Isaias 66:1-24
66 Daytoy ti kinuna ni Jehova:
“Ti langit isu ti tronok, ken ti daga ti pagbatayan ti sakak.+
Ania ngarud a kita ti balay ti ibangonyo para kaniak,+Ken sadino ti lugar a paginanaak?”+
2 “Inaramid ti imak amin dagitoy,Ket kasta ti pannakapaaddada,” kuna ni Jehova.+
“Ngem kumitaakto iti taoA napakumbaba ken agladladingit ti espirituna nga agbuteng* iti saok.+
3 Ti mangparparti iti baka ket kas iti mangkabkabil iti tao.+
Ti agidatdaton iti karnero ket kas iti mangtuktukkol iti tengnged ti aso.+
Ti mangipapaay iti sagut ket kas iti mangidatdaton iti dara ti baboy!+
Ti mangidatdatag iti olibano+ ket kas iti mangbembendision babaen ti sasao ti salamangkero.*+
Pinilida dagiti bukodda a dalan,Ken maragragsakanda iti makarimon a banag.
4 Iti kasta, pumiliakto kadagiti pamay-an a pangdusak kadakuada,+Ket iyegko kadakuada dagiti mismo a pagbutbutnganda.
Gapu ta idi immawagak, awan ti simmungbat;Nagsaoak, ngem awan ti dimngeg.+
Inar-aramidda ti dakes iti imatangko,Ken pinilida nga aramiden ti saanko a pagragsakan.”+
5 Denggenyo ti sao ni Jehova, dakayo nga agbuteng* iti saona:
“Imbaga dagiti kakabsatyo a manggurgura ken mangipupuera kadakayo gapu iti naganko, ‘Maidaydayaw koma ni Jehova!’+
Ngem Isu agparangto ken ipaayannakayo iti rag-o,Ket isudanto ti maibabain.”+
6 Adda ariwawa iti siudad, manipud iti templo!
Ta ipapaay ni Jehova ti dusa a maikari kadagiti kabusorna.
7 Nagpasngay ti babai sakbay a nagpasikal.+
Nangyanak iti lalaki sakbay a nagpaut-ot.
8 Adda kadin nakangngeg iti kasta?
Adda kadin nakakita kadagiti kasta?
Maipasngay kadi ti maysa a pagilian iti maymaysa nga aldaw?
Wenno bigla kadi a mayanak ti maysa a nasion?
Ngem apaman a nagpasikal ti Sion, impasngayna dagiti annakna.
9 “Luktak aya ti aanakan ngem diak palubosan a rummuar ti ubing?” kuna ni Jehova.
“Wenno rikpak aya ti aanakan no rumrummuaren ti ubing?” kuna ti Diosmo.
10 Makipagragsak ken makipagrag-okayo iti Jerusalem,+ dakayo amin a mangay-ayat kenkuana.+
Makipagragsakkayo iti kasta unay, dakayo amin a mangsangsangit kenkuana,
11 Ta sumusokayto kenkuana ket mapnek ken maliwliwakayo,Ken agkunnotkayto ket maragsakankayo iti napalalo a dayagna.
12 Ta daytoy ti kuna ni Jehova:
“Ipaayak ti Sion iti talna a kas iti karayan+Ken iti dayag dagiti nasion a kas iti manglayus a napegges nga ayus,+
Sumuso ken maubbakayto,Ket mapaglagtolagtokayto iti rabaw dagiti tumeng.
13 Kas iti panangliwliwa ti ina iti anakna,Itultuloykayto a liwliwaen;+Ket maliwliwakayto maipapan iti Jerusalem.+
14 Makitayonto daytoy, ket agragsakto ti pusoyo,Tumibkerto dagiti tulangyo a kas iti naganus a ruot.
Ti ima* ni Jehova ket maammuanto dagiti adipenna,Ngem makapungtotto kadagiti kabusorna.”+
15 “Ta umayto ni Jehova a kas apuy,+Ken dagiti karuahena a kas napigsa nga angin,+Tapno sipupungtot a bumales,Ken mangdusa babaen ti apuy.+
16 Ta mangukomto ni Jehova babaen ti apuy,Wen, babaen ti espadana, maibusor iti amin a lasag;*Ket adunto ti mapapatay ni Jehova.
17 “Dagidiay mangisagsagana ken mangdaldalus iti bagida tapno sumrekda kadagiti hardin*+ a sursurotenda ti maysa nga adda iti tengnga, dagidiay mangmangan iti karne ti baboy+ ken narugit a banag ken bao,+ agpatinggadanto amin,” kuna ni Jehova.
18 “Gapu ta ammok dagiti aramid ken pampanunotenda, umayak tapno ummongek dagiti umili ti amin a nasion ken lengguahe, ket umaydanto ken makitada ti dayagko.”
19 “Mangikabilakto iti pagilasinan iti tengngada, ket sumagmamano kadagiti nakatalaw ti ibaonkonto kadagiti nasion—idiay Tarsis,+ Pul, ken Lud,+ dagidiay agibibiat iti pana, idiay Tubal ken Javan,+ ken dagiti adayo nga isla—a saan a nakadamag iti maipapan kaniak wenno nakakita iti dayagko. Ipakaammodanto ti dayagko iti tengnga dagiti nasion.+
20 Iyegdanto amin a kakabsatmo manipud iti amin a nasion+ kas sagut ken Jehova, nga iluganda ida kadagiti kabalio, karuahe, kareson, asno, ken napartak a kamelio agingga iti nasantuan a bantayko, ti Jerusalem,” kuna ni Jehova, “no kasano nga ipan dagiti umili ti Israel iti balay ni Jehova ti sagutda a naikabil iti nadalus a pagkargaan.”
21 “Alaekto met ti dadduma kadakuada nga agbalin a papadi ken Levita,” kuna ni Jehova.
22 “Ta no kasano nga agtalinaed iti sanguanak ti baro a langit ken baro a daga+ nga aramidek,” kuna ni Jehova, “agtalinaedto met ti kaputotanyo* ken ti naganyo.”+
23 “Manipud baro a bulan agingga iti baro a bulan ken manipud sabbath agingga iti sabbath,Umayto agruknoy iti sanguanak* ti amin a lasag,”*+ kuna ni Jehova.
24 “Rummuardanto ket kitaenda ti bangkay dagiti tattao a nagrebelde kaniak;Ta saanto a matay dagiti igges dagita,Ken saanto a maiddep ti apuyda,+Ket agbalindanto a makapasubkar iti amin a tattao.”*
Footnotes
^ Wenno “a maseknan.”
^ Wenno mabalin a, “kas iti mangidaydayaw iti idolo.”
^ Wenno “a maseknan.”
^ Wenno “pannakabalin.”
^ Wenno “amin a tattao.”
^ Kayatna a sawen, dagiti espesial a hardin para iti panagdayaw iti idolo.
^ Lit., “bin-iyo.”
^ Wenno “agdayaw kaniak.”
^ Wenno “amin a tattao.”
^ Lit., “amin a lasag.”
