Exodo 18:1-27
18 Nadamag ni Jetro a padi ti Midian ken katugangan ni Moises+ ti maipapan iti amin nga inaramid ti Dios para ken Moises ken kadagiti Israelita, no kasano nga inruar ida ni Jehova idiay Egipto.+
2 Ni Jetro, a katugangan ni Moises, ti nangaywan iti asawana a ni Zipora idi pinagawid ni Moises,
3 a kadua ti dua nga annakda.+ Pinanaganan ni Moises ti maysa iti Gersom,*+ ta kinunana, “Nagbalinak a ganggannaet a residente iti sabali a daga,”
4 ket Eliezer* ti nagan ti sabali ta kinunana, “Ti Dios ni amak ti tumultulong kaniak ken nangilisi kaniak iti espada ni Faraon.”+
5 Agkamkampo idi ni Moises iti bantay ti pudno a Dios+ ket napan sadiay ni Jetro a katuganganna a kaduana ni Zipora ken dagiti annakna.
6 Impaibagana ken Moises: “Siak ni Jetro a katugangam+ ket kaduak ti asawam ken ti dua nga annakyo.”
7 Dagus a napan sinabat ni Moises ti katuganganna ket nagruknoy ken inagkanna. Nagkikinnomustada sada simrek iti tolda.
8 Imbaga ni Moises iti katuganganna ti amin nga inaramid ni Jehova ken Faraon ken iti Egipto maigapu iti Israel,+ ken ti amin a napasaranda a rigat iti dalan,+ ken no kasano nga insalakan ida ni Jehova.
9 Naragsakan ni Jetro iti amin a nasayaat nga inaramid ni Jehova para iti Israel ta insalakanna ida iti Egipto.*
10 Kinuna ni Jetro: “Maidaydayaw koma ni Jehova a nangisalakan kadakayo manipud iti Egipto ken iti ima ni Faraon, ken nangisalakan kadagiti tattao iti panangadipen dagiti Egipcio.
11 Ammokon a nabilbileg ni Jehova ngem iti amin a sabali a dios+ gapu iti inaramidna kadagidiay nangirurumen kadagiti tattaona.”
12 Kalpasanna, nangipaay ni Jetro a katugangan ni Moises iti daton a mapuoran ken dadduma pay a maidaton iti Dios, ket immay ni Aaron ken ti amin a panglakayen ti Israel tapno makipanganda iti katugangan ni Moises, iti imatang ti pudno a Dios.
13 Kabigatanna, kas iti gagangay, nagtugaw ni Moises tapno agserbi kas ukom kadagiti tattao. Saan nga agsarsardeng dagiti tattao a mapmapan kenkuana agingga iti rabii.
14 Idi makita ti katuganganna ti amin nga ar-aramiden ni Moises, kinunana: “Ania daytoy nga ar-aramidem para kadagiti tattao? Apay a siksika ti mangas-asikaso iti amin a problema dagiti tattao nga um-umay kenka agingga iti rabii?”
15 Insungbat ni Moises iti katuganganna: “Kanayonda met ngamin nga umay agkiddaw kaniak iti panangiwanwan ti Dios.
16 No adda kaso, umayda kaniak ket siak ti mangukom no asino ti umiso kadakuada, ken ibagak dagiti desision ken linteg ti pudno a Dios.”+
17 Kinuna ti katuganganna: “Saan a nasayaat ti ar-aramidem.
18 Sigurado a mabannogka ken uray dagiti tattao nga um-umay kenka, ta nadagsen unay daytoy a trabahom ket saanmo a kabaelan a siksika.
19 Denggem ti ibagak ket bendisionannakanto ti Dios.+ Agserbika kas pannakabagi ti pudno a Dios kadagiti tattao,+ ket ipakaammom iti pudno a Dios dagiti kasoda.+
20 Isurom kadakuada dagiti pagannurotan ken linteg+ ken ibagam kadakuada no kasano nga aramidenda dagita ken no ania ti rumbeng nga aramidenda.
21 Masapul a mangpilika kadagiti lallaki nga agbuteng iti Dios, makabael,+ mapagtalkan, ken saan a naagum iti material a gunggona.+ Pagbalinem ida a panguluen ti rinibu, panguluen ti ginasut, panguluen ti saglilimapulo, ken panguluen ti sagsasangapulo.+
22 Agserbidanto a hues tunggal adda tumaud a kaso. Idatagdanto kenka dagiti dadakkel a kaso+ ngem isuda ti mangasikaso kadagiti babassit a kaso. Saanka a marigatan no pagbibingayanyo ti trabaho.+
23 No aramidem daytoy, ken no kasta ti ibilin ti Dios kenka, saankanto a marigatan, ken natalnanto ti panunot ti tunggal maysa nga agawid.”
24 Dagus nga inaramid ni Moises ti amin nga imbaga ti katuganganna.
25 Nangpili ni Moises iti makabael a lallaki iti intero nga Israel ket pinagbalinna ida a panguluen ti rinibu, ginasut, saglilimapulo, ken sagsasangapulo.
26 Nagserbida a hues kadagiti tumaud a kaso. Indatagda ken Moises+ dagiti dadakkel a kaso ngem isuda ti nangasikaso kadagiti babassit a kaso.
27 Kalpasan dayta, pinarubbuatanen ni Moises ti katuganganna+ a nagawid iti ilina.
Footnotes
^ Kaipapananna, “Ganggannaet nga Agnanaed Sadiay.”
^ Kaipapananna, “Ti Diosko ket Katulongan.”
^ Lit., “manipud iti ima ti Egipto.”
