Ebanghelio ni Marcos 13:1-37
13 Idi rumrummuarda iti templo, imbaga ti maysa nga adalanna: “Mannursuro, kitaem! Nagpipintas dagiti bato ken pasdek!”+
2 Ngem kinuna ni Jesus: “Makitam kadi dagita a dadakkel a pasdek? Awanto a pulos ti bato nga agtalinaed iti bato a nakaituonanna, marpuogdanto amin.”+
3 Bayat nga agtugtugaw idiay Bantay Dagiti Olibo a matantannawaganna ti templo, inasitgan da Pedro, Santiago, Juan, ken Andres, ket insaludsodda:
4 “Ibagam kadakami, kaanonto a mapasamak dagita, ken anianto a pagilasinan ti mangipakita a dandanidan agpatingga?”+
5 Isu a kinuna ni Jesus: “Agannadkayo nga awan koma ti mangallilaw kadakayo.+
6 Adunto ti mangusar iti naganko, nga ibagbagada, ‘Siak daydiay,’ ket adunto ti maallilawda.
7 Ken inton makadamagkayo kadagiti gubat, dikay agdanag; masapul a mapasamak dagitoy, ngem saan pay a panungpalan.+
8 “Ta bumusorto ti nasion iti sabali a nasion ken ti pagarian iti sabali a pagarian;+ aggingginedto iti nadumaduma a lugar; addanto met bisin.+ Dagitoy ti pangrugian dagiti rigat.+
9 “Ngem agannadkayo. Idarumdakayto dagiti tattao kadagiti korte,+ ket masapsaplitkayto kadagiti sinagoga+ ken ipandakayto kadagiti gobernador ken ari gapu kaniak ket ipakaammoyonto kadakuada ti maipapan kaniak.+
10 Masapul met a maikaskasaba nga umuna ti naimbag a damag iti amin a nasion.+
11 Ket inton arestuendakayo, dikay madanagan no ania ti sawenyo; ngem aniaman a maited kadakayo iti dayta nga oras, isunto ti ibagayo, ta saanto a dakayo ti agsao no di ket ti nasantuan nga espiritu.+
12 Ti maysa a tao ipapataynanto met ti mismo a kabsatna, ken kastanto met ti aramiden ti ama iti anakna. Busorento dagiti annak dagiti nagannakda ken ipapataydanto ida.+
13 Ket guraendakayto ti amin a tattao gapu iti naganko.+ Ngem ti makapagibtur* agingga iti panungpalan,+ maisalakanto.+
14 “Ngem inton makitayo ti makarimon a banag a mangdadael,+ nga agtaktakder iti dina rumbeng a pagtakderan (tarusan koma ti agbasa ti kaipapanan daytoy), dagidiay adda idiay Judea agkamangda koman iti kabambantayan.+
15 Asinoman nga adda iti tuktok ti balay umulog koman ken saanen a sumrek iti balayna a mangala iti aniaman;
16 ket asinoman nga adda iti talon saan koman nga agawid a mapan mangala iti kagayna.
17 Kaasi pay dagiti masikog ken agpaspasuso kadagita nga aldaw!+
18 Ikarkararagyo a saan koma a mapasamak daytoy iti tiempo ti lam-ek;
19 ta kadagidiay nga aldaw, dumtengto ti rigat+ a saan pay a napaspasamak manipud idi panangrugi ti panamarsua ti Dios agingga iti dayta a tiempo, ken dinto met mauliten.+
20 Kinapudnona, no saan a paababaen ni Jehova* dagita nga aldaw, awan ti maisalakan. Ngem paababaenna dagita gapu kadagiti napili.+
21 “Kasta met, no addanto mangibaga, ‘Kitaenyo! Adda ditoy ti Kristo,’ wenno, ‘Kitaenyo! Adda sadiay,’ diyo patpatien.+
22 Ta addanto dagiti sinsinan Kristo ken ulbod a propeta+ ket agaramiddanto kadagiti pagilasinan ken nakaskasdaaw a bambanag tapno padasenda nga iyaw-awan dagidiay napili.
23 Agannadkayo ngarud.+ Nasaksakbay nga imbagak aminen kadakayo.
24 “Ngem kadagidiay nga aldaw, kalpasan dayta a rigat, agsipngetto ti init, saanto nga agraniag ti bulan,+
25 ken matnagto dagiti bituen ti langit, ken magunggonto dagiti pannakabalin nga adda iti langit.
26 Kalpasanna, makitadanto ti Anak ti tao+ nga um-umay kadagiti ulep nga addaan dakkel a pannakabalin ken dayag.+
27 Ibaonnanto dagiti anghel ket ummongenda dagiti pinilina manipud iti uppat nga angin, manipud iti ungto ti daga agingga iti ungto ti langit.+
28 “Adda masursuroyo iti ilustrasion maipapan iti kayo a higos: No agbulongen dagiti naganus a sangana, ammoyo a dandanin ti kalgaw.+
29 Isu nga inton makitayo a mapaspasamaken dagitoy a banag, masiguradoyo nga isu ket asidegen iti ridaw.+
30 Pudno kunak kadakayo a saanto a pulos lumabas daytoy a henerasion agingga a mapasamak amin dagitoy a banag.+
31 Agpukaw man ti langit ken daga,+ agtalinaedto latta dagiti saok.+
32 “No maipapan iti dayta nga aldaw wenno oras, awan ti makaammo, uray dagiti anghel idiay langit wenno ti Anak, no di laeng ti Ama.+
33 Agtultuloykayo a nasiput, agtultuloykayo a siririing,+ ta diyo ammo no kaano ti naikeddeng a tiempo.+
34 Mayarig dayta iti tao a napan iti sabali a pagilian. Sakbay a pimmanaw, intalekna kadagiti adipenna ti balayna+ ken imbagana ti obraen ti tunggal maysa, ken binilinna ti parabantay iti ruangan nga itultuloyna ti agbantay.+
35 Isu nga itultuloyyo ti agbantay ta diyo ammo no kaano a sumangpet ti makimbalay,+ no iti rabii wenno iti tengnga ti rabii wenno sakbay nga aglawag* wenno iti bigbigat,+
36 tapno inton bigla a sumangpet, dinakayo madanonan a matmaturog.+
37 Ngem ti ibagak kadakayo, ibagak iti amin: Itultuloyyo ti agbantay.”+
