Uk-ukom 15:1-20
-
Agibales ni Samson kadagiti Filisteo (1-20)
15 Di nagbayag, bayat ti panagaapit iti trigo, napan binisita ni Samson ti asawana ket nangitugot iti urbon a kalding. Kinunana: “Kayatko ti sumrek iti kuarto* ti asawak.” Ngem saan a pinalubosan ti ama ti babai.
2 Insungbat ti amana: “Kunak no kagurguramon+ isu nga intedko iti abaymo a lalaki.+ Saan kadi a napimpintas ni adingna? Isu laengen ti asawaem.”
3 Ngem kinuna ni Samson kadakuada: “Ita, saandak a mababalaw dagiti Filisteo no dangrak ida.”
4 Gapuna, nangtiliw ni Samson iti 300 a sora. Sagdudua a rineppetna dagiti ipusda sa nangikabil iti aluten iti nagrinneppet nga ipusda.
5 Pinasgedanna dagiti aluten sa binulosanna dagiti sora iti saan pay a naani a kataltalonan dagiti Filisteo. Nauram amin a naani ken saan pay a naani a trigo, agraman dagiti kaubasan ken kaolibuan.
6 Insaludsod dagiti Filisteo: “Asino ti nangaramid iti daytoy?” Naibaga kadakuada: “Ni Samson a manugang ti maysa a Timnita. Intedna ngamin ti asawa ni Samson iti abayna a lalaki.”+ Gapuna, napan dagiti Filisteo ket inuramda ti babai ken ti amana.+
7 Kinuna kadakuada ni Samson: “Gapu iti inaramidyo, saanak nga agsardeng agingga a diak makabales kadakayo.”+
8 Kalpasanna, pinagsasarunona a pinapatay ida* sa nagkamang iti maysa a kueba* iti derraas a maawagan Etam.
9 Di nagbayag, napan nagkampo dagiti Filisteo idiay Juda ken sinursorda ti Lehi.+
10 Dinamag dagiti lallaki iti Juda: “Apay nga immaykayo rimmaut?” Insungbat dagiti Filisteo: “Umaymi tiliwen* ni Samson, tapno ibalesmi ti inaramidna kadakami.”
11 Gapuna, 3,000 a lallaki iti Juda ti napan iti kueba* iti derraas a maawagan Etam ket kinunada ken Samson: “Dimo kadi ammo a dagiti Filisteo ti mangiturturay kadatayo?+ Apay nga inaramidmo daytoy kadakami?” Insungbat ni Samson: “Imbalesko laeng ti inaramidda kaniak.”
12 Ngem kinunada: “Immaykami tapno tiliwen* ken iyawatdaka kadagiti Filisteo.” Insungbat ni Samson: “Ikariyo a saandak a papatayen.”
13 Kinunada: “Wen, saandaka a papatayen. Galutandaka laeng ken iyawatdaka kadakuada.”
Iti kasta, ginalutanda iti dua a baro a tali sa inruarda iti kueba.
14 Idi nakadanonda idiay Lehi, nagpukpukkaw dagiti Filisteo gapu iti ragsakda idi nakitada ni Samson. Nagtignay kenkuana ti espiritu ni Jehova+ ket nagbalin a kasla lienso a sinulid nga inuram ti apuy dagiti tali kadagiti imana ket natinnag dagita.+
15 Nakakita ni Samson iti panga ti kalakian nga asno a nabiit pay a natay. Pinidutna ket inusarna a nangpapatay iti 1,000 a lallaki.+
16 Kinuna ni Samson:
“Babaen ti panga ti asno, pinapatayko dagiti kabusor ket pinagtutuonko dagiti bangkayda!
Babaen ti panga ti asno, pinapatayko ti 1,000 a lallaki.”+
17 Idi naibagana daytoy, imbellengna ti panga ken inawaganna dayta a lugar iti Ramat-lehi.*+
18 Kalpasanna, nawaw unay ket immawag ken Jehova: “Intedmo iti adipenmo daytoy dakkel a panagballigi. Ngem ita, bay-annak kadi a matay iti waw ken ipalubosmo a tiliwendak dagiti di nakugit?”
19 Gapuna, pinagrengngat ti Dios ti maysa a likkaong idiay Lehi, ket nagubbog iti danum.+ Imminum ket pimmigsa* ken nakaungar. Gapuna, pinanagananna dayta a lugar iti En-hakore,* nga adda idiay Lehi agingga ita.
20 Nagserbi ni Samson kas ukom iti Israel iti 20 a tawen idi tiempo dagiti Filisteo.+
Footnotes
^ Wenno “iti makin-uneg a siled.”
^ Lit., “pinagtutuonna dagiti luppoda.”
^ Wenno “rengngat.”
^ Wenno “galutan.”
^ Wenno “rengngat.”
^ Wenno “galutan.”
^ Kaipapananna, “Nangato a Lugar nga Ayan ti Panga.”
^ Lit., “nagsubli ti espirituna.”
^ Kaipapananna, “Ubbog Daydiay Umaw-awag.”
