Ebanghelio ni Mateo 2:1-23
2 Nayanak ni Jesus idiay Betlehem+ iti Judea idi kaaldawan ni Herodes*+ nga ari. Idi agangay, adda dagiti astrologo* manipud Daya a napan idiay Jerusalem.
2 Kinunada: “Sadino ti ayan ti ubing nga agbalinto nga ari dagiti Judio?+ Nakitami ti bituenna idi addakami iti Daya, ket umaykami agruknoy kenkuana.”
3 Idi nangngeg daytoy ni Ari Herodes ken ti intero a Jerusalem, nariribukanda.
4 Pinaayabanna ti amin a panguluen a papadi ken eskriba ket dinamagna no sadino ti pakayanakan ti Kristo.*
5 Insungbatda: “Idiay Betlehem+ iti Judea, ta kastoy ti insurat ti propeta:
6 ‘Sika, O Betlehem iti Juda, saanka a maudi kadagiti agturay iti Juda, ta tumaudto kenka ti maysa nga agturay, a mangipastor iti ilik nga Israel.’”+
7 Kalpasanna, sililimed a pinaayaban ni Herodes dagiti astrologo ket dinamagna no kaano a nagparang ti bituen.
8 Imbaonna ida idiay Betlehem, ket kinunana: “Sapulenyo a naimbag ti ubing. Inton mabirokanyo, ipakaammoyo kaniak tapno mapanak met agruknoy kenkuana.”
9 Pimmanawda kalpasan ti panangbilin kadakuada ti ari. Iti dalan, nakitada manen ti bituen a nagparang idi addada idiay Daya+ ket inturongna ida iti ayan ti ubing.
10 Nakaragragsakda idi nakitada ti bituen.
11 Simrekda iti balay ket nakitada ti ubing ken ni Maria nga inana. Nagparintumengda a nagruknoy kenkuana. Nangisagutda met kadagiti balitok, olibano, ken mirra.
12 Ngem pinakdaaran ida ti Dios babaen ti tagtagainep+ a saanda nga agsubli ken Herodes, isu a sabali a dalan ti nagnaanda idi nagawidda iti pagilianda.
13 Idi nakapanawdan, nagpakita ken Jose ti anghel ni Jehova* iti tagtagainep+ ket kinunana: “Bumangonka, alaem ti ubing ken ti asawam ket agkamangkayo idiay Egipto, ken agyankayo sadiay agingga nga ibagak a pumanawkayo, ta sapulento ni Herodes ti ubing tapno patayenna.”
14 Gapuna, bimmangon ni Jose iti dayta a rabii, innalana ti ubing ken ti asawana ket napanda idiay Egipto.
15 Nagtalinaed sadiay agingga iti ipapatay ni Herodes. Daytoy ti kaitungpalan ti imbaga ni Jehova* babaen ti propetana: “Inayabak ti anakko manipud Egipto.”+
16 Nakapungtot unay ni Herodes idi naammuanna a sinikapan dagiti astrologo. Gapuna, nangibaon idiay Betlehem ken iti aglawlawna kadagiti mangpapatay iti amin nga ubbing a lallaki nga agtawen iti dua nga agpababa. Inaramidna daytoy idi naammuanna ti edad ti ubing maibatay iti imbaga dagiti astrologo a panagparang ti bituen.+
17 Iti kasta, natungpal ti imbaga ti Dios babaen ken propeta Jeremias:
18 “Nangngeg idiay Rama ti panagsangit ken napalalo a panagdung-aw. Agsangsangit ni Raquel+ ken saanna a kayat ti maliwliwa, ta awanen dagiti annakna.”+
19 Idi natayen ni Herodes, nagparang iti tagtagainep+ ti anghel ni Jehova* ken Jose idiay Egipto
20 ket kinunana: “Bumangonka, alaem ti ubing ken ti asawam ket mapankayo idiay Israel, ta natayen dagidiay mayat a mangpapatay iti ubing.”*
21 Gapuna, bimmangon ket innalana ti ubing ken ti asawana sa napanda idiay Israel.
22 Ngem idi nadamagna a ni Arkelao ti agturay iti Judea imbes a ti amana a ni Herodes, nagbuteng a mapan sadiay. Pinakdaaran manen ti Dios ni Jose babaen ti tagtagainep+ isu a napan idiay Galilea.+
23 Nagnaed iti siudad a maawagan iti Nazaret.+ Iti kasta, natungpal ti imbaga dagiti propeta: “Maawaganto iti Nazareno.”*+
Footnotes
^ Wenno “mago.”
^ Wenno “Mesias; Daydiay Nadutokan.”
^ Lit., “mangbirbirok iti kararua ti ubing.”
^ Mabalin a nagtaud iti Hebreo a sao a “tarubong.”
