Genesis 30:1-43
30 Nagimon ni Raquel iti kabsatna idi saanna a maikkan ni Jacob iti anak, isu a kinunana: “Ikkannak iti anak ta no saan, matayak.”
2 Nakapungtot ni Jacob ken Raquel ket kinunana: “Siak aya ti Dios a nanglapped kenka nga aganak?”*
3 Gapuna, kinuna ni Raquel: “Alaem ti adipenko a ni Bilha.+ Makidennaka kenkuana tapno mangyanak iti agbalin nga anakko.”*
4 Iti kasta, impaasawana ni Bilha nga adipenna ket dinennaan ni Jacob.+
5 Nagsikog ni Bilha ket idi agangay, nangyanak ken Jacob iti lalaki.
6 Kinuna ni Raquel: “Ti Dios ti nagbalin nga ukomko ken dinengngegnak, isu nga inikkannak iti anak a lalaki.” Dayta ti makagapu a pinanagananna iti Dan.*+
7 Nagsikog manen ni Bilha nga adipen ni Raquel ket idi agangay, nangyanak ken Jacob iti maikadua nga anak a lalaki.
8 Kinuna ni Raquel: “Nakigabboak a sipipinget iti kabsatko ket siak ti nangabak!” Gapuna, pinanagananna iti Neftali.*+
9 Idi nadlaw ni Lea a nagsardengen nga aganak, innalana ti adipenna a ni Zilpa ket inyasawana ken Jacob.+
10 Ni Zilpa nga adipen ni Lea ket nangyanak ken Jacob iti lalaki.
11 Kinuna ni Lea: “Naimbag ti nagbanagak!” Gapuna, pinanagananna iti Gad.*+
12 Kalpasanna, ni Zilpa nga adipen ni Lea ket nangyanak manen ken Jacob iti maikadua nga anak a lalaki.
13 Kinuna ni Lea: “Nakaragragsakak! Sigurado nga ibaganto dagiti babbai a naragsakak.”+ Gapuna, pinanagananna iti Aser.*+
14 Tiempo idi ti panagani iti trigo ket nagpagnapagna ni Ruben+ idiay talon ken nakasarak kadagiti mandragora. Intedna dagita ken Lea nga inana. Kinuna ni Raquel ken ni Lea: “Ikkannak man iti sumagmamano a mandragora ti anakmo.”
15 Insungbat ni Lea: “Inagawmo la ngaruden ti asawak,+ alaem pay dagiti mandragora ti anakko?” Gapuna, kinuna ni Raquel: “No ikkannak kadagiti mandragora ti anakmo, makidennanto kenka ni Jacob inton rabii.”
16 Rabiin idi makasangpet ni Jacob manipud iti talon ket sinabet ni Lea sa kinunana: “Makidennaka kaniak ta inabanganka babaen kadagiti mandragora ti anakko.” Gapuna, nakidenna kenkuana ni Jacob iti dayta a rabii.
17 Impangag ti Dios ti kararag ni Lea isu a nagsikog ket di nagbayag, nangyanak ken Jacob iti maikalima nga anak a lalaki.
18 Kinuna ni Lea: “Inted kaniak ti Dios ti tangdanko* ta intedko ti adipenko iti asawak.” Gapuna, pinanagananna iti Isacar.*+
19 Nagsikog manen ni Lea ket di nagbayag, nangyanak ken Jacob iti maikanem nga anak a lalaki.+
20 Kinuna ni Lea: “Inikkannak ti Dios iti nagsayaat a sagut. Ita, awatennakon ti asawak,+ ta inikkak iti innem nga annak a lallaki.”+ Gapuna, pinanagananna iti Zabulon.*+
21 Kalpasanna, nangyanak iti maysa a babai ket pinanagananna iti Dina.+
22 Idi agangay, linagip ti Dios ni Raquel, ket sinungbatanna ti kararagna babaen ti panangipalubosna nga agsikog.*+
23 Nagsikog ni Raquel ket inyanakna ti maysa a lalaki. Kinunana: “Inikkat ti Dios ti pannakaibabainko!”+
24 Gapuna, pinanagananna iti Jose,*+ ket kinunana: “Inikkannak ni Jehova iti sabali pay nga anak a lalaki.”
25 Kalpasan nga inyanak ni Raquel ni Jose, kinuna a dagus ni Jacob ken ni Laban: “Palubosannak nga agawid iti pagiliak.+
26 Itedmo dagiti assawa ken annakko, a naalak gapu iti panagserbik kenka, ket agawidakon ta ammom a nagserbiak kenka a simamatalek.”+
27 Insungbat ni Laban: “No maragsakanka kaniak, agtalinaedka koma. Nakitak kadagiti partaan* a bembendisionannak ni Jehova gapu kenka.”
28 Kinunana pay: “Ibagam ti kayatmo a tangdan ket itedkonto.”+
29 Insungbat ni Jacob: “Ammom a nagserbiak kenka a simamatalek ken immadu dagiti tarakenmo gapu iti panangaywanko.+
30 Bassit laeng ti sanikuam sakbay nga immayak. Ngem ita, nakaad-adun ken bembendisionannaka ni Jehova manipud idi simmangpetak. Kaano ngarud nga asikasuek ti bukodko a pamilia?”+
31 Kalpasanna, kinunana: “Ania ti itedko kenka?” Insungbat ni Jacob: “Saan a kasapulan a tangdanannak! Itultuloyko nga ipastoran ken aywanan dagiti tarakenmo no patgam daytoy a kiddawko.+
32 Mapanta kadagiti tarakenmo ita nga aldaw ket ilasinmo dagiti karnero a turikan ken labang, dagiti urbon a kalakian a karnero a kayumanggi, ken dagiti kabaian a kalding a labang ken turikan. Dagitanto ti agbalin a tangdanko.+
33 Mapaneknekamto a nalintegak* no umaymo kitaen dagiti tangdanko. Dagidiay makitam a saan a turikan ken labang a kabaian a kalding ken saan a kayumanggi nga urbon a kalakian a karnero ket maibilang a natakaw no adda dagita kaniak.”
34 Kinuna ni Laban: “Mayatak iti dayta! Matungpal ti imbagam.”+
35 Iti dayta nga aldaw, inlasin ni Laban dagiti kalakian a kalding a garitan ken labang ken amin a kabaian a kalding a turikan ken labang, aniaman nga animal nga adda purawna ken aniaman nga urbon a kalakian a karnero a kayumanggi, ket impaaywanna dagita kadagiti annakna a lallaki.
36 Kalpasanna, napan ni Laban iti lugar a tallo nga aldaw a pagnaen ti kaadayona. Inaywanan ni Jacob dagiti nabati a taraken ni Laban.
37 Nangala ni Jacob kadagiti kaputputed a sanga dagiti kayo nga estorake, almendro, ken platano. Inukisanna ti dadduma a paset dagiti sanga tapno agparang ti puraw a pasetda
38 sa inkabilna dagita iti pagpainuman kadagiti animal tapno makitada no mapanda uminum. Iti kasta, agmayada iti sanguanan dagiti sanga.
39 No agmaya dagiti animal iti sanguanan dagiti sanga, aganakda iti garitan, turikan, ken labang.
40 Kalpasanna, insina ni Jacob dagiti urbon a kalakian a karnero, sa impasangona ti dadduma pay a taraken ni Laban kadagiti garitan ken amin a kayumanggi nga animal. Inlasinna dagiti bukodna a taraken tapno saanda a maitipon kadagiti taraken ni Laban.
41 Tunggal agmaya dagiti nasalun-at nga animal, ikabil ni Jacob dagiti sanga iti pagpainuman tapno makitada ket agmayada iti sanguanan dagita.
42 Ngem saan a mangikabil kadagiti sanga iti sanguanan dagiti nakapsut nga animal. Gapuna, dagiti nakapsut ti kanayon nga agbalin a kukua ni Laban ket dagiti nasalun-at ti agbalin a kukua ni Jacob.+
43 Ket rimmang-ay ni Jacob iti kasta unay. Naaddaan iti adu a taraken, adipen a lallaki ken babbai, kamelio, ken asno.+
Footnotes
^ Wenno “nangipaidam kenka iti bunga ti aanakam?”
^ Lit., “aganak iti rabaw dagiti tumengko.”
^ Kaipapananna, “Ukom.”
^ Kaipapananna, “Dagiti Pannakigabbok.”
^ Kaipapananna, “Naimbag a Nagbanagan.”
^ Kaipapananna, “Naragsak; Kinaragsak.”
^ Wenno “tangdan ti trabahador.”
^ Kaipapananna, “Isu ti Tangdan.”
^ Kaipapananna, “Awaten.”
^ Lit., “dinengngeg ti Dios ket linuktanna ti aanakanna.”
^ Napaababa a porma ti Josifias, a kaipapananna, “Nayonan (Paaduen) Koma ni Jah.”
^ Wenno “iti ebidensia.”
^ Wenno “napudnoak.”
