Job 34:1-37
34 Intuloy ni Elihu ti sungbatna:
2 “Imdenganyo dagiti ibagak, dakayo a masirib;Denggendak, dakayo a nagadu ti ammona.
3 Ta ti sasao ket suboken ti lapayagA kas iti panangraman ti dila* iti makan.
4 Subokentayo no ania ti umiso;Pagnunumuantayo no ania ti nasayaat.
5 Ta imbaga ni Job, ‘Addaak iti umiso,+Ngem saannak nga impakitaan ti Dios iti hustisia.+
6 Agulbodak kadi, nga ibagak a diak maikari iti desision a pabor kaniak?
Saan a maagasan ti sugatko uray no awan ti basolko.’+
7 Adda kadi tao a kas ken Job,A kasla danum nga inumenna dagiti insulto?
8 Makikadkadua kadagiti agar-aramid iti di umisoKen makikuykuyog kadagiti dakes a tattao.+
9 Ta imbagana, ‘Awan ti magunggona ti taoIti panangikagumaanna a mangparagsak iti Dios.’+
10 Denggendak ngarud, dakayo a lallaki nga adda pannakaawatna:*
Imposible nga agaramid ti pudno a Dios iti dakes,+Ken saan nga agaramid ti Mannakabalin-amin iti di umiso!+
11 Ta gunggonaanna ti tao sigun iti ar-aramidenna+Ken ipalak-amna dagiti resulta ti dalanna.
12 Ta sigurado a saan nga agaramid ti Dios iti dakes;+Saan a killuen ti Mannakabalin-amin ti hustisia.+
13 Asino ti nangisaad kenkuana a mangaywan iti daga,Ken asino ti nangipatugaw kenkuana a mangituray iti intero a lubong?*
14 No ipakitana a kagurana dagiti tattao,No ikkatenna ti espiritu ken angesda,+
15 Matay la ketdi ti amin a tattao,*Ken agsubli ti sangatauan iti tapok.+
16 Isu a no adda pannakaawatmo, imdengam daytoy;Denggem a naimbag ti ibagak.
17 Rumbeng aya nga agturay ti manggurgura iti hustisia,Wenno akusaram aya ti maysa a nalinteg nga adda pannakabalinna?
18 Ibagam aya iti maysa nga ari, ‘Awan serserbim,’
Wenno kadagiti natan-ok, ‘Nagdadakeskayo’?+
19 Adda Maysa a saan a mangidumduma kadagiti prinsipeKen patas ti panangtratona kadagiti nabaknang ken napanglaw,*+Ta isuda amin ket inaramid dagiti imana.+
20 Mabalin a bigla a matayda+ iti tengnga ti rabii;+Agkuyegyegda ken magsat ti angesda;Uray dagiti mannakabalin ket maikkat, ngem saan a babaen ti ima ti tattao.+
21 Ta kitkitaen ti mata ti Dios dagiti aramid ti tao,+Ken makitkitana ti amin nga addang ti tao.
22 Awan ti nasipnget wenno kasta unay a kinasipngetA mabalin a paglemmengan dagiti agar-aramid iti dakes.+
23 Ta saan a nangikeddeng ti Dios iti tiempoA sumango kenkuana ti asinoman a tao tapno maukom.
24 Dadaelenna dagiti mannakabalin a dinan kasapulan ti agimbestigar,Ket pagtugawenna dagiti sabsabali iti puestoda.+
25 Ta ammona dagiti ar-aramidenda;+Parmekenna ida iti rabii, ket madadaelda.+
26 Kabilenna ida gapu iti kinadakesda,Iti lugar a makita ti amin;+
27 Timmallikudda ngamin ken saandan a simmurot kenkuana+Ken saandan nga ikabkabilangan dagiti dalanna;+
28 Gapu kadagiti aramidda, umas-asug kenkuana dagiti napanglaw;Isu a denggenna ti panagpatulong dagiti nakakaasi.+
29 Ngem no saan nga agtignay ti Dios, asino ti mangakusar kenkuana?
No tumallikud, iti man nasion wenno tao, asino ti makakita kenkuana?
Agpapadada amin a saan a makakita kenkuana,
30 Tapno saan nga agturay ti rebelioso* a tao+Wenno mangsilo kadagiti tattao.
31 Adda aya asinoman a mangibaga iti Dios,‘Madusdusaak uray no awan ti basolko;+
32 Isurom kaniak dagiti saanko a maawatan;No nagkamaliak, saankonton nga ul-uliten’?
33 Rumbeng kadi a gunggonaannaka a kas iti kayatmo idinto ta konkontraem ti desisionna?
Masapul a sika ti agdesision, saan a siak.
Isu nga ibagam kaniak ti pagaammom unay.
34 Ibaganto kaniak dagiti tattao nga addaan iti pannakaawat*—Asinoman a masirib a dumdumngeg kaniak—
35 ‘Agsasao ni Job nga awan ammona,+Ket ipakita dagiti ibagbagana a kurang ti pannakaawatna.’
36 Masubok koma ni Job* agingga a kabaelannaGapu ta dagiti sungbatna ket kas kadagidiay managdakdakes!
37 Naynayonanna ti basolna iti panagrebelde;+Makapainsulto ti panagpalakpakna iti sangotayoKen nagadu ti iyak-akusarna iti pudno a Dios!”+
Footnotes
^ Lit., “ngadas.”
^ Lit., “pusona.”
^ Wenno “iti mapagnaedan a daga.”
^ Lit., “lasag.”
^ Wenno “natan-ok ken nanumo.”
^ Wenno “apostata.”
^ Lit., “puso.”
^ Wenno mabalin nga, “Amak, masubok koma ni Job.”
