Josue 18:1-28
18 Idi naparmeken dagiti Israelita ti daga,+ nagtitiponda amin idiay Shilo,+ ket impatakderda sadiay ti tolda a pagkonsultaan.+
2 Ngem adda pay pito a tribu iti Israel a saan pay a naited ti tawidda.
3 Isu a kinuna ni Josue kadagiti Israelita: “Apay a dikay pay napan nagyan iti daga nga inted kadakayo ni Jehova a Dios dagidi ammayo?+
4 Mangibaonkayo kaniak iti tallo a lallaki iti tunggal tribu. Ibaonko ida a mangkita ken mangsursor iti daga ken mangaramid iti mapa maitunos iti tawidda. Kalpasanna, agsublidanto kaniak.
5 Masapul a bingayenda iti pito a paset.+ Agtalinaedto ti Juda iti teritoriana iti abagatan,+ ket agtalinaedto ti pamilia ni Jose iti teritoriada iti amianan.+
6 Bingaybingayenyo ti daga iti pito a paset ken iyaramidanyo iti mapa sa iyegyonto kaniak. Kalpasanna, bunotekto+ iti sanguanan ni Jehova a Diostayo ti agbalin a tawidyo.
7 Ngem saanto a maikkan dagiti Levita iti bingay iti dagayo,+ ta ti tawidda ket ti panagbalinda a padi para ken Jehova.+ Naiteden ti daya ti Jordan kas tawid ni Gad, Ruben, ken ti kagudua ti tribu ni Manases,+ nga inted kadakuada ni Moises nga adipen ni Jehova.”
8 Nagrubbuat dagiti lallaki a naibaon a mapan mangaramid iti mapa, ket imbilin ni Josue kadakuada: “Sursorenyo ti daga ken iyaramidanyo iti mapa. Kalpasanna, agsublikayto kaniak, ket ditoy Shilo+ a bunotekto ti tawidyo iti sanguanan ni Jehova.”
9 Gapuna, napanda sinursor ti daga sada biningay iti pito a paset, ken inlistada dagiti siudadna. Kalpasanna, nagsublida ken Josue iti kampo idiay Shilo.
10 Sadiay nga imbunotan ida ni Josue iti sanguanan ni Jehova.+ Biningbingayna ti daga nga impatawidna kadagiti tribu ti Israel.+
11 Ti umuna a nabunot ket ti daga a para iti tribu ni Benjamin sigun kadagiti pamiliada. Ti naitumpong a teritoriada ket adda iti nagbaetan ti teritoria ti Juda+ ken teritoria dagiti kaputotan ni Jose.+
12 Mangrugi iti Jordan ti pagpatinggaan ti teritoriada iti amianan sa agpaamianan iti igid ti Jerico+ ken sumang-at iti bantay iti laud, ken agtultuloy iti let-ang iti Bet-aven.+
13 Nagdirdiretso dayta agingga idiay Luz, iti makin-abagatan nga igid ti Luz, kayatna a sawen, ti Bethel;+ sa sumalog agingga iti Atarot-addar+ iti rabaw ti bantay iti abagatan ti Makimbaba a Bet-horon.+
14 Ti pagpatinggaan ti teritoria ket aglikaw nga agpaabagatan iti bantay a sumango iti Bet-horon iti abagatan sa agtultuloy nga agturong idiay Kiriat-baal, kayatna a sawen, ti Kiriat-jearim,+ a maysa a siudad iti daga ti tribu ni Juda. Dayta ti pagpatinggaan ti teritoria iti laud.
15 Ti makin-abagatan a pagpatinggaan ti teritoria ket mangrugi iti igid ti Kiriat-jearim, sa agdirdiretso nga agpalaud a rummuar iti ubbog iti Neftoa.+
16 Sumalog dayta iti puon ti bantay a sumango iti Tanap ti Anak ni Hinnom,+ nga adda iti Tanap* ti Refaim+ iti amianan, ken agdirdiretso iti Tanap ti Hinnom sa lumasat iti igid ti teritoria dagiti Jebuseo+ iti abagatan, ken sumalog iti En-rogel.+
17 Agturong nga agpaamianan agingga idiay En-semes sa rummuar idiay Gelilot, iti sango ti sang-atan ti Adumim,+ ken sumalog agingga iti bato+ ni Bohan+ nga anak ni Ruben.
18 Agtultuloy dayta iti makin-amianan nga igid ti bantay iti sango ti Araba sa bumaba agingga iti Araba.
19 Agdirdiretso iti makin-amianan nga igid ti Bet-hogla,+ sa agpatingga iti makin-amianan nga igid ti Asin a Baybay*+ iti sabangan ti Jordan iti abagatan. Dayta ti pagpatinggaan ti teritoria iti abagatan.
20 Ti Jordan ti agserbi a pagpatinggaan ti teritoria iti daya. Dagita ti pagpatinggaan ti teritoria ti intero a daga a tawid dagiti pamilia iti tribu ni Benjamin.
21 Dagitoy ti siudad dagiti pamilia iti tribu ni Benjamin: Jerico, Bet-hogla, Emek-keziz,
22 Bet-araba,+ Zemaraim, Bethel,+
23 Avim, Para, Ofra,
24 Kefar-ammoni, Ofni, ken Geba+—12 a siudad agraman dagiti purokda.
25 Ti Gibeon,+ Rama, Beerot,
26 Mizpe, Kefira, Moza,
27 Rekem, Irpeel, Tarala,
28 Zelah,+ Ha-elef, Jebusi, kayatna a sawen, ti Jerusalem,+ Gibea,+ ken Kiriat—14 a siudad agraman dagiti purokda.
Dayta ti tawid dagiti pamilia iti tribu ni Benjamin.
