Ezekiel 32:1-32
32 Iti maika-12 a tawen, iti umuna nga aldaw ti maika-12 a bulan, kinuna manen kaniak ni Jehova:
2 “Anak ti tao, mangikantaka iti dung-aw* maipapan ken Faraon nga ari ti Egipto, ket ibagam,‘Kaslaka iti napigsa a bumaro a leon* kadagiti nasion,Ngem napagulimekka.
Kaslaka iti nakadakdakkel nga animal iti baybay,+ a mangkibkibur kadagiti karayanmo,A mangliblibeg iti danum babaen ti sakam ken mangrugrugit kadagiti karayan.’*
3 Daytoy ti kinuna ti Kangatuan* nga Apo Jehova:
‘Iwayatkonto kenka ti iketko babaen ti naguummong nga adu a nasion,Ket tiliwendakanto iti iketko.
4 Baybay-ankanto iti daga;Ibellengkanto iti tanap.
Pagdissuekto kenka ti amin a billit iti tangatang,Ket pennekekto dagiti atap nga animal iti intero a daga babaen ti lasagmo.+
5 Ibellengkonto ti lasagmo kadagiti bantayKet punnuekto dagiti tanap kadagiti bangkaymo.+
6 Layusekto ti daga agingga kadagiti bantay iti agpuspussuak a daram,Ket mapnonto iti dayta dagiti karayan.’*
7 ‘Inton matayka, abbongakto ti langit ken pagsipngetek dagiti bituenna.
Abbongakto ti init kadagiti ulep,Ken saanto nga agsilnag ti bulan.+
8 Pagsipngetekto amin nga agsilsilnag a silaw iti langit gapu kenka,Ken abbongakto ti dagam iti sipnget,’ kuna ti Kangatuan nga Apo Jehova.
9 ‘Riribukekto ti puso ti adu a tattao inton ipanko iti sabali a nasion dagiti tiniliwmo,Kadagiti daga a saanmo nga ammo.+
10 Kigtotekto ti adu a tattao,Ket agpigergerto iti buteng dagiti arida gapu kenka inton iwasiwasko ti espadak iti sanguananda.
Agtultuloydanto nga agpigerger, agbutengto ti tunggal maysa maigapu iti biagna,Iti aldaw a pannakatnagmo.’
11 Ta daytoy ti kinuna ti Kangatuan nga Apo Jehova:
‘Dumtengto kenka ti espada ti ari ti Babilonia.+
12 Ipaluboskonto ti armadam a patayen dagiti nabileg a mannakigubat babaen ti espada,Ti kaulpitan kadagiti nasion, aminda.+
Ipababadanto ti pagpampannakkel ti Egipto, ket matayto ti intero nga armadana.+
13 Dadaelekto amin a tarakenna iti abay ti adu a danumna,+Ket awanto ti saka ti tao wenno animal a manglibeg manen iti dayta.’+
14 ‘Iti dayta a tiempo, palitnawekto dagiti danumda,Ken pagayusekto dagiti karayanda a kas iti lana,’ kuna ti Kangatuan nga Apo Jehova.
15 ‘Inton pagbalinek a langalang ti Egipto, daga a naikkat ti amin a nagyanna,+Inton patayek amin nga agnanaed iti dayta,Maammuandanto a siak ni Jehova.+
16 Maysa daytoy a dung-aw, ket sigurado nga ikantanto ti tattao;Ikantanto daytoy ti annak a babbai dagiti nasion.
Ikantadanto daytoy iti Egipto ken iti armadana,’ kuna ti Kangatuan nga Apo Jehova.”
17 Kalpasanna, iti maika-12 a tawen, iti maika-15 nga aldaw ti bulan, kinuna kaniak ni Jehova:
18 “Anak ti tao, dung-awam ti armada ti Egipto ken ibabam dayta iti uneg ti daga, isu ken ti annak a babbai dagiti nabileg a nasion, a kadua dagidiay bumaba iti abut.*
19 “‘Asino ti artapam iti kinapintas? Bumabaka ket makikaduaka kadagiti di nakugit!’
20 “‘Mataydanto iti tengnga dagiti napapatay iti espada.+ Nayawat ti Egipto iti espada; guyodenyo nga iyadayo agraman ti armadana.
21 “‘Manipud iti kaunegan a paset ti Tanem,* makisaritanto kenkuana dagiti kabilgan a mannakigubatna ken dagiti katulonganna. Sigurado a bumabadanto ket maitiponda kadagiti di nakugit, a napapatay iti espada.
22 Adda sadiay ti Asiria ken ti intero nga armadana. Adda iti aglikmutna dagiti tanemda, agpapada a natayda iti espada.+
23 Adda iti kaunegan a paset ti abut* dagiti tanemna, ken adda iti aglikmut ti tanemna ti armada, agpapada a natayda iti espada, gapu ta binutbutengda dagiti tattao idi sibibiagda.
24 “‘Adda sadiay ti Elam+ ken adda iti aglikmut ti tanemna ti armadana, agpapada a natayda iti espada. Naipababada a di nakugit iti uneg ti daga, dagidiay nangbutbuteng kadagiti tattao idi sibibiagda. Ita, maibabainda a kadua dagidiay bumaba iti abut.*
25 Inyaramidanda iti pagiddaanna iti tengnga dagidiay napapatay, agraman ti armadana iti aglikmut dagiti tanemna. Saanda amin a nakugit, napapatayda iti espada, gapu ta binutbutengda dagiti tattao idi sibibiagda; ket maibabaindanto a kadua dagidiay bumaba iti abut.* Naitipon ti Elam kadagiti napapatay.
26 “‘Adda sadiay ti Mesek ken Tubal+ ken ti intero nga armadana. Adda iti aglikmutna dagiti tanemda.* Saanda amin a nakugit, naduyokda iti espada, gapu ta binutbutengda dagiti tattao idi sibibiagda.
27 Saandanto kadi a maitipon kadagiti napapatay a di nakugit a nabileg a mannakigubat, a bimmaba iti Tanem* agraman dagiti armasda a pakigubat? Ikabildanto dagiti espadada iti baba dagiti uloda* ken dagiti basolda kadagiti tulangda, gapu ta binutbuteng dagitoy a nabileg a mannakigubat dagiti tattao idi sibibiagda.
28 Ngem sika, mapapataykanto iti tengnga dagiti di nakugit, ket maitiponkanto kadagidiay napapatay iti espada.
29 “‘Adda sadiay ti Edom,+ dagiti ari ken ti amin a panguluenna, a nupay nabilegda, naitiponda kadagiti napapatay iti espada; maitipondanto met kadagiti di nakugit+ ken kadagidiay bumaba iti abut.*
30 “‘Adda sadiay ti amin a prinsipe* ti amianan, agraman ti amin a Sidonio,+ a naibabain a bimmaba a kadua dagiti napapatay, iti laksid ti buteng a pinataud ti kinabilegda. Mataydanto a di nakugit a kadua dagiti napapatay iti espada ken maibabaindanto a kadua dagiti bumaba iti abut.*
31 “‘Makitanto amin dagitoy ni Faraon, ket maliwliwanto iti amin a napasamak iti armadana;+ mapapatayto iti espada ni Faraon ken ti intero nga armadana,’ kuna ti Kangatuan nga Apo Jehova.
32 “‘Gapu ta binutbuteng ni Faraon dagiti tattao idi sibibiag, aginananto ken ti intero nga armadana a kadua dagiti di nakugit, a kadua dagiti napapatay iti espada,’ kuna ti Kangatuan nga Apo Jehova.”
Footnotes
^ Lit., “karayanda.”
^ Wenno “burboran a bumaro a leon.”
^ Wenno “kanta ti panagladingit.”
^ Wenno “Soberano.”
^ Lit., “Ket mapnonto kenka dagiti lansad ti karayan.”
^ Wenno “tanem.”
^ Wenno “tanem.”
^ Wenno “tanem.”
^ Wenno “tanem.”
^ Lit., “tanemna.”
^ Nalabit tumukoy kadagiti mannakigubat a naitabon agraman ti espadada, ken napadayawanda kas soldado.
^ Wenno “tanem.”
^ Wenno “lider.”
^ Wenno “tanem.”
