ahasuero ken namarkaan babaen ti singsing ti ari.+ Naipatulod dagita a surat babaen kadagiti mensahero a nakasakay kadagiti napartak a kabalio ti ari.
11 Kadagitoy a surat ti ari, napalubosan nga aguummong dagiti Judio iti amin a nagduduma a siudad ken protektaranda ti bagida. Ibusen, papatayen, ken dadaelenda met ti aniaman nga armado a grupo ti aniaman nga ili wenno probinsia* a mangraut kadakuada, agraman dagiti babbai ken ubbing, ken alaenda dagiti sanikuada.+
12 Ti aldaw a panangaramid dagiti Judio iti daytoy iti amin a probinsia a sakup ni Ari Ahasuero ket ti maika-13 nga aldaw ti maika-12 a bulan a maawagan iti Adar.*+
13 Maipaulog daytoy a bilin kas linteg iti amin a probinsia* ken maipakaammo iti amin a tattao tapno makapagsagana dagiti Judio a lumaban kadagiti kabusorda inton dumteng dayta nga aldaw.+
14 Dagiti mensahero a nakasakay kadagiti kabalio ti ari sipapartak a nagtulnogda iti bilin ti ari. Naipatungpal met ti linteg iti kastilio* ti Susan.*+
15 Pimmanaw ni Mardokeo iti sanguanan ti ari. Nadaeg ti asul ken puraw a badona, nangayed ti koronana a balitok ken nakakagay iti napino a delana a purpura.+ Nagpukpukkaw dagiti tattao iti siudad ti Susan* gapu iti ragsakda!
16 Nabang-aran* dagiti Judio, nagragrag-o ken nagragragsakda ken raraemen idan dagiti tattao.
17 Iti amin a probinsia* ken siudad, ken iti sadinoman a nakaidanonan ti bilin ti ari ken ti lintegna, nagselebrar dagiti Judio, nagragrag-o ken nagragragsakda. Adu a saan a Judio ti nangibaga a Judioda+ ta kabutengda dagiti Judio.
Footnotes
^ Lit., “gapu ta inlayatna ti imana.”
^ Wenno “masakupan a distrito.”
^ Wenno “masakupan a distrito.”
^ Wenno “masakupan a distrito.”
^ Wenno “masakupan a distrito.”
^ Wenno “palasio.”
^ Wenno “Susa.”
^ Wenno “Susa.”
^ Lit., “Nalawagan.”
^ Wenno “masakupan a distrito.”
