Un-unnoy 1:1-22
א [Alef]*
1 Kaasi pay ta agmaymaysan a nakatugaw, ti siudad a napno idi iti umili!+
Nagbalin a kasla balo, daydi aduan iti populasion iti tengnga dagiti nasion!+
Napilitan nga agtrabaho daydi prinsesa kadagiti probinsia!+
ב [Beth]
2 Napalalo ti panagsangitna iti rabii,+ ket nabasa dagiti pingpingna iti lua.
Awan ti uray maysa kadagiti mangay-ayat kenkuana ti mangliwliwa kenkuana.+
Trinaidor ti amin a kakaduana;+ nagbalinda a kabusorna.
ג [Gimel]
3 Naipanaw ti Juda+ ket naparigat ken naadipen.+
Masapul nga agnaed iti tengnga dagiti nasion;+ awan ti masarakanna a paginanaan.
Amin a mangidaddadanes kenkuana nadanonanda nga agrigrigat.
ד [Daleth]
4 Agladladingit dagiti dalan nga agturong iti Sion, ta awan ti mapan iti piesta.+
Napanawan ti amin a ruanganna;+ agsensennaay dagiti papadina.
Agladladingit dagiti birhenna,* ken napalalo ti leddaangna.
ה [He]
5 Dagiti kalabanna ti nagbalin nga amona;* di maseknan dagiti kabusorna.+
Ta pinagladingit ni Jehova gapu iti adu a basolna.+
Tiniliw ti kalaban dagiti annakna sa impanawna.+
ו [Waw]
6 Naikkat ti amin a kinadayag ti anak a babai ti Sion.+
Dagiti prinsipena ket kasla kadagiti kalakian nga ugsa nga awanan iti pagaraban,Ken agkakapsutda a magmagna iti sanguanan ti mangidadanes kadakuada.
ז [Zayin]
7 Kadagiti aldaw nga agrigrigat ken awan pagtaenganna, malagip ti JerusalemTi amin a napateg a banag a nabayagen a kukuana.+
Idi naabak ti ilina iti kalaban ken awan ti timmulong kenkuana,+Nakita dayta dagiti kalaban ket kinatawaanda* ti pannakadadaelna.+
ח [Heth]
8 Nagkaro ti basol ti Jerusalem.+
Isu a nagbalin a makaparurod a banag.
Lalaisenen ti amin a nangpadpadayaw idi kenkuana, ta nakitada ti kinalamolamona.+
Nagsangsangit+ ken pimmanaw gapu iti bain.
ט [Teth]
9 Ti kinarugitna ket adda kadagiti paldana.
Dina pinampanunot ti masakbayanna.+
Nakaam-amak ti pannakadadaelna; awan ti mangliwliwa kenkuana.
O Jehova, kitaem ti panagrigatko, ta nagpannakkel ti kabusor.+
י [Yod]
10 Innala ti kalaban ti amin a gamengna.+
Ta nakitana dagiti nasion a simrek iti santuariona,+Uray no pinaritam ida a makikadua iti ilim.
כ [Kaf]
11 Agsensennaay ti amin nga umilina; agsapsapulda iti tinapay.+
Insukatda ti napateg a bambanagda iti makan, tapno laeng agbiagda.*
Tumaliawka, O Jehova, ket kitaem ti panagbalinko nga awan serserbina a babai.*
ל [Lamed]
12 Awan kadi ti pannakaseknanyo, dakayo amin a lumablabas?
Tumaliaw ken kumitakayo!
Adda kadi ut-ot a kas iti ut-ot a sagsagabaek,Nga impalubos ni Jehova a mapasarak iti aldaw ti sumsumged a pungtotna?+
מ [Mem]
13 Manipud ngato, nangibaon iti apuy kadagiti tulangko,+ ket inuramna ti tunggal tulang.
Nangipakat iti iket a pangtiliw iti sakak; pinilitnak nga agsanud.
Pinagbalinnak a nabaybay-an a babai.
Agmalmalem a masakitak.
נ [Nun]
14 Dagiti basolko ket kasla sangol nga inggalutna.
Naikabil dagita iti tengngedko, ket kimmapsutak.
Inyawatnak ni Jehova iti ima dagidiay diak malabanan.+
ס [Samekh]
15 Inikkat ni Jehova ti amin a nabileg a lallaki iti tengngak.+
Nangayab iti grupo ti tattao a bumusor kaniak tapno dadaelenda ti agtutubok a lallaki.+
Impayatpayat ni Jehova ti birhen nga anak ti Juda iti pagpespesan iti ubas.+
ע [Ayin]
16 Agsangsangitak gapu kadagitoy a banag;+ agar-arubos ti lua kadagiti matak.
Ta adayo ti asinoman a mangliwliwa wenno mangbang-ar kaniak.*
Nabaybay-an ti annakko, ta nangabak ti kabusor.
פ [Pe]
17 Inyunnat ti Sion dagiti imana;+ awan ti mangliwliwa kenkuana.
Imbilin ni Jehova iti amin a kabusor iti aglawlaw ni Jacob a lumabanda kenkuana.+
Nagbalin ti Jerusalem a makaparurod a banag kadakuada.+
צ [Tsade]
18 Nalinteg ni Jehova,+ ta nagsukirak iti bilinna.*+
Dumngegkayo, dakayo amin nga ili, ket kitaenyo ti rigatko.
Naipanaw dagiti birhen* ken agtutubok a lallaki.+
ק [Qof]
19 Inawagak dagiti mangay-ayat kaniak, ngem trinaidordak.+
Iti siudad, natay dagiti papadi ken panglakayenko,Bayat a nagbirokda iti makan tapno laeng agbiagda.*+
ר [Resh]
20 Kumitaka, O Jehova, ta marigrigatanak unay.
Agkibkibur ti unegko.*
Mariribukan ti pusok, ta nakaro ti panagrebeldek.+
Iti ruar, adda maulila gapu iti espada;+ adda met ni patay uray iti uneg ti balay.
ש [Shin]
21 Nangngeg dagiti tattao ti panagsennaayko; awan ti mangliwliwa kaniak.
Nadamag ti amin a kabusorko ti pannakadidigrak.
Nagragsakda, ta impagtengmo dayta.+
Ngem ipagtengmonto ti aldaw nga impakaammom,+ inton agbalinda a kas kaniak.+
ת [Taw]
22 Dumteng koma iti sanguanam ti amin a kinadakesda, ket dusaem ida,+Kas iti panangdusam kaniak gapu iti amin a basolko.
Ta adu ti sennaayko, ken agsakit ti pusok.
Footnotes
^ Ti kapitulo 1-4 ket dung-aw a naurnos sigun iti Hebreo nga alpabeto, wenno akrostiko.
^ Wenno “agtutubo a babbaina.”
^ Lit., “ulona.”
^ Wenno “nagragsakanda.”
^ Nailadawan ti Jerusalem kas babai.
^ Wenno “tapno mabang-aran ti kararuada.”
^ Wenno “iti kararuak.”
^ Wenno “agtutubo a babbai.”
^ Lit., “bibigna.”
^ Wenno “tapno mabang-aran ti kararuada.”
^ Lit., “bagisko.”
