Jeremias 43:1-13
43 Idi naibagan ni Jeremias iti amin nga umili ti amin nga impakaammo ni Jehova a Diosda, ti tunggal sao nga impaibaga ni Jehova kenkuana nga ibagana kadakuada,
2 ni Azarias nga anak ni Osaias, Johanan+ nga anak ni Karea, ken ti amin a natangsit a lallaki kinunada ken Jeremias: “Saan nga agpayso ti ibagbagam! Saannaka nga imbaon ni Jehova a Diosmi a mangibaga kadakami: ‘Saankayo a mapan agyan idiay Egipto.’
3 Ngem sugsugsogannaka ni Baruk+ nga anak ni Nerias a bumusor kadakami ta kayatnakami a maited kadagiti Caldeo, tapno mapapataykami wenno maipankami idiay Babilonia.”+
4 Isu a ni Johanan nga anak ni Karea, ti amin a pangulo ti armada, ken ti amin nga umili ket simmukir iti bilin ni Jehova nga agtalinaedda iti Juda.
5 Ti amin a nabati iti Juda a naggapu iti amin a nasion a nakaiwarawaraanda tapno agyanda iti Juda ket innala ketdi ni Johanan nga anak ni Karea ken ti amin a pangulo ti armada.+
6 Innalada dagiti lallaki, babbai, ubbing, annak a babbai ti ari, ken amin* nga impaaywan ni Nabuzaradan+ a panguluen dagiti guardia ken ni Gedalias+ nga anak ni Ahikam+ nga anak ni Safan,+ agraman ni propeta Jeremias ken ni Baruk nga anak ni Nerias.
7 Ket napanda idiay Egipto ken nakadanonda idiay Tapanhes,+ ta saanda a nagtulnog ken Jehova.
8 Kalpasanna, kinuna ni Jehova ken Jeremias idiay Tapanhes:
9 “Mangalaka iti dadakkel a bato ket ilemmengmo dagita iti ladrilio a beranda iti pagserkan ti balay ni Faraon idiay Tapanhes sa gaburam iti namasa a semento iti sango dagiti lallaki a Judio.
10 Ibagam kadakuada, ‘Daytoy ti imbaga ni Jehova a panguluen dagiti armada, ti Dios ti Israel: “Ibaonko ti adipenko+ a ni Nabucodonosor* nga ari ti Babilonia ket ikabilko ti tronona iti mismo a rabaw dagiti bato nga impailemmengko, ket isaknapna ti nadayag a toldana kadagita.+
11 Umaynanto rauten ti Egipto.+ Patayennanto iti makapapatay a sakit dagiti nairanta a matay iti makapapatay a sakit, ipanawnanto dagiti nairanta a maipanaw, ken patayennanto iti espada dagidiay nairanta a matay iti espada.+
12 Puorakto ti balbalay* dagiti didiosen iti Egipto ken puorannanto dagita.+ Ipanawnanto met dagita a didiosen. No kasano a laklakaen ti pastor nga isuot ti badona, laklakaennanto met a sakupen ti Egipto, ket pumanaw sadiay a sitatalna.*
13 Ket rumekrumekennanto dagiti adigi ti Bet-semes,* nga adda idiay Egipto, ket puorannanto ti balbalay* dagiti dios ti Egipto.”’”
Footnotes
^ Wenno “amin a kararua.”
^ Lit., “Nabucodorosor,” sabali pay nga ispelingna.
^ Wenno “dagiti templo.”
^ Wenno “di maan-ano.”
^ Wenno “Balay (Templo) ti Init,” kayatna a sawen, ti Heliopolis.
^ Wenno “dagiti templo.”
