Ebanghelio ni Marcos 9:1-50

I-PLAY

Panagbalbaliw ti langa ni Jesus (1-13)
Napaimbag ti ubing a linuganan ti demonio (14-29)
- Amin a banag ket mabalin para iti tao nga addaan pammati (23)
Naipakpakauna manen ti ipapatay ni Jesus (30-32)
Pagsusupiatan dagiti adalan no asino ti katan-okan (33-37)
Kaduatayo ti saan a bumusor kadatayo (38-41)
Dagiti pakaitibkolan (42-48)
“Agbalinkayo a kas iti asin” (49, 50)

9 Imbagana pay kadakuada: “Pudno kunak kadakayo nga adda sumagmamano a nakatakder ditoy a saanto pay a matay agingga a makitada nga umuna a naipasdeken ti Pagarian ti Dios.”+ ² Innem nga aldaw kalpasanna, inkuyog ni Jesus da Pedro, Santiago, ken Juan a napan iti nangato a bantay nga is-isuda. Ket nagbalbaliw ti langana iti sanguananda.+ ³ Rimmaniag ken nagbalin a makapurar ti makinruar a badona, a napurpuraw ngem iti aniaman a kabaelan a papudawen ti asinoman nga aglablaba. ⁴ Nagparang met kadakuada da Elias ken Moises, ket makisarsaritada ken Jesus. ⁵ Kinuna ni Pedro ken Jesus: “Rabbi, maragsakankami unay ta addakami ditoy. Ibangonandakayo ngarud iti tallo a tolda, maysa para kenka, maysa para ken Moises, ken maysa para ken Elias.” ⁶ Saan ngamin nga ammo ni Pedro ti ibagana ta mabutbutengda unayen. ⁷ Kalpasanna, adda ulep a nanglinong kadakuada ken adda timek+ a nangngeg manipud iti ulep: “Daytoy ti Anakko a dungdungnguek.+ Dumngegkayo kenkuana.”+ ⁸ Idi kimmitada iti aglawlaw, awanen ti sabali a kaduada no di laeng ni Jesus. ⁹ Idi sumalsalogdan iti bantay, inyunay-unayna nga imbilin nga awan a pulos ti pangibagbagaanda iti nakitada+ agingga a mapagungar ti Anak ti tao.+ ¹⁰ Impapusoda ti imbagana,* ngem nagsasaritaanda nga is-isuda no ania ti kaipapanan ti pannakapagungarna. ¹¹ Insaludsodda kenkuana: “Apay nga ibagbaga dagiti eskriba a masapul nga umay nga umuna ni Elias?”+ ¹² Insungbatna kadakuada: “Sigurado nga umay nga umuna ni Elias ken isublina amin a banag;+ ngem apay a naisurat nga adu a rigat ti masapul a mapasaran ti Anak ti tao+ ken maum-umsi?+ ¹³ Ngem ibagak kadakayo, immayen ni Elias+ ket inaramidda kenkuana ti amin a kaykayatda, kas iti naisurat maipapan kenkuana.”+ ¹⁴ Idi nagsublida iti ayan ti dadduma nga adalan, nakitada nga ar-aribungbongan ida ti adu a tattao, ken adda dagiti eskriba a makisupsupiat kadakuada.+ ¹⁵ Ngem idi nakita isuna dagiti tattao, nasdaawda ken nagdardarasda a simmabat. ¹⁶ Insaludsodna: “Ania ti pakisupsupiatanyo kadagiti adalak?” ¹⁷ Insungbat ti maysa kadakuada: “Mannursuro, inkuyogko ti anakko a lalaki ta linuganan ti demonio a mangpapaumel kenkuana.*+ ¹⁸ No sumro ti demonio, itumbana ti anakko, isu nga aglabutab ti ngiwatna, agngaretnget dagiti ngipenna sa agkapsut. Impakaasik kadagiti adalam a paruarenda ngem dida kabaelan.” ¹⁹ Imbagana kadakuada: “Dakayo nga awanan pammati a henerasion,+ kasano pay kabayag a masapul a makikaduaak kadakayo? Kasano pay kabayag nga an-anusankayo? Iyegyo kaniak ti ubing.”+ ²⁰ Isu nga impanda ti barito kenkuana. Ngem idi a ti demonio nakitana ni Jesus, bigla a pinagkuyegyegna ti barito, isu a natumba ken nagtulidtulid nga aglablabutab ti ngiwatna. ²¹ Dinamag ni Jesus iti amana: “Kasano kabayagen a mapaspasamak daytoy kenkuana?” Kinuna ti ama: “Manipud pay idi ubing, ²² ken masansan nga ipuruakna iti apuy ken uray iti danum tapno patayenna ti anakko. Ngem no kabaelam a paimbagen, kaasiannakami koma ken tulongannakami.” ²³ Kinuna ni Jesus: “Apay nga imbagam a ‘No kabaelam’? No adda pammati ti maysa, amin a banag ket mabalin.”+ ²⁴ Dagus nga impukkaw ti ama ti barito: “Adda pammatik! Ngem papigsaem koma ti pammatik!”+ ²⁵ Idi makita ni Jesus nga agtataray dagiti tattao nga umasideg kadakuada, tinubngarna ti dakes nga espiritu ken binilinna: “Sika a dakes nga espiritu a mangpapaumel ken mangpatpatuleng, rummuarka kenkuana ket saanmon a subsublian!”+ ²⁶ Nagikkis ti demonio sa namin-adu a pinagkuyegyegna ti barito. Idi rimmuaren ti demonio ken kasla natayen ti barito, kinuna ti kaaduan: “Natayen!” ²⁷ Ngem iniggaman ni Jesus ti ima ti barito sana binangon, ket timmakder. ²⁸ Idi simrek ni Jesus ken dagiti adalanna iti maysa a balay, insaludsodda kenkuana idi is-isudan: “Apay a saanmi a naparuar ti demonio?”+ ²⁹ Insungbatna: “Kararag laeng ti makaparuar iti dayta a kita ti demonio.” ³⁰ Pinanawanda ti lugar ket napanda idiay Galilea, ngem dina kayat a maammuan dayta ti asinoman. ³¹ Ta isursurona idi dagiti adalanna ken ibagbagana kadakuada: “Matraidorto ti Anak ti tao iti ima dagiti bumusbusor kenkuana, ket patayendanto,+ ngem uray mapapatay, mapagungarto kalpasan ti tallo nga aldaw.”+ ³² Ngem dida naawatan ti imbagana ken mabutengda nga agsaludsod. ³³ Ket nakadanonda idiay Capernaum. Idi adda iti uneg ti balay, insaludsodna kadakuada: “Ania ti nagsusupiatanyo iti dalan?”+ ³⁴ Saanda a nakauni, ta nagsusupiatanda no asino kadakuada ti katan-okan. ³⁵ Isu a nagtugaw ken inayabanna ti Sangapulo ket Dua sana kinuna: “No kayat ti maysa ti agbalin nga umuna, masapul nga isu ti maudi ken agserbi iti amin.”+ ³⁶ Kalpasanna, nangala iti maysa nga ubing ket pinagtakderna iti tengngada sa inarakupna ken kinunana: ³⁷ “Asinoman nga umawat iti maysa a kas kadagitoy nga ubbing+ maigapu iti naganko, awatennak met; ket asinoman nga umawat kaniak, awatenna met Daydiay nangibaon kaniak.”+ ³⁸ Kinuna ni Juan kenkuana: “Mannursuro, nakakitakami iti tao a mangus-usar iti naganmo a mangparparuar kadagiti demonio ket linapdanmi ta saantayo met a kadua.”+ ³⁹ Ngem kinuna ni Jesus: “Bay-anyo latta, ta ti asinoman a mangus-usar iti naganko a mangaramid kadagiti milagro ket saan a makapagsao a dagus iti maibusor kaniak. ⁴⁰ Ta ti saan a bumusor kadatayo ket kaduatayo.+ ⁴¹ Ken asinoman a mangted iti sangabaso a danum nga inumenyo gapu ta pasurotnakayo ni Kristo,+ pudno kunak kadakayo, sigurado a magunggonaanto.+ ⁴² Ngem asinoman a mangitibkol kadagitoy a nanumo nga addaan pammati, nasaysayaat laengen no magalutan ti tengngedna iti gilingan a bato a puspusiposen ti asno sa maitapuak iti baybay.+ ⁴³ “No ta imam ti mangitibkol kenka, putdem. Nasaysayaat a pukolka nga umawat iti biag nga agnanayon ngem ti addaanka iti dua nga ima a maitapuak iti Gehenna,* iti apuy a di maiddep.+ ⁴⁴ * —— ⁴⁵ No ta sakam ti mangitibkol kenka, putdem. Nasaysayaat a pilayka nga umawat iti biag nga agnanayon ngem ti addaanka iti dua a saka a maitapuak iti Gehenna.*+ ⁴⁶ * —— ⁴⁷ No ta matam ti mangitibkol kenka, ibellengmo.+ Nasaysayaat a buldingka a sumrek iti Pagarian ti Dios ngem ti addaanka iti dua a mata a maitapuak iti Gehenna,*+ ⁴⁸ a sadiay, saan a matay dagiti igges ken saan a maiddep ti apuy.+ ⁴⁹ “Ta masapul a maasinan dagitoy a tattao babaen ti apuy.+ ⁵⁰ Nasayaat ti asin, ngem no tumamnay ti asin, kasanonto pay a mapaapgad?+ Agbalinkayo a kas iti asin,+ ket agkakappiakayo.”+