Nahum 1:1-15
1 Mensahe maibusor iti Nineve:+ Ti libro ti sirmata ni Nahum* nga Elkosita:
2 Ni Jehova ket Dios nga agkidkiddaw iti naipamaysa a debosion+ ken agibales;Agibales ni Jehova ken nakasagana a mangyebkas iti pungtotna.+
Agibales ni Jehova kadagiti kalabanna,Ket urnongenna ti pungtotna para kadagiti kabusorna.
3 Ni Jehova ket nabannayat nga agpungtot+ ken dakkel ti pannakabalinna,+Ngem sigurado nga ipalak-am ni Jehova ti maiparbeng a dusa.+
Adda makadadael nga angin ken bagyo iti dalanna,Ken dagiti ulep ti tapok dagiti sakana.+
4 Tubngarenna ti baybay,+ ken pagmagaenna;Ken paatiananna amin a karayan.+
Malaylay ti Basan ken Carmelo,+Ken dagiti sabong ti Lebanon.
5 Magunggon dagiti bantay gapu kenkuana,Ken malunag dagiti turod.+
Mariribukto ti lubong gapu iti rupana,Kasta met ti daga ken ti amin nga agnanaed iti dayta.+
6 Asino ti makaibtur iti pungtotna?+
Ken asino ti makaanus iti bara ti ungetna?+
Maibukbokto ti pungtotna a kas iti apuy,Ken maburakto dagiti dadakkel a bato gapu kenkuana.
7 Naimbag ni Jehova,+ ti pagkamangan iti aldaw ti rigat.+
Sipapanunot kadagidiay* agkamang kenkuana.+
8 Naan-anayto a dadaelenna ti Nineve* babaen ti dakkel a layus,Ken kamatento ti kinasipnget dagiti kabusorna.
9 Anianto ti panggepyo maibusor ken Jehova?
Isu ti naan-anay a mangdadael.
Saanto a tumaud manen ti rigat.+
10 Ta nalagalagada a kas kadagiti siit,Ken kaslada kadagiti nabartek iti serbesa;*Ngem maibusdanto a kas iti nagango a garami.
11 Addanto tumaud kenka nga agpanggep iti dakes ken Jehova,A mangted iti awan serserbina a balakad.
12 Daytoy ti kinuna ni Jehova:
“Uray no napigsada ken aduda,Madadael ken mataydanto* latta.
Pinarigatka* ngem saankanton a parigaten.
13 Tukkolekto ti sangol nga impaawitna kenka,+Ken pugsatekto ti naigalut kenka.
14 Imbilin ni Jehova maipapan kenka,*‘Saanton a mataginayon ti naganmo.
Ikkatekto dagiti kinitikitan nga imahen ken metal nga estatua* iti balay* dagiti diosmo.
Iyaramidankanto iti tanem, ta makaparurodka.’
15 Magmagna iti rabaw ti bambantay dagiti saka daydiay mangidandanon iti naimbag a damag,+Daydiay mangipakpakaammo iti talna.
Selebraram dagiti piestam,+ O Juda, tungpalem dagiti karim,Ta saanto a lumabas manen kenka daydiay awan serserbina.
Naan-anayto a madadael.”
Footnotes
^ Kaipapananna, “Manangliwliwa.”
^ Wenno “Aywananna dagidiay.” Lit., “Ammona dagidiay.”
^ Lit., “ti lugarna.”
^ Wenno “serbesa a trigo.”
^ Wenno mabalin a, “ken lumabasto.”
^ Kayatna a sawen, ti Juda.
^ Kayatna a sawen, ti Asiria.
^ Wenno “sinukog nga estatua.”
^ Wenno “templo.”
