Isaias 5:1-30
5 Pangngaasiyo ta palubosandak a kantaak ti ay-ayatekIti kanta maipapan iti patpatgek ken iti kaubasanna.+
Adda kaubasan ti ay-ayatek iti nabunga a bakras ti turod.
2 Kinalina dayta ken inikkatna dagiti bato.
Minulaanna iti nasayaat a nalabaga nga ubas,Nangibangon iti torre iti tengnga dayta,Ken nangaramid iti pagpespesan iti ubas.+
Sa nangnamnama nga agbunga iti nasayaat nga ubas,Ngem nagbunga laeng iti atap nga ubas.+
3 “Dakayo nga agnanaed iti Jerusalem ken dakayo a lallaki ti Juda,Pangngaasiyo ta mangukomkayo iti nagbaetak ken iti kaubasak.+
4 Adda pay kadi masapul nga aramidek iti kaubasakA saanko pay nga inaramid?+
Nangnamnamaak nga agbunga iti nasayaat nga ubas,Ngem apay a nagbunga laeng iti atap nga ubas?
5 Pangngaasiyo ta palubosandak a mangibagaNo anianto ti aramidek iti kaubasak:
Ikkatekto ti aladna,Ket mapuoranto.+
Rebbaekto ti paderna a bato,Ket maipayatpayatto.
6 Pagbalinekto a langalang dayta;+Saanto a maputdan wenno makalian.
Pagtubuanto ti adu a siitan a kayo ken ruot,+Ket bilinekto dagiti ulep a saanda a mangitinnag iti aniaman a tudo.+
7 Ta ti kaubasan ni Jehova a panguluen dagiti armada ket ti sangakabbalayan ti Israel;+Dagiti lallaki ti Juda ket ti pagmulaan* a paggugustona.
Nangnamnama iti kinahustisia,+Ngem awan ti kinahustisia;Nangnamnama iti kinalinteg,Ngem ikkis ti panagpakaasi ti mangmangngegna.”+
8 Kaasi pay dagidiay mangpaadu iti balayda,+Ken dagidiay mangpalawa iti talonda+Agingga nga awanen ti lugarKet dakdakayo laengen ti agnanaed iti daga!
9 Nangngegko nga inkari ni Jehova a panguluen dagiti armadaNga adu a balay, nupay dadakkel ken napipintasda,Ti agbalinto a pagbutbutngan,Nga awan ti agnaed kadagita.+
10 Ta ti uppat nga ektaria* ti kaubasan mangpataudto laeng iti maysa a bat,*Ket ti maysa a homer* ti bin-i mangpataudto laeng iti maysa nga efa.*+
11 Kaasi pay dagidiay nasapa a bumangon tapno uminum iti arak,+Nga agin-inumda agingga iti rabii ken napalalon ti bartekda!
12 Addaanda iti arpa ken dekuerdas nga instrumento,Pandereta, plauta, ken arak iti panagraragsakda;Ngem saanda a bigbigen dagiti aramid ni Jehova,Ket saanda a makitkita ti aramid dagiti imana.
13 Iti kasta, maipan ti ilik iti sabali a dagaGapu iti kinakurang ti pannakaammoda;+Agbisinto dagiti natan-ok a tattaoda,+Ket mawawto ti amin nga umilida.
14 Gapuna, pinalawa ti Tanem* ti bagina*Ken inngangana a permi ti ngiwatna;+Ket dagiti natan-ok,* naariwawa, ken agraragsak a tattaona,Sigurado a maipisokdanto kenkuana.
15 Agdumogto ti tao,Maipababanto ti tao,Ken maipababanto dagiti natangsit.
16 Maitan-okto ni Jehova a panguluen dagiti armada babaen ti panangukomna;*Ti pudno a Dios, Daydiay Nasantuan,+ ipakitananto a nasantuan babaen ti kinalintegna.+
17 Agarabto dagiti urbon a karnero a kasla addada iti pakaipastoranda;Manganto dagiti ganggannaet a residente kadagiti nagpanawan a lugar nga ayan dagiti nalukmeg nga animal.
18 Kaasi pay dagidiay mangguyguyod iti biddutda babaen kadagiti tali ti panangallilawKen iti basolda babaen kadagiti tali ti kareson;
19 Dagidiay agkunkuna: “Papartakenna koma ti ar-aramidenna;Umay koma a dagus tapno makitatayo dayta.
Matungpal koma ti panggep* Daydiay Nasantuan ti IsraelTapno maammuantayo dayta!”+
20 Kaasi pay dagidiay mangibaga a dakes ti naimbag ken naimbag ti dakes,+Dagidiay mangibilang a lawag ti sipnget ken sipnget ti lawag,Dagidiay mangibaga a nasam-it ti napait ken napait ti nasam-it!
21 Kaasi pay dagidiay masirib iti bukodda a mataKen masirib iti bukodda a panangmatmat!+
22 Kaasi pay dagidiay nalaing nga uminum iti arakKen dagiti lallaki a mangipagarup a naturedda ta umin-inumda iti naglalaok a makabartek nga inumen,+
23 Dagidiay mangabsuelto kadagiti dakes gapu iti pasuksok+Ken mangipaidam iti hustisia kadagiti nalinteg!+
24 Isu a madadaeldanto a kas iti pananguram ti apuy iti garamiKen kadagiti nagango a ruot,Malungsotto ti mismo a ramutda,Ket maiwarawaranto dagiti sabongda a kas iti pulbos,Ta linaksidda ti linteg* ni Jehova a panguluen dagiti armada,Ken saanda a rinaem ti sao Daydiay Nasantuan ti Israel.+
25 Dayta ti makagapu a bimmara ti pungtot ni Jehova iti ilina,Ket ilayatnanto ti imana kadakuada ken dusaenna ida.+
Magunggonto dagiti bantay,Ket agbalinto dagiti bangkayda a kas iti basura kadagiti kalsada.+
Maigapu amin kadagitoy, saanna nga imbabawi ti pungtotna,No di ket nakalayat pay laeng ti imana tapno mangdusa.
26 Nangipangato iti senial* iti maysa a nasion iti adayo;+Pinaswitanna ida nga umay manipud kadagiti ungto ti daga;+Ket sipapartak nga um-umayda.+
27 Awan kadakuada ti nabannog wenno natumba.
Awan ti agdudungsa wenno matmaturog.
Saan a limmukay ti sinturon iti siketda,Ken saan a napugsat dagiti kurdon ti sandaliasda.
28 Natirad ti amin a panada,Ken nakabiat* ti amin a baida.
Nakatangtangken ti kuko dagiti kabalioda a kas iti bato,*Ket kas iti angin ti bagyo dagiti pilidda.+
29 Agngerngerda a kas iti leon;Agngerngerda a kas iti urbon a leon.*+
Agungordanto ken tiliwenda ti anupendaKet ipanawda nga awan ti mangisalakan iti dayta.
30 Iti dayta nga aldaw, agungordanto gapu iti inanupdaKas iti daranudor ti baybay.+
Napalalo a kinasipnget ti makitanto ti asinoman a tumaliaw iti daga;Simmipnget pay ketdi ti lawag gapu kadagiti ulep.+
Footnotes
^ Wenno “mula.”
^ Lit., “10 a paris,” kayatna a sawen, ti kadakkel ti talon a maarado ti 10 a paris ti baka iti agmalem.
^ Wenno “nadayag.”
^ Wenno “kararuana.”
^ Wenno “kinahustisiana.”
^ Wenno “desision; balakad.”
^ Wenno “instruksion.”
^ Wenno “pagilasinan a poste.”
^ Wenno “nakasagana a maipana.”
^ Wenno “pamulinawen.”
^ Wenno “burboran a bumaro a leon.”
