Jeremias 24:1-10
-
Nasayaat a higos ken dakes a higos (1-10)
24 Impanaw ni Ari Nabucodonosor* ti Babilonia ni Jeconias*+ nga anak ni Jehoiakim,+ ti ari ti Juda, agraman dagiti prinsipe ti Juda, nalaing a trabahador, ken dagiti latero.* Innalana ida idiay Jerusalem sana impan idiay Babilonia.+ Kalpasan dayta, impakita kaniak ni Jehova ti dua a basket a naglaon iti higos a naikabil iti sango ti templo ni Jehova.
2 Naglaon ti maysa a basket kadagiti nagsasayaat a higos, a kas kadagiti umuna a bunga ti higos, ngem naglaon ti sabali a basket kadagiti nagdakes a higos, nakadakdakes a saan a mabalin a kanen.
3 Kalpasanna, insaludsod kaniak ni Jehova: “Ania ti makitkitam, Jeremias?” Insungbatko: “Higos; nagsasayaat dagiti nasayaat a higos, ngem nagdakes dagiti dakes a higos, nakadakdakes a saan a mabalin a kanen.”+
4 Kinuna kaniak ni Jehova:
5 “Daytoy ti imbaga ni Jehova a Dios ti Israel, ‘Kas kadagitoy nasasayaat a higos, ibilangko a nasayaat dagidiay naipanaw manipud Juda, dagidiay innalak ditoy a lugar nga impanko iti lugar dagiti Caldeo.
6 Kitaekto ti pagsayaatanda ken pagsubliekto ida iti daytoy a lugar.+ Bangonekto ida, ket saanko a rebbaen; imulakto ida, ket saanko a paruten.+
7 Ket ikkakto ida iti puso a makaam-ammo kaniak, a siak ni Jehova.+ Agbalindanto a tattaok, ket agbalinakto a Diosda,+ ta agsublidanto kaniak iti amin a pusoda.+
8 “‘Ngem daytoy ti imbaga ni Jehova maipapan kadagiti nakadakdakes a higos a saan a mabalin a kanen:+ “Ibilangkonto a kasta ni Ari Zedekias+ ti Juda, dagiti prinsipena, ken dagiti nabati iti daga ti Jerusalem, agraman dagidiay agnanaed iti Egipto.+
9 Pagbalinekto ida a nakabutbuteng ken didigra iti amin a pagarian iti daga,+ maum-umsi, malalais, mauy-uyaw, ken mailunlunod+ iti amin a lugar a pangiwarawaraak kadakuada.+
10 Ket iyegkonto kadakuada ti espada,+ nakaro a bisin, ken makapapatay a sakit,+ agingga nga awanton a pulos ti mabati iti daga nga intedko kadakuada ken kadagidi ammada.”’”
Footnotes
^ Lit., “Nabucodorosor,” sabali pay nga ispelingna.
^ Naawagan met iti Jehoiakin ken Conias.
^ Wenno mabalin nga, “agibangbangon iti baluarte.”
