Uk-ukom 4:1-24
4 Ngem idi natayen ni Ehud, inaramid manen dagiti Israelita ti dakes iti imatang ni Jehova.+
2 Iti kasta, inyawat* ida ni Jehova ken ni Jabin nga ari ti Canaan,+ a nagturay idiay Hazor. Ti pangulo ti armadana ket ni Sisera nga agnanaed idiay Haroset dagiti nasion.*+
3 Nagpakaasi dagiti Israelita ken Jehova,+ ta addaan ni Jabin iti 900 a karuahe a pakigubat a nakabitan iti kasla kumpay a landok dagiti pilidda*+ ken inrurumenna dagiti Israelita+ iti 20 a tawen.
4 Ni propeta+ Debora nga asawa ni Lappidot ti ukom iti Israel iti daydi a tiempo.
5 Masansan nga agtugaw iti sirok ti kayona a palma iti nagbaetan ti Rama+ ken Bethel+ iti kabambantayan ti Efraim. Mapan idi kenkuana dagiti Israelita tapno agdamag maipapan kadagiti pangngeddeng ti Dios.
6 Pinaayabanna ni Barak+ nga anak ni Abinoam manipud Kedes-neftali+ ket kinunana: “Kastoy ti imbilin ni Jehova a Dios ti Israel: ‘Mapanka* idiay Bantay Tabor, ket mangikuyogka iti 10,000 a lallaki manipud iti Neftali ken Zabulon.
7 Tignayekto a mapan iti karayan* ti Kison+ ni Sisera a pangulo ti armada ni Jabin, agraman dagiti karuahena a pakigubat ken dagiti soldadona, ket mangabakkanto.’”+
8 Kinuna ni Barak ken ni Debora: “Mapanak no kumuyogka, ngem no saan, diak mapan.”
9 Insungbat ni Debora: “Kumuyogak kenka. Ngem saanto a sika ti mapadayawan iti daytoy a gubat, ta maysanto a babai ti usaren ni Jehova a mangpapatay ken Sisera.”+ Iti kasta, kimmuyog ni Debora ken ni Barak a napan idiay Kedes.+
10 Nangayab ni Barak iti 10,000 a lallaki iti tribu da Zabulon ken Neftali+ ket nagturongda idiay Kedes. Kimmuyog met kenkuana ni Debora.
11 Kabayatanna, simmina ni Heber kadagiti padana a Keneo,+ dagiti kaputotan ni Hobab, a katugangan ni Moises.+ Imbangonna ti toldana iti asideg ti dakkel a kayo idiay Zaananim, nga adda idiay Kedes.
12 Impadamagda ken Sisera a napan ni Barak nga anak ni Abinoam idiay Bantay Tabor.+
13 Dagus nga inummong ni Sisera ti amin a karuahena a pakigubat—900 a karuahe a nakabitan iti kasla kumpay a landok dagiti pilidda*—ken amin a soldado a kaduana manipud Haroset dagiti nasion ket napanda iti karayan* ti Kison. +
14 Kinuna ni Debora ken ni Barak: “Agtignayka, ta ita nga aldaw, pagballigiennaka ni Jehova. Tulongannakanto ni Jehova a mangparmek ken Sisera.” Simmalog ni Barak manipud Bantay Tabor ken ti 10,000 a lallaki a kakaduana.
15 Riniribuk ni Jehova ni Sisera ken ti amin a karuahena a pakigubat ken dagiti soldadona+ ket pinarmek ida ni Barak. Kamaudiananna, dimsaag ni Sisera iti karuahena ket naglibas.
16 Kinamat ni Barak dagiti karuahe a pakigubat ken dagiti soldado agingga idiay Haroset dagiti nasion. Iti kasta, natay iti espada ti amin a soldado ni Sisera; awan uray maysa ti nakalasat.+
17 Ngem nakalibas ni Sisera ket napan iti tolda ni Jael+ nga asawa ni Heber+ a Keneo, ta agkappia idi ni Jabin+ nga ari ti Hazor ken ti pamilia ni Heber a Keneo.
18 Rimmuar ni Jael a simmabet ken Sisera ket kinunana: “Sumrekka ditoy, apo. Dika agbuteng.” Simrek ni Sisera iti tolda, ket inulesanna.
19 Kinuna ni Sisera: “Pangngaasim ta ikkannak iti danum ta makain-inumak.” Linuktan ni Jael ti pagkargaan a lalat a naglaon iti gatas ket pinainumna,+ sa inulesanna manen.
20 Kinuna ni Sisera: “Agtakderka iti ruangan, ket no adda agdamag no adda lalaki nga immay ditoy, ibagam nga awan.”
21 Idi nakaturogen ni Sisera gapu iti bannogna, nangala ni Jael nga asawa ni Heber iti pasok ken martilio. Nagin-inayad nga immasideg sa impalokna ti pasok iti pispis ni Sisera agingga a simmalput iti daga ket natay ni Sisera.+
22 Idi napan nagsapul sadiay ni Barak, rimmuar ni Jael ket kinunana: “Sumrekka ket ipakitak kenka ti lalaki a sapsapulem.” Simrek ni Barak ket nakitana a natayen ni Sisera, nga adda pasok a naipalok iti pispisna.
23 Iti dayta nga aldaw, ti Dios pinarmekna ni Jabin nga ari ti Canaan iti sanguanan dagiti Israelita.+
24 Bimmileg a bimmileg dagiti Israelita maibusor ken Jabin nga ari ti Canaan,+ agingga a naparmekda ni Jabin nga ari ti Canaan.+
Footnotes
^ Lit., “inlako.”
^ Wenno “Haroset-ha-goiim.”
^ Lit., “karuahe a landok.”
^ Wenno “Pagpuestuem dagiti soldadom.”
^ Karayan a maaddaan laeng iti danum no panagtutudo.
^ Lit., “karuahe a landok.”
^ Karayan a maaddaan laeng iti danum no panagtutudo.
