Isaias 34:1-17
34 Umasidegkayo ket dumngegkayo, dakayo a nasion,Ken dumngegkayo, dakayo nga ili.
Dumngeg koma ti daga ken dagiti agnanaed iti dayta,Ti daga ken ti amin a bungana.
2 Ta makapungtot ni Jehova iti amin a nasion,+Ken kagurana ti amin nga armadada.+
Dadaelennanto ida;Papatayenna ida.+
3 Maibellengto dagiti mapapatay kadakuada,Ken sumngawto ti bangsit dagiti bangkayda;+Marunawto dagiti bantay gapu iti* darada.+
4 Malungsotto ti amin nga armada ti langit.Ken malukotto ti langit a kas iti maysa a lukot.
Magangonto ti amin nga armadada,A kas iti nagango a bulong a naregreg iti puon ti ubasKen iti kimbet a higos manipud iti kayo a higos.
5 “Ta idiay langit, mabasanto ti espadak iti dara.+
Bumabanto dayta idiay Edom a mangukom,+Kadagiti tattao nga inkeddengko a madadael.
6 Adda espada ni Jehova; mapnonto dayta iti dara.
Mapnonto dayta iti taba,+Iti dara dagiti urbon a kalakian a karnero ken kalding,Iti taba dagiti bato dagiti kalakian a karnero.
Ta adda daton ni Jehova idiay Bozra,Adu a panangpapatay idiay Edom.+
7 Kaduadanto a sumalog dagiti baka,Dagiti urbon a baka ken dagiti napigsa a baka.
Mabasanto ti dagada iti dara,Ken mayuperto ti tapokda iti taba.”
8 Ta adda aldaw a panagibales ni Jehova,+Tawen a panangdusana maigapu iti Sion.+
9 Agbalinto nga alkitran dagiti karayanna,*Ken asupre ti tapokna,Ken sumsumged nga alkitran ti dagana.
10 Saanto a maiddep dayta iti aldaw wenno rabii;Agnanayonto nga agpangato ti asukna.
Agtalinaedto a nadadael iti panaglabas dagiti henerasion;Awanto ti lumasat kenkuana iti agnanayon nga awan inggana.+
11 Tagikuaento dayta ti billit a pelikano ken ti porkupino,Agnaedto iti dayta dagiti atiddog ti lapayagna a kullaaw ken wak.
Iyunnatnanto ti pagrukod a mangipakita a saanton a mapagnaedanKen ti tinnag* a mangipakita a madadaelto.
12 Awanto ti agbalin nga ari kadagiti natan-okna,Ken awanton ti amin a prinsipena.
13 Agtubonto dagiti siit kadagiti napaderan a torrena,Dagiti siitan ken nasiit a ruot kadagiti pagkamanganna.
Agbalinto nga apon dagiti chakal,+Pagyanan dagiti abestrus.
14 Makikaduanto dagiti parsua iti desierto kadagiti agtagtaguob nga animal,Ken ti atap a kalding* ayabannanto ti kakaduana.
Wen, agnaedto ken aginananto sadiay dagiti billit iti rabii.
15 Agumokto sadiay ti uleg ken ukopanna dagiti itlognaKet pessaan ken salaknibannanto dagita.
Wen, aguummongto sadiay dagiti billit a sawi, tunggal maysa agraman ti asawana.
16 Sukimatenyo ti libro ni Jehova ket basaenyo a sipipigsa:
Awanto uray maysa kadakuada ti mapukaw;Addanto amin asawada,Ta ti ngiwat ni Jehova ti nangibilin,Ken ti espirituna ti nangummong kadakuada.
17 Inkeddengna ti bingayda,Ken rinukodna a mismo ti naikeddeng a lugarda.*
Agnanayonto a kukuada dayta;Agnaeddanto iti dayta iti amin a henerasion.
Footnotes
^ Wenno “Agayusto iti bantay ti.”
^ Nalawag a tumukoy iti Bozra, ti kabesera ti Edom.
^ Lit., “dagiti bato.”
^ Wenno mabalin a, “kasla kalding a demonio.”
^ Lit., “biningayna kadakuada babaen ti pagrukod a parteng.”
