Idi Oktubre 2012, naluktan iti Brooklyn, New York, ti baro nga eksibit a mabalin a pasiaren uray awan ti tour guide. Maipapan dayta iti pakasaritaan dagiti Saksi ni Jehova. Itampokna dagiti rigat ken peggad a napasaran dagidiay mangan-annurot iti Kristianidad nga insuro ni Jesus.

Iti umuna pay laeng a lawas, nasurok nga 4,200 a bisita ken Bethelite ti nangpasiar iti eksibit. Karaman kadagiti immuna a nag-tour ket ni Naomi a maysa a Saksi nga agnanaed iti asideg. “Nakatulong ti naidispley a petsa dagiti pasamak tapno matarusak no kaano ken apay a napasamak dagiti bambanag,” kinunana. “Adu ti naammuak maipapan iti organisasiontayo ken iti moderno-aldaw a pakasaritaanna.”

Mangrugi ti petsa dagiti pasamak iti panawen dagiti Kristiano idi 33 C.E. agingga iti agdama. Nabingay ti eksibit iti  uppat a seksion. Tunggal seksion ket addaan iti Nainkasuratan a tema ken ababa a video nga introduksion a mangngeg iti English, ngem mabasa iti pito a lengguahe dagiti subtitle.

Ti tema ti umuna a seksion a “Men Have Loved the Darkness” (“Dagiti Tattao Inayatda ti Sipnget”) ket naadaw iti sasao ni Jesus iti Juan 3:19. Impadto ti Biblia a kalpasan ti ipapatay dagiti apostol, dagiti nadangkes ‘tumakder ken agsaodanto iti tiritir a bambanag.’ (Ara. 20:30) Nakaro ti dusa dagidiay saan a sumurot kadagita.

Iti kasumbangirna, ti sumaganad a seksion a “Let the Light Shine” (“Agsilnag Koma ti Silaw”) a naibatay iti 2 Corinto 4:6, ket mangrugi iti maudi a paset ti maika-19 a siglo idi a dagiti napasnek nga estudiante ti Biblia inadalda manen ti Kasuratan. Insardengda dagiti nabayagen a patpatienda nga awan iti Biblia ken situtured nga inkasabada ti nalawag  a kinapudno. Ipakita daytoy a seksion ti panagrang-ay ti pannakaammoda ken yaadu ti bilangda sakbay ti Gubat Sangalubongan I.

Naitampok met iti daytoy a seksion ti maysa a gapuanan a makapainteres kadagiti Saksi ni Jehova agingga ita. Idi 1914, inrugi dagiti Estudiante ti Biblia (awag idi kadagiti Saksi ni Jehova) nga ipabuya ti “Photo-Drama of Creation.” Minilion ti nakabuya iti daytoy a produksion, a kombinasion dagiti ladawan, motion picture, ken audio recording. Karaman iti eksibit ti sumagmamano nga orihinal a ladawan, sampol ti ababa nga introduksion ti programa, ken nasurok a 500 a dekolor nga slides.

Ti tema ti maikatlo a seksion a “The Dragon Grew Wrathful” (“Nakapungtot ti Dragon”) ket maipapan iti panangidadanes ni Satanas kadagiti pasurot ni Kristo a nadeskribir iti  Apocalipsis 12:17. Naitampok ditoy ti panagtalinaed a neutral dagiti Kristiano kadagiti tiempo ti gubat. Malaksid kadagiti displey a retrato ken kadaanan nga alikamen, adda ababa a video a pakabuyaan iti panangpilitda a tumulok kadagidiay agkedked gapu iti konsiensiada, kas ken Remigio Cuminetti a taga-Italy. Dina kayat ti agbado iti uniporme ti soldado wenno makilaban idi Gubat Sangalubongan I. Adda pay video maipapan ken Alois Moser a taga-Austria. Nagkedked a mangipukkaw iti “Heil Hitler” isu a naikkat iti trabahona sa naipan idi agangay iti kampo konsentrasion iti Dachau. Iti daytoy pay a seksion, adda naaramid a kasla pagbaludan a masirsirayan iti bassit a lawag. Naidispley ditoy ti ladawan dagiti Saksi ni Jehova iti Greece, Japan, Poland, dati a Yugoslavia, ken dadduma pay a lugar a mangipakita a naibaludda gapu iti pammatida.

Ti maudi a seksion a “Good News for All Nations” (“Naimbag a Damag Para iti Amin a Nasion”) ket naibatay iti Apocalipsis 14:6. Maipapan daytoy iti aktibidad dagiti Saksi ni Jehova kadagiti kallabes a dekada. Naipaskil kadagiti diding dagiti retrato a mangipakita iti alisto a panagrang-ay, napinget a panangasaba, ken nainkabsatan a panagiinnayatda. Iti ngudo ti eksibit, adda dagiti touch screen a kompiuter a pangkitaan dagiti bisita iti uneg ti Bible House ken Brooklyn Tabernacle, dagiti pasdek nga inusar dagiti Saksi ni Jehova nasurok a 100 a tawenen ti napalabas.

Masarakan ti eksibit iti 25 Columbia Heights, Brooklyn, New York. Nakalukat daytoy manipud Lunes agingga iti Biernes, 8:00 ti bigat agingga iti 5:00 ti malem, ken awan ti bayadam. No addaka iti New York City, apay a dimo gundawayan a pasiaren ti makapainteres nga eksibit?