Surat ti Bagi a Manarawidwid

Patgenmi a Pada a Saksi ni Jehova:

Inaprobetsar ni apostol Pablo ti amin a gundaway a mangipakita iti ayat ken apresasionna kadagiti padana a manamati. Iti suratna kadagiti Kristiano idiay Roma, kinunana: “Agyamanak iti Diosko baeten ken Jesu-Kristo maipapan kadakayo amin, agsipud ta ti pammatiyo mapagsasaritaan iti intero a lubong.” (Roma 1:8) Wen, pagaammo iti intero nga Imperio ti Roma ti nabileg a pammati ken naregta a panangaskasaba dagiti Kristiano idi umuna a siglo. (1 Tes. 1:8) Di pakasdaawan no apay a dungdungnguen unay ni Pablo dagiti kakabsatna!

Kas ken Pablo, agyamyamankami ken Jehova tunggal malagipdakayo. Ipatpategdakayo amin! Ken makapagtalekkayo met a ni Jehova ipatpategnakayo kas indibidual. Maipaspasango ti dadduma kadakayo iti nakaro nga ibubusor ngem agtultuloy latta ti panangaskasabayo. Maragsakan la ketdi ni Jehova a makakita iti kinaturedyo!​—Prov. 27:11.

Bayat a basbasaen ken ut-utobenyo ti “Pakasaritaan Dagiti Saksi ni Jehova iti Moderno a Panawen” a naitampok iti daytoy a makapagagar ken makapabileg iti pammati nga edision ti Tinawen a Libro, maammuanyonto ti nakaad-adu a pammaneknek a ni Apo Jesu-Kristo ket rimmuaren tapno “mangparmek ken tapno an-anayenna ti panagballigina,” ken saan nga agballigi ti aniaman nga igam a maaramat maibusor kadagiti pasurotna.​—Apoc. 6:2; Isa. 54:17.

 Insurat ni Pablo kadagiti Kristiano idiay Filipos: “Agyamanak a kankanayon iti Diosko . . . gapu iti kontribusion nga impaayyo iti naimbag a damag.” (Fil. 1:3-5) Dakami a miembro ti Bagi a Manarawidwid kayatmi met nga ibaga ti kasta kadakayo. Kabayatan ti 2007 a tawen serbisio, agdagup iti 1,431,761,554 nga oras ti binusbos ti 6,691,790 nga agibumbunannag iti panangikasaba iti naimbag a damag iti 236 a pagilian ken teritoria iti intero a lubong. Anian a nagdakkel ti maar-aramidanyo iti pannakaidur-as ti naimbag a damag! Panunotenyo laengen ti ginasut a ribu a tattao a natulongantayo gapu iti panagbibinnuligtayo, nga agpaay amin iti pakaidayawan ni Jehova!

Iti sabali pay a gundaway, impakita ni Pablo ti nalaus a pannakipagriknana kadagiti kakabsat. Insuratna kadagiti taga-Tesalonica: “Di agressat a laglagipenmi ti . . . panagibturyo gapu iti namnamayo ken Apotayo a Jesu-Kristo iti sanguanan ti Dios ken Amatayo.” (1 Tes. 1:2, 3) Wen, adu dagiti parikut iti biag. Adda dagiti tumaud a problema ngem nasken nga agibturtayo. Ania dagiti karit a pakaipaspasanguam? Maup-upayka kadi gapu ta adda nakaro a sakitmo ket limitadon ti maaramidam nga agserbi ken Jehova? Ti kadi patpatgem nga asawa nga adun a tawen a kataktakunaynaymo ket inalimonen ti saan a mapmapnek a kabusor a Sheol? (Prov. 30:15, 16) Awan kadi pay ti kapisi ti pusom gapu ta ti birbirokem ket daytay padam a mangay-ayat ken Jehova, kas panagtulnog iti Nainkasuratan a balakad a mangasawa laeng iti Apo? (1 Cor. 7:39) Ikagkagumaam kadi a padakkelen dagiti annakmo iti laksid ti kinarigat ti biag? Aniaman ti kasasaadmo, makapagtalekka a ni Jehova saanna a ‘lipaten ti aramidmo ken ti ayat nga impakitam maipaay iti naganna,’ no la ket ipangpangrunam dagiti interes ti  Pagarian. Kakabsat, pangngaasiyo ta dikay “sumuko nga agaramid iti nasayaat”!​—Heb. 6:10; Gal. 6:9.

Ania ti makatulong kadakayo nga agibtur? Kas kadagiti taga-Tesalonica, ‘mangnamnamakayo iti Apotayo a Jesu-Kristo.’ Maawatantayo ngarud no apay a ni Pablo inyarigna idi agangay ti “namnama ti pannakaisalakan” iti nalagda a kabal ti ulo a mangsalaknib iti Kristiano manipud kadagiti negatibo a pampanunot ken awan sardayna a panagduadua.​—1 Tes. 5:8.

Wen, babaen ti panagibturyo a siraragsak, masungbatanyo ti karit ni Satanas maipapan iti sapasap a kinasoberano. Sigun ken Satanas, naikasigudan ti kinamanagimbubukodan dagiti adipen ti Dios ken nupay sidadaanda nga agserbi iti Dios iti limitado a tiempo, bumaaw ti regtada nga agdaydayaw no umadu ti pakasuotanda wenno no nabaybayag ngem iti ninamnamada ti idadateng ti panungpalan ti sistema ti bambanag. Adda naisangsangayan a gundawaymo a mangipalgak iti kinadakes ken kinaulbod ti Diablo! Bayat ti panagtulid ti aldaw, umas-asideg ti kaitungpalan ti namnamam.

No kasano a ni Pablo inaprobetsarna dagiti gundaway a mangkomendar kadagiti kakabsat gapu iti nabileg a pammatida, iti adu a naaramidanda iti trabaho a panangasaba, ken iti panagibturda, maragsakankami met iti daytoy a gundaway a mangkomendar kadakayo ken mangidanon iti ayatmi kadakayo. Itultuloyyo ti naimbag nga aramidyo!

Sapay koma ta sibabaknang a bendisionan ti Dios ti umay a tawen. Kayatmi nga idanon kadakayo ti nabara a kablaawmi.

Dagiti kakabsatyo,

Bagi a Manarawidwid Dagiti Saksi ni Jehova