Jeremias 28:1-17
-
Ni Jeremias kontra iti ulbod a propeta a ni Hananias (1-17)
28 Iti dayta met la a tawen, idi rugrugi ti panagturay ni Ari Zedekias+ ti Juda, iti maikapat a tawen, iti maikalima a bulan, kinasaritanak ni propeta Hananias nga anak ni Azur manipud Gibeon.+ Imbagana kaniak idiay balay ni Jehova iti sango ti papadi ken amin nga umili:
2 “Daytoy ti imbaga ni Jehova a panguluen dagiti armada, ti Dios ti Israel, ‘Tukkolekto ti sangol ti panangadipen ti ari ti Babilonia.+
3 Iti uneg ti dua a tawen,* isublik iti daytoy a lugar ti amin nga alikamen ti balay ni Jehova nga innala ni Ari Nabucodonosor ti Babilonia sana impan idi idiay Babilonia.’”+
4 “‘Ket isublik ditoy ni Jeconias+ nga anak ni Jehoiakim,+ ti ari ti Juda, ken amin a naipanaw iti Juda a naipan idiay Babilonia,’+ kuna ni Jehova, ‘ta tukkolekto ti sangol ti panangadipen ti ari ti Babilonia.’”
5 Nakisarita ngarud ni propeta Jeremias ken propeta Hananias iti sango ti papadi ken amin nga umili a sitatakder iti balay ni Jehova.
6 Imbaga ni propeta Jeremias: “Amen!* Aramiden koma dayta ni Jehova! Tungpalen koma ni Jehova ti impadtom ket manipud idiay Babilonia, isublina ditoy dagiti alikamen ti balay ni Jehova ken ti amin a naipanaw nga umili!
7 Ngem pangngaasim ta denggem daytoy a mensahe nga ibagak kenka ken iti amin nga umili.
8 Idi un-unana, dagiti propeta nga immun-una ngem kadata ket nagipadpadto maipapan iti gubat, didigra, ken makapapatay a sakit iti adu a lugar ken dadakkel a pagarian.
9 No maipapan iti talna ti ipadto ti maysa a propeta ket pumayso ti ibagana, mapaneknekan a talaga nga imbaon ni Jehova dayta a propeta.”
10 Inikkat ngarud ni propeta Hananias ti sangol iti tengnged ni Jeremias sana tinukkol.+
11 Ket kinuna ni Hananias iti sango ti amin nga umili: “Daytoy ti kuna ni Jehova, ‘Iti uneg ti dua a tawen, kastoyto ti panangtukkolko iti sangol ti panangadipen ni Ari Nabucodonosor ti Babilonia iti amin a nasion.’”+ Kalpasanna, pimmanawen ni propeta Jeremias.
12 Kalpasan a tinukkol ni propeta Hananias ti sangol nga innalana iti tengnged ni propeta Jeremias, imbaga ni Jehova ken Jeremias daytoy a mensahe:
13 “Mapanmo ibaga ken Hananias, ‘Daytoy ti kuna ni Jehova: “Kayo a sangol ti tinukkolmo,+ ngem mangaramidkanto iti landok a sangol a sukatna.”
14 Ta daytoy ti kinuna ni Jehova a panguluen dagiti armada, ti Dios ti Israel: “Mangikabilakto iti landok a sangol kadagitoy amin a nasion, tapno agserbida ken Ari Nabucodonosor ti Babilonia, ket masapul nga agserbida kenkuana.+ Itedko kenkuana uray dagiti atap nga animal iti tay-ak.”’”+
15 Ket imbaga ni propeta Jeremias ken propeta Hananias:+ “Pangngaasim ta denggem, O Hananias! Saannaka nga imbaon ni Jehova. Inallilawmo dagitoy a tattao tapno mamatida iti ulbod nga imbagam.+
16 Isu a daytoy ti kuna ni Jehova, ‘Kitaem! Ikkatenka iti rabaw ti daga. Ita a tawen, mataykanto, ta insungsongmo dagiti tattao nga agrebelde ken Jehova.’”+
17 Isu a natay ni propeta Hananias iti dayta a tawen, iti maikapito a bulan.
