Jeremias 14:1-22
14 Daytoy ti kinuna ni Jehova ken Jeremias maipapan kadagiti tikag:+
2 Agladladingit ti Juda,+ ken nadadaelen dagiti ruanganna.
Natumbada iti daga gapu iti lidayda,Ken mangngeg iti Jerusalem ti panagsasangitda.
3 Ibaon dagiti amo dagiti adipenda* a mapan agsakdo.
Mapanda kadagiti abut a pagalaan iti danum* ngem awan ti makitada a danum dagita.
Agawidda nga awan nagyan dagiti pagkargaanda.
Mabainan ken madismayada,Ken abbonganda ti uloda.
4 Nagrengngat ngamin ti daga,Ta awan ti tudo,+Nadismaya dagiti agtaltalon ken inabbonganda ti uloda.
5 Baybay-an payen ti kabaian nga ugsa iti talon ti kayyanak nga urbonnaGapu ta awan ti ruot.
6 Agtakder dagiti atap nga asno kadagiti kalbo a turod.
Agal-alda a kas kadagiti chakal;Kumudrep ti panagkitada gapu ta awanen ti mulmula.+
7 Uray no dagiti basolmi ti agtestigo maikontra kadakami,O Jehova, agtignayka maigapu iti naganmo.+
Ta namin-adu a saankami a nagbalin a matalek,+Ken nagbasolkami kenka.
8 O sika a namnama ti Israel, ti Manangisalakan kenkuana+ iti tiempo ti rigat,Apay a kaska la estranghero iti daga,Kas iti biahero nga umyan laeng iti rabii?
9 Apay a kaska la iti nakigtot a lalaki,Kas iti nabileg a lalaki a saan a makaisalakan?
Ta addaka kadakami, O Jehova,+Ken nayawag ti naganmo kadakami.+
Saannakami a baybay-an.
10 Daytoy ti imbaga ni Jehova maipapan kadagitoy a tattao: “Kaykayatda ti agakar-akar;+ saanda a makontrol dagiti sakada.+ Isu a saan a maragsakan kadakuada ni Jehova.+ Ita, lagipenna ti kamalida ken dusaenna ida gapu kadagiti basolda.”+
11 Kalpasanna, imbaga kaniak ni Jehova: “Dimo ikararag a nasayaat ti mapasamak kadagitoy a tattao.+
12 No agayunarda, saanko a denggen dagiti panagpakaasida,+ ken no agidatonda iti sibubukel a daton a mapuoran ken bukbukel, saanak a maragsakan+ ta dadaelekto ida iti espada, nakaro a bisin, ken makapapatay a sakit.”+
13 Gapuna, kinunak: “O Kangatuan* nga Apo Jehova! Kastoy ti ibagbaga kadakuada dagiti propeta: ‘Diyonto mapasaran ti gubat ken nakaro a bisin no di ket mangyegak iti pudno a talna iti daytoy a lugar.’”+
14 Ngem imbaga kaniak ni Jehova: “Ulbod ti ipadpadto dagiti propeta a mangus-usar iti naganko.+ Saanko ida nga imbaon, binilin, wenno kinasarita.+ Agipadpadtoda kadakayo iti saan nga agpayso a sirmata, awan serserbina a padto, ken ti panangallilaw ti pusoda.+
15 Gapuna, daytoy ti imbaga ni Jehova maipapan kadagiti propeta a mangus-usar iti naganko nga agipadto, uray no saanko ida nga imbaon, ken mangibagbaga nga awan ti dumteng a gubat wenno nakaro a bisin iti daytoy a daga: ‘Matayto dagidiay a propeta iti gubat ken nakaro a bisin.+
16 Dagiti met tattao a pagipadpadtuanda ket maibellengto kadagiti kalsada iti Jerusalem gapu iti nakaro a bisin ken gubat. Awanto ti mangitabon kadakuada+ agraman kadagiti assawa ken annakda a lallaki ken babbai, ta iyegko ti didigra a maitutop kadakuada.’+
17 “Masapul nga ibagam daytoy kadakuada,‘Agarubos koma dagiti luak iti aldaw ken rabii, saanda koma nga agsardeng,+Ta ti birhen nga anak a babai ti ilik ket namimpinsan a nadadael ken nadunor,+Ket nakaro ti sugatna.
18 No mapanak iti talon ken kitaek ti aglawlaw,Makitak dagiti natay iti espada!+
Ket no sumrekak iti siudad,Makitak dagiti sakit nga epekto ti nakaro a bisin!+
Ta napan ti propeta ken padi iti lugar a saanda nga ammo.’”+
19 Namimpinsan kadin nga inlaksidmo ti Juda, wenno ginuram ti Sion?+
Apay a dinangrannakami, ket saankamin a mapaimbag?+
Adda namnama a talna, ngem awan ti nasayaat a dimteng,Adda namnama ti pannakapaimbag, ngem buteng ti dimteng!+
20 O Jehova, bigbigenmi ti kinadakesmi,Ken ti kamali dagidi ammami,Ta nagbasolkami kenka.+
21 Maigapu iti naganmo, saannakami nga ilaksid;+Saanmo nga umsien ti nadayag a tronom.
Laglagipem ti tulagmo kadakami ket tungpalem koma.+
22 Makaited aya iti tudo ti asinoman nga awan serserbina a didiosen dagiti nasion,Wenno makaited aya ti langit iti tudo a bukbukodna?
Saan aya a sika laeng ti makaaramid iti daytoy, O Jehova a Diosmi?+
Ken mangnamnamakami kenka,Ta sika laeng ti nangaramid kadagitoy amin a banag.
