MAYSA a malem, sinerrek dagiti rebelde ti ilimi, sa agarup dua nga oras a nagpaltopaltogda iti tangatang. Tin-edyer ti dadduma kadakuada a marigrigatan a mangawit kadagiti armasda. Nakadungdungrit ken nakabutbutengda, kusokuso dagiti buokda, ken kasla nakadrogada.

Kabigatanna, siraranggas a dinangran wenno pinapatayda dagiti tattao. Rinamesda dagiti babbai. Nariribuk unay ti kasasaad. Nagkamang iti balaymi da Brother Amara Babawo ken ti pamiliana agraman uppat nga interesado. Napalalo idi ti butengmi.

Di nagbayag, dimteng ti maysa a komander dagiti rebelde ket binilinnakami nga agreport iti sumaruno nga agsapa tapno agsanay a soldado. Determinadokami nga agtalinaed a neutral nupay mabalin a pakatayanmi ti panagkedkedmi. Dandani nagpatnag a nagkarkararagkami. Bimmangonkami a nasapa ket pinagsasaritaanmi ti teksto iti daydi nga aldaw sa inuraymi  dagiti rebelde, ngem saanda nga immay.

Idi agangay, maysa nga opisial dagiti rebelde ken uppat a soldadona ti nagkampo iti balaymi. Kunada a saankami a pumampanaw isu nga intultuloymi ti naggigimong ken nagteksto iti inaldaw. Kuna ti dadduma a soldado: “Saksikayo la ketdi ni Jehova ta basbasaenyo ti inaldaw a teksto.” Saanda nga interesado iti Biblia ngem rinaemdakami.

Maysa nga aldaw, ti nangatngato ti ranggona a komander immayna kinita ti grupo dagiti rebelde nga adda iti balaymi. Sinaluduan ken inalamanona ni Brother Babawo. “Isu ti boss-tayo. No adda buok a maparut iti ulona wenno iti ulo dagiti kakaduana, dakes ti mapasamak kadakayo. Naawatanyo?” imbugkaw ti komander kadagiti rebelde. “Wen, sir!” insungbatda. Kalpasanna, inikkannakami iti surat a mangibilbilin iti Revolutionary United Front a saandakami a dangdangran gapu ta mannakikappiakami nga umili.

Sumagmamano a bulan kalpasanna, naglalaban dagiti grupo ti rebelde isu a nagkamangkami iti asideg a Liberia. Sadiay a binutbutengdakami ti sabali pay a grupo dagiti rebelde. “Saksikami ni Jehova,” kinunami kadakuada. “Ania ngarud ti mabasa iti Juan 3:16?” insaludsod ti maysa a rebelde. Idi imbagami ti linaon ti teksto, pinalubosandakamin.

Idi agangay, naam-ammomi ti sabali pay a komander dagiti rebelde a nangibilin kadakami ken Brother Babawo a mangkuyog kenkuana. Nagbutengkami ngem imbagana a makipagad-adal idi kadagiti Saksi sakbay ti gubat. Inikkannakami iti kuarta ken intulodna ti suratmi kadagiti kakabsat iti kabangibang a kongregasion. Di nagbayag, dua a kakabsat ti immay nangted kadagiti relief goods sa impandakami iti natalged a lugar.