Ebanghelio ni Marcos 14:1-72
-
Plano dagiti papadi a mangpapatay ken Jesus (1, 2)
-
Naibukbok ken Jesus ti nabanglo a lana (3-9)
-
Traidoren ni Judas ni Jesus (10, 11)
-
Ti maudi a Paskua (12-21)
-
Mairugi ti Pangrabii ti Apo (22-26)
-
Naipadto ti panaglibak ni Pedro (27-31)
-
Agkararag ni Jesus idiay Getsemani (32-42)
-
Naaresto ni Jesus (43-52)
-
Mabista iti Sanhedrin (53-65)
-
Ilibak ni Pedro ni Jesus (66-72)
14 Dua laengen nga aldaw sakbay ti Paskua+ ken ti Piesta ti Tinapay nga Awan Lebadurana.+ Mangbirbirok dagiti panguluen a papadi ken dagiti eskriba iti nasikap a pamay-an tapno matiliw* ken mapatayda ni Jesus;+
2 ta ibagbagada: “Ditay iranrana iti piesta; amangan no mangriribuk dagiti tattao.”
3 Idiay Betania, bayat a mangmangan* iti balay ni Simon nga agkukutel, immay ti maysa a babai a nangitugot iti alabastro a pagkargaan iti nakanginngina a nabanglo a lana, a puro a nardo. Linuktanna dayta sana imbukbok iti ulo ni Jesus.+
4 Nakapungtot ti dadduma isu nga imbagada iti maysa ken maysa: “Apay a sinayangna ti nabanglo a lana?
5 Ta mabalin koma a nailako iti nasurok a 300 a denario* sa naited ti kuarta kadagiti napanglaw!” Isu a kasta unay ti pungtotda iti* babai.
6 Ngem kinuna ni Jesus: “Bay-anyo. Apay a kasta ti ibagbagayo maipapan kenkuana? Nagsayaat ti inaramidna kaniak.+
7 Ta kanayon a kaduayo dagiti napanglaw,+ ken mabalinyo ti agaramid iti nasayaat kadakuada, kaanoman a kayatyo. Ngem saan a kanayon a kaduadak.+
8 Inaramidna ti kabaelanna; binukbokanna ti bagik iti nabanglo a lana sakbay ti pannakaitabonko.+
9 Pudno kunak kadakayo, sadinoman a pakaikasabaan ti naimbag a damag iti intero a lubong,+ maipadamagto met ti inaramid daytoy a babai kas pakalaglagipan kenkuana.”+
10 Ni Judas Iscariote, a maysa kadagiti Sangapulo ket Dua, ket napan kadagiti panguluen a papadi tapno traidoren ken iyawatna ni Jesus kadakuada.+
11 Idi nangngegda ti imbagana, naragsakanda ket inkarida nga ikkanda iti pirak a kuarta.+ Isu a nagbirbirok ni Judas iti gundaway a mangtraidor kenkuana.
12 Iti umuna nga aldaw ti Piesta ti Tinapay nga Awan Lebadurana,+ gapu ta nakaugalianda ti agidaton para iti Paskua,+ insaludsod dagiti adalanna: “Sadino ti kayatmo a pangisaganaanmi iti pangrabii ti Paskua?”+
13 Isu nga imbaonna ti dua kadagiti adalanna ket imbagana: “Mapankayo iti siudad, ket sabtennakayto ti lalaki a nakaawit iti karamba ti danum. Surotenyo,+
14 ket sadinoman ti sumrekanna, ibagayo iti makimbalay, ‘Ipaspasaludsod ti Mannursuro: “Ayan ti kuarto para kadagiti bisita a mabalin a panganak iti pangrabii ti Paskua a kadua dagiti adalak?”’
15 Ket ipakitananto ti nalawa a makinngato a kuarto a nakasagana ken kompleton kadagiti kasapulan. Isaganayo sadiay ti pangrabiitayo.”
16 Isu a napan dagiti adalan ken simrekda iti siudad. Nasarakanda dayta a kas iti imbagana, ket nagsaganada para iti Paskua.
17 Idi rumabiin, simmangpet sadiay a kaduana ti Sangapulo ket Dua.+
18 Bayat a nakasadagda iti lamisaan, kinuna ni Jesus: “Pudno kunak kadakayo, maysa kadakayo a makipangpangan kaniak ti mangtraidorto kaniak.”+
19 Naladingitanda ket kinuna ti tunggal maysa kenkuana: “Saan a siak, di ngamin?”
20 Kinunana kadakuada: “Maysa kadakayo a Sangapulo ket Dua, daydiay makisawsawsaw kaniak iti malukong.+
21 Ta pumanawto ti Anak ti tao, kas iti naisurat maipapan kenkuana, ngem kaasi pay ti mangtraidor iti Anak ti tao!+ Nasaysayaat no saan koman a nayanak.”+
22 Bayat a mangmanganda, nangala iti tinapay, dimmawat iti pamendision, pinispisina, sa intedna kadakuada, ket kinunana: “Mangalakayo; daytoy ti mangisimbolo iti bagik.”+
23 Kalpasanna, nangala iti kopa, nagyaman iti Dios, sa intedna kadakuada, ket imminumda amin iti dayta.+
24 Imbagana kadakuada: “Daytoy ti mangisimbolo iti darak+ nga isu ti ‘dara ti tulag,’+ a maibukbok para iti adu.+
25 Pudno kunak kadakayo, diakto uminumen iti arak ti ubas agingga nga uminumak iti baro nga arak iti Pagarian ti Dios.”
26 Kalpasan a nagkantada iti panangidaydayaw,* napanda iti Bantay Dagiti Olibo.+
27 Ket imbaga ni Jesus: “Maitibkolkayto amin, ta naisurat, ‘Patayekto ti pastor,+ ket mawarawaranto dagiti karnero.’+
28 Ngem kalpasan a mapagungarak, umun-unaakto ngem dakayo a mapan idiay Galilea.”+
29 Ngem kinuna ni Pedro: “Uray maitibkolda amin, saanakto a pulos a maitibkol.”+
30 Isu a kinuna ni Jesus: “Pudno kunak kenka ita, sakbay ti maikadua a panagtaraok ti kawitan ita a rabii, namitlonton nga inlibaknak.”+
31 Ngem impatangken ni Pedro: “Uray pay pakatayak, dikanto pulos ilibak.” Kasta met laeng ti imbaga ti dadduma.+
32 Nakadanonda iti lugar a maawagan Getsemani, ket kinunana kadagiti adalanna: “Agtugawkayo ditoy bayat nga agkararagak.”+
33 Inkuyogna da Pedro, Santiago, ken Juan.+ Kasta unay ti ladingitna* ken nariribukan unay.
34 Imbagana kadakuada: “Napalalo ti ladingitko.+ Ditoykayo laeng, ket itultuloyyo ti agbantay.”+
35 Immadayo bassit, nagrukob sa inkararagna a no mabalin, malisianna koma ti pakaipasanguanna a rigat.
36 Kinunana: “Abba,* Ama,+ amin a banag ket posible kenka; ikkatem kaniak daytoy a kopa. Ngem saan a ti kayatko ti matungpal, no di ket ti kayatmo.”+
37 Idi agsubli, nadanonanna ida a matmaturog isu a kinunana ken Pedro: “Simon, matmaturogka? Awan kadin ti pigsam nga agtultuloy nga agbantay iti maysa nga oras?+
38 Itultuloyyo ti agbantay ken itultuloyyo ti agkararag, tapno saankayo a masulisog.+ Ta magagaran* ti espiritu, ngem nakapuy ti lasag.”+
39 Pimmanaw manen tapno agkararag, ket inulitna ti isu met la a banag.+
40 Idi nagsubli, nadanonanna manen ida a matmaturog, ta makaturturogda la unay, isu a dida ammo no ania ti ibagada kenkuana.
41 Iti maikatlo a panagsublina, imbagana kadakuada: “Saan nga ita ti tiempo a maturog ken aginanakayo! Husto daytan! Daytoyen ti oras!+ Adtoy! Matraidor ken mayawaten ti Anak ti tao kadagiti managbasol.
42 Tumakderkayo, intayon. Adtoy! Addan ti mangtraidor kaniak!”+
43 Agsasao pay laeng idi dimteng ni Judas, a maysa kadagiti Sangapulo ket Dua. Adu ti kaduana a nakaiggem iti espada ken pang-or nga imbaon dagiti panguluen a papadi, eskriba, ken panglakayen.+
44 Kastoy ti napagaanamongan a pagilasinan nga imbaga kadakuada ti mangtraidor kenkuana: “Asinoman nga agepak, isu daydiay; tiliwenyo, alaenyo. Guardiaanyo a naimbag.”
45 Immasideg a dagus ni Judas ket kinunana: “Rabbi!” sa inagepanna a sidudungngo.
46 Isu a tiniliw ken innalada ni Jesus.
47 Ngem inasut ti maysa kadagiti agtaktakder sadiay ti espadana sa piningasna ti lapayag ti adipen ti nangato a padi.+
48 Ngem nagsao ni Jesus: “Umaydak kadi tiliwen a kas iti mannanakaw ta nangitugotkayo pay kadagiti espada ken pang-or?+
49 Inaldaw a makadkaduadak idi idiay templo bayat a mangisursuroak,+ ngem didak tiniliw. Ngem mapasamak daytoy tapno matungpal ti Kasuratan.”+
50 Nagpapanaw amin nga adalan ket binaybay-anda ni Jesus.+
51 Ngem adda agtutubo a lalaki a nakabado laeng iti lienso a lupot a simmurot kenkuana iti asideg, ket pinadasda a tiliwen,
52 ngem nakalapsut ket nabati ti lienso a badona isu a nagtartaray a nakaussob.*
53 Impanda ni Jesus iti nangato a padi,+ ket naguummong ti amin a panguluen a papadi, panglakayen, ken eskriba.+
54 Ngem simmursurot ni Pedro iti saan unay nga adayo, agingga iti paraangan ti nangato a padi. Nakikatugaw kadagiti agserserbi iti balay ken nagin-inudo iti sango ti narangrang nga apuy.+
55 Nagbirbirok dagiti panguluen a papadi ken ti intero a Sanhedrin iti pammaneknek kontra ken Jesus tapno mapapatayda, ngem awan ti nakitada.+
56 Agpayso nga adu ti nagtestigo maibusor kenkuana+ ngem saan nga agtutunos ti pammaneknekda.
57 Adda met dagiti immay nagreklamo ken nagtestigo maibusor kenkuana nga ibagbagada:
58 “Nangngegmi nga ibagbagana, ‘Rebbaekto daytoy a templo nga inaramid dagiti ima, ket iti tallo nga aldaw, mangbangonakto iti sabali a saan nga inaramid dagiti ima.’”+
59 Ngem uray pay imbagada ti kasta, saan nga agtutunos ti pammaneknekda.
60 Iti kasta, timmakder ti nangato a padi iti tengngada ket insaludsodna ken Jesus: “Awan kadi ti maisungbatmo? Ania ti makunam kadagitoy nga ipabpabasolda kenka?”+
61 Ngem saan a nagun-uni ken saan a pulos a simmungbat.+ Isu a sinaludsodan manen ti nangato a padi: “Sika kadi ti Kristo nga Anak ti Nasantuan a Dios?”
62 Kinuna ni Jesus: “Wen, siak. Ket makitayonto ti Anak ti tao+ a nakatugaw iti makannawan+ Daydiay Mannakabalin ken um-umay kadagiti ulep ti langit.”+
63 Gapuna, pinigis ti nangato a padi ti badona ket kinunana: “Kasapulantay pay kadi dagiti testigo?+
64 Nangngegyo ti imbagana maibusor iti Dios. Ania ti desisionyo?” Inkeddengda amin a maikari ni Jesus a matay.+
65 Adda dagidiay nangtupra kenkuana+ ken nangabbong iti rupana sa dinandanogda nga ibagbagada: “No propetaka, ibagam man no asino ti nangkabil kenka?” Kalpasan a tinungpatungpa dagiti katulongan iti pangukoman, innaladan nga impanaw.+
66 Idi adda ni Pedro iti baba iti paraangan, immay ti maysa kadagiti babbai nga adipen ti nangato a padi.+
67 Idi makitana ni Pedro nga agin-inudo, miningminganna, sana kinuna: “Uray sika, nakikadkaduaka met idi iti daytoy Jesus a Nazareno.”
68 Ngem inlibakna ket kinunana: “Diak am-ammo ken diak maawatan ti ibagbagam,” sa napan iti ruangan.*
69 Nakita sadiay ti adipen a babai ket imbagana manen kadagiti agtaktakder: “Maysa kadakuada daytoy a lalaki.”
70 Naglibak manen ni Pedro. Ngem imbaga met kenkuana dagiti agtaktakder sadiay: “Saankan nga aglibak a maysaka kadakuada, ta taga-Galilea-ka met.”
71 Ngem nagilunod ken nagsapata: “Diak am-ammo dayta tao nga ibagbagayo!”
72 Dagus a nagtaraok ti kawitan iti maikadua a daras+ ket nalagip ni Pedro ti imbaga ni Jesus: “Sakbay ti maikadua a panagtaraok ti kawitan, namitlonton nga inlibaknak.”+ Ket dinan nalapdan ti nagsangit.
Footnotes
^ Wenno “maaresto.”
^ Wenno “nga agsadsadag iti lamisaan.”
^ Wenno “pinagsasawanda ti.”
^ Wenno “salmo.”
^ Wenno “Nagdanag.”
^ Hebreo wenno Aramaiko a sao a kaipapananna, “O Ama!”
^ Wenno “situtulok.”
^ Wenno “nga awan ti makinngato a badona.”
^ Wenno “pagserkan.”
