Uk-ukom 19:1-30
-
Panangrames dagiti Benjaminita idiay Gibea (1-30)
19 Kadagidi tiempo nga awan ari ti Israel,+ adda Levita nga agnanaed iti adayo a paset ti kabambantayan ti Efraim.+ Nangala iti sabali pay nga asawana idiay Betlehem+ iti Juda.
2 Ngem saan a nagmatalek kenkuana ti babai ken nagsubli iti balay ni amana idiay Betlehem iti Juda. Nagyan sadiay iti uppat a bulan.
3 Kalpasanna, napan sinurot ti Levita tapno ay-aywenna ti asawana nga agsubli. Kaduana ti lalaki a katulonganna ken nangikuyog iti dua nga asno. Pinastrek ida ti babai iti balay ni amana. Naragsakan ti ama ti babai idi makitana ti manugangna
4 isu a kinombinsirna nga agtalinaed iti tallo nga aldaw. Nanganda ken imminumda, ken imyan sadiay.
5 Nasapada a bimmangon iti maikapat nga aldaw tapno agawiddan, ngem kinuna ti ama ti babai iti manugangna: “Mangankay pay tapno adda pamigsayo,* sa mapankayon.”
6 Iti kasta, nagtugawda ket nangan ken imminumda. Kalpasanna, kinuna ti ama ti babai iti manugangna: “Pangngaasim ta umyanka ket agragsakka.”*
7 Idi bimmangon ti lalaki tapno mapanen, nagpakpakaasi ti katuganganna, isu nga imyan manen.
8 Idi nasapa a bimmangon iti maikalima nga aldaw tapno mapanen, kinuna ti ama ti babai: “Pangngaasim ta mangankayo tapno adda pamigsayo.”* Nagmalmalemda manen sadiay, ket nangnanganda.
9 Idi agrubbuaten a pumanaw ti Levita a kaduana ti babai ken ti lalaki a katulonganna, kinuna ti ama ti babai: “Malemen. Pangngaasiyo ta umyankayo ken agragsakkayo. Sapaenyonto laengen ti agrubbuat nga agawid* inton bigat.”
10 Ngem saanen a kayat ti lalaki ti umyan, isu a pimmanaw ket nakadanon idiay Jebus, kayatna a sawen, ti Jerusalem.+ Kaduana ti asawana, ti lalaki a katulonganna, ken ti dua nga asno.
11 Dandanin lumnek ti init idi makadanonda iti asideg ti Jebus, isu a kinuna ti katulongan iti amona: “Aginana ken umyantayo kadi iti daytoy a siudad dagiti Jebuseo?”
12 Insungbat ti amona: “Saantayo nga aginana iti siudad a pagnanaedan dagiti saan nga Israelita. Mapantayo idiay Gibea.”+
13 Kinunana pay: “Ikagumaantayo ti dumanon idiay Gibea wenno idiay Rama+ ket umyantayo iti maysa kadagita a lugar.”
14 Gapuna, nagtultuloyda iti dalanda, ket lumneken ti init idi makaasidegda idiay Gibea, a paset ti Benjamin.
15 Nagsardengda idiay Gibea tapno umyanda. Idi nakastrekda sadiay, nagtugawda iti plasa ti siudad, ngem awan ti asinoman a nangawis kadakuada nga umyan iti balayna.+
16 Di nagbayag, adda lakay a simmungad a naggapu iti taltalon. Dati nga agnanaed ti lakay iti kabambantayan ti Efraim,+ ngem nabayag bassiten nga aggigian idiay Gibea. Benjaminita dagiti agnanaed iti dayta a siudad.+
17 Idi nakitana ti lalaki iti plasa ti siudad, dinamagna: “Papanam ken sadino ti naggapuam?”
18 Insungbat ti lalaki: “Naggapukami idiay Betlehem iti Juda ket mapankami iti adayo a paset ti kabambantayan ti Efraim a pagnanaedak. Napanak idiay Betlehem iti Juda,+ ket agturongak iti balay ni Jehova,* ngem awan ti asinoman a mangawis kaniak iti balayna.
19 Adu ti balonmi a garami ken taraon dagiti asnomi.+ Adda met tinapay+ ken arak a para kaniak, iti asawak, ken iti katulongak. Adda amin a kasapulanmi.”
20 Ngem kinuna ti lakay: “Maadda koma kadakayo ti talna! Siak ti makaammo iti aniaman a kasapulanyo, basta dikay umyan ditoy plasa.”
21 Iti kasta, pinastrekna ida iti balayna ket pinakanna* dagiti asno. Kalpasanna, binugguanda dagiti sakada ket nangan ken imminumda.
22 Bayat nga agragragsakda, adda dakes a lallaki iti siudad a nangpalawlaw iti balay ken binanugbogda ti ridaw. Kinunada iti lakay a makimbalay: “Iruarmo ti lalaki a nagdagus iti balaymo, tapno makidennakami kenkuana.”+
23 Rimmuar ti lakay ket kinunana: “Saan, kakabsatko, pangngaasiyo ta dikay agaramid iti dakes. Bisitak daytoy a lalaki. Diyo aramiden daytoy a nakababain a banag.
24 Adda ditoy ti birhen pay a balasangko ken ti asawa ti lalaki. Iruarko ida, ket aramidenyo kadakuada ti kaykayatyo.*+ Ngem diyo aramiden daytoy a nagdakes a banag iti daytoy a lalaki.”
25 Ngem saan nga inkaskaso dagiti lallaki, isu nga iniggaman ti Levita ti asawana+ ket inruarna kadakuada. Nagpatnag a rinamesda ti babai ken inaramidda kenkuana ti kaykayatda, sa pinalubosanda idi parbangonen.
26 Iti agsapa, nakadanon ti babai iti balay ti lakay nga ayan ti asawana ket naglusdoy iti ruangan. Nakaidda sadiay agingga a naglawag.
27 Idi bimmangon ti Levita iti agsapa ken linuktanna dagiti ridaw ti balay tapno ituloyna ti agdaliasat, nakitana ti asawana a nakaidda a nakaunnat dagiti imana iti ruangan.
28 Kinunana iti babai: “Bumangonka ta mapantayon.” Ngem saan a simmungbat. Iti kasta, insakayna iti asno ket nagawiddan.
29 Idi nakadanonen iti balayna, nangala iti buneng ket ginuduaguduana ti bangkay ti asawana iti 12 a pedaso sa nangipatulod iti maysa a pedaso iti tunggal teritoria ti Israel.
30 Kinuna ti amin a nakakita iti dayta: “Awan pay ti kastoy a napasamak wenno nakitami manipud idi rimmuar dagiti Israelita idiay Egipto. Panunoten* ken pagsasaritaanyo daytoy,+ ket ibagayonto no ania ti aramidenmi.”
Footnotes
^ Wenno “tapno mataginayon ti pusoyo.”
^ Wenno “paragsakem ta pusom.”
^ Wenno “tapno mataginayon ti pusoyo.”
^ Lit., “a mapan iti toldayo.”
^ Wenno mabalin a, “ket agserserbiak iti balay ni Jehova.”
^ Wenno “inikkanna iti aglalaok a garami.”
^ Wenno “abusuenyo ida ken aramidenyo ti umiso iti imatangyo.”
^ Wenno “Ipapuso.”
