Ebanghelio ni Mateo 19:1-30
19 Idi naibagan ni Jesus dagitoy, pimmanaw iti Galilea ket bimmallasiw iti Jordan sa napan iti pagpatinggaan* ti Judea.+
2 Adu a tattao ti simmurot kenkuana ket pinaimbagna ida sadiay.
3 Immasideg kenkuana dagiti Fariseo tapno subokenda, ket insaludsodda: “Umiso kadi nga idiborsio ti maysa a lalaki ti asawana uray ania ti makagapu?”+
4 Insungbatna: “Saanyo kadi a nabasa a ti nangparsua kadakuada idi rugrugina inaramidna ida a lalaki ken babai+
5 ken imbagana: ‘Daytoy ti makagapu a panawanto ti lalaki ti ama ken inana sa makitiponto iti asawana, ket ti dua agbalinto a maymaysa a lasag’?+
6 Iti kasta, saandan a dua, no di ket maymaysadan a lasag. Isu a ti pinagtipon ti Dios, saan koma a pagsinaen ti tao.”+
7 Insaludsod pay dagiti Fariseo: “Apay ngarud nga impalubos ni Moises a mangaramid ti lalaki iti kasuratan ti panangpapanaw sa idiborsiona ti asawana a babai?”+
8 Kinuna ni Jesus: “Gapu iti kinasukiryo, impalubos ni Moises nga idiborsioyo dagiti assawayo,+ ngem saan a kasta ti kasasaad idi un-unana.+
9 Ibagak kadakayo nga asinoman a mangidiborsio ken baketna, a saan a nakaaramid iti seksual nga immoralidad,* sa mangasawa iti sabali, makabasol iti pannakikamalala.”+
10 Kinuna dagiti adalan: “No kasta ti kasasaad ti lalaki iti asawana, nasaysayaat laengen ti saan nga agasawa.”
11 Kinunana kadakuada: “Saan a maaramid dayta ti amin, no di ket dagidiay laeng addaan iti kasta a sagut.+
12 Adda dagiti nayanak a eunuko, adda met dagiti pinagbalin dagiti tattao a eunuko, ken adda dagiti nagbalin a eunuko maigapu iti Pagarian ti langit. Daydiay makapagtalinaed nga awanan iti asawa, saan koma nga agasawa.”+
13 Kalpasanna, nayasideg kenkuana dagiti ubbing tapno iparabawna ti imana ken nagkararag, ngem inungtan dagiti adalan dagiti nagannak.+
14 Nupay kasta, kinuna ni Jesus: “Bay-anyo nga umasideg kaniak dagiti ubbing, diyo laplapdan ida, ta para kadagiti kas kadakuada ti Pagarian ti langit.”+
15 Imparabawna ti imana kadakuada sa pimmanaw.
16 Adda agtutubo a lalaki a nagsaludsod ken Jesus: “Mannursuro, ania a naimbag ti masapul nga aramidek tapno agbiagak nga agnanayon?”+
17 Kinuna ni Jesus: “Apay a saludsodem kaniak no ania ti naimbag? Adda laeng maymaysa a naimbag.+ No kayatmo ngarud ti maaddaan iti biag, itultuloymo a tungpalen dagiti bilin.”+
18 Insaludsod ti lalaki: “Aniada a bilin?” Kinuna ni Jesus: “Dika pumatay,+ dika makikamalala,+ dika agtakaw,+ dika agbalin nga ulbod a testigo,+
19 dayawem da tatang ken nanangmo,+ ken masapul nga ayatem ti kaarrubam a kas iti bagim.”+
20 Kinuna ti lalaki: “Tungtungpalek amin dagita; ania pay ti masapul nga aramidek?”
21 Kinuna ni Jesus: “No kayatmo ti agbalin a perpekto,* ilakom dagiti sanikuam sa itedmo kadagiti napanglaw, ket maaddaankanto iti kinabaknang idiay langit.+ Kalpasanna, umayka ket agbalinka a pasurotko.”+
22 Idi nangngeg daytoy ti agtutubo, naliday a pimmanaw ta adu ti sanikuana.+
23 Ngem kinuna ni Jesus kadagiti adalanna: “Pudno kunak kadakayo, narigat a makastrek ti maysa a baknang iti Pagarian ti langit.+
24 Kinapudnona, nalaklaka pay a lumsot ti kamelio iti abut ti dagum ngem ti baknang a sumrek iti Pagarian ti Dios.”+
25 Idi nangngeg dayta dagiti adalan, nasdaawda unay ket kinunada: “Siasino ngaruden ti maisalakan?”+
26 Kimmita ni Jesus ket imbagana: “Imposible daytoy iti tao, ngem awan ti imposible iti Dios.”+
27 Imbaga ni Pedro: “Kitaem! Pinanawanmi ti amin a banag ket sinurotdaka; anianto ngarud ti magunggonami?”+
28 Kinuna ni Jesus: “Pudno kunak kadakayo, inton mapabaro ti amin a banag ket agtugaw ti Anak ti tao iti nadayag a tronona, dakayo a simmurot kaniak agtugawkayto met iti 12 a trono, a mangukom iti 12 a tribu ti Israel.+
29 Tunggal maysa a nangpanaw iti balay wenno kakabsat a lallaki wenno kakabsat a babbai wenno ama wenno ina wenno annak wenno talon maigapu iti naganko, umawatto iti maminsangagasut nga ad-adu ngem kadagita ken tawidennanto ti biag nga agnanayon.+
30 “Ngem adu ti umuna a maudinto, ken adu ti maudi nga umunanto.+
