Patgenmi a Kakabsat:

Ti nailangitan nga Amatayo a ni Jehova ti kasayaatan nga ulidan iti ayat. Gapuna, kuna ti Biblia: “Ti Dios ket ayat.” (1 Juan 4:8) Nupay ni Jehova ti Mannakabalin-amin, saan a pulos nga ibaga ti Biblia, “Ti Dios ket pannakabalin.” Ayat ti kangrunaan a nakaibatayan ti panangiturayna. Pudno a dayta ti mangyasideg kadatayo kenkuana!

Makaparagsak ta saan a diktador ni Jehova. Dinatay pilpiliten nga agserbi kenkuana. Kayatna nga agserbitayo gapu iti ayat. No aramidentayo dayta, maipakitatayo a kayattayo ti panangiturayna gapu ta mamatitayo nga umiso ken naayat ti turayna. Nabatad dayta sipud pay nangrugi ti pakasaritaan ti tao.

Imbes a pilitenna da Adan ken Eva nga agtulnog kenkuana, inikkanna ida iti gundaway nga agpili. No talaga nga inayatda  ni Jehova ken impategda ti inaramidna para kadakuada, nalabananda koma ti panangsulisog kadakuada ni Satanas nga agrebelde.

Idi agangay, kinuna ni Moises iti pammakadana iti nasion ti Israel: “Kitaem, ita nga aldaw ikabilko iti sangom ti biag ken imbag, ken ti patay ken dakes.” (Deut. 30:15) Adda wayawaya dagiti tattao nga agpili iti kayatda a wagas ti panagbiag. Umasping iti dayta, kinuna ni Josue kadagiti Israelita: “No dakes kadagiti matayo ti panagserbi ken Jehova, agpilikayo ita nga aldaw maipaay iti bagbagiyo no siasino ti pagserbianyonto.” Kastoy ti sungbatda: “Narigat a pagarupen, iti biangmi, a panawanmi ni Jehova.” (Jos. 24:15, 16) Kasta met ti pangngeddengtayo ita. “Narigat a pagarupen” a panawantayo ni Jehova gapu ta ay-ayatentayo.

Iti uneg ti kongregasion Kristiano, ammotayo no ania ti ramanen ti wayawaya nga agpili. Nupay autorisado dagiti panglakayen a mangbalakad ken mangdisiplina pay ketdi, dida domdominaran wenno konkontrolen ti biag wenno pammati ti sabsabali. Insurat ni  apostol Pablo: “Saan a gapu ta dakami dagiti appo iti pammatiyo, no di ket katrabahuandakami a maipaay iti rag-oyo, ta babaen ti pammatiyo sitatakderkayo.”​—2 Cor. 1:24.

Anian a makapnek nga aramiden ti maysa a banag gapu ta kayattayo nga aramiden imbes a mapilpilittayo laeng! Parparegtaennatayo ni Jehova nga aramidentayo ti naimbag gapu iti ayat. Makita ti kinapateg dayta iti naipaltiing a sasao ni Pablo: “No itedko amin a sanikuak tapno mapakan ti sabsabali, ket no iyawatko ti bagik, tapno makapagpasindayagak, ngem awan ayatko, saanak a pulos magunggonaan.”​—1 Cor. 13:3.

Anian a rag-o ken pannakaidayaw ni Jehova ti pannakakita iti minilion a kakabsat nga agserserbi kenkuana gapu ta ay-ayatenda iti amin a pusoda!

Ipatpateg unay ni Jehova ti amin nga adipenna, a pakairamananyo nga ubbing ken tin-edyer a mangay-ayat kenkuana imbes a ti lubong ken dagiti ituktukonna a mangparagsak laeng iti bagi. Ipatpategdakayo met unay.​—Luc. 12:42, 43.

 Idi napan a tawen, gapu iti ayattayo ken Jehova, nakabusbostayo, agraman dagiti agtutubo, iti 1,748,697,447 nga oras a nangikasaba iti naimbag a damag. Ayat ti nangtignay iti 7,782,346 a nakiraman iti ministerio iti intero a lubong. Maragsakantayo ta adda 268,777 a kabbaro, nga adu kadakuada ket agtutubo, a nangisimbolo ti dedikasionda ken Jehova babaen ti bautismo. Kaipapananna a 5,168 ti nabautisaran iti kada lawas. Anian a makaparagsak daytoy iti pusotayo!

Iti daytoy tiempo ti panungpalan, masapul a daeran dagiti adipen ti Dios ti adu a problema, karit, pannakaidadanes, sakit, panaglakay ken panagbaket. Ngem determinadotayo a saan nga “agsanud” wenno “sumuko.” Ay-ayatendakayo unay.​—Heb. 10:39; 2 Cor. 4:16.

Dagiti kakabsatyo,