IDI agtawenak iti 16, pinilitdak dagiti rebelde a soldado a kumadua iti grupoda. Ik-ikkandak iti droga ken arak, ket masansan a makilabanak a nakadroga. Adu a panaglalaban ti nakiramanak ken nakaam-ames dagiti inar-aramidko. Dayta ti pagbabbabawyak unay.

Maysa nga aldaw, adda lakay a Saksi nga immay nangasaba iti kampomi. Inkagumaannakami a tulongan iti naespirituan idinto ta kaaduan a tattao ti mabutbuteng ken mangum-umsi kadakami a rebelde. Simmurotak idi inawisnak a makigimong. Diak matandaanan no ania ti napagsasaritaan iti gimong, ngem malaglagipko pay laeng ti nabara a panangabrasada kaniak.

Idi kimmaro ti gubat, awanen ti nakasarsaritak a Saksi. Idi agangay, nakaro ti pannakasugatko isu a naipanak iti lugar a kontrolado dagiti rebelde tapno agpaimbag. Sakbay a nagpatingga ti gubat, naglibasak a napan iti lugar a kontrolado ti gobierno ket nakiramanak iti programa a tumultulong kadagiti rebelde a mangisuko iti armasda, mapagawid iti pagtaenganda, ken agbalin manen a paset ti kagimongan.

Kasapulak unay ti naespirituan a tulong. Nakigimgimongak iti Pentecostal, ngem Satanas ti awag kaniak dagiti miembro dayta a relihion. Isu a binirokko dagiti Saksi ni Jehova. Apaman a nabirokak ida, rinugiak ti nakipagadal ken nakigimong. Idi impudnok dagiti dakes nga inar-aramidko, imbasada dagiti makaliwliwa a sasao ni Jesus: “Dagiti tattao a nasalun-at saanda a kasapulan ti mangngagas, no di ket dagiti masaksakit. . . . Immayak agayab, saan a kadagiti nalinteg a tattao, no di ket kadagiti managbasol.”—Mat. 9:12, 13.

Talaga a natukay ti pusok kadagita a sasao! Inyawatko ti imukok iti mangyad-adal kaniak iti Biblia sa kinunak: “Induldulinko  daytoy a pangsalaknib iti bagik kadagiti kalaban. Ngem ita ta naammuakon nga ipatpategnak ni Jehova ken ni Jesus, diakon kasapulan daytoy.”

Insurodak dagiti kakabsat nga agbasa ken agsurat. Idi agangay, nabautisaranak ken nagbalinak a regular pioneer. No kaskasabaak ita dagiti dati a rebelde, ibagada a raraemendak gapu ta dinalusakon ti panagbiagko. Inyadalak pay ti ayudante ti dati a nakaikamengak a grupo dagiti rebelde.

Idi soldadoak pay, nakaputotak iti tallo a lallaki. Idi naammuak ti kinapudno, kayatko met a tulongan ida iti naespirituan. Napalalo ti ragsakko ta dua kadakuada ti nangipangag! Auxiliary pioneer itan ti inauna ken di bautisado nga agibumbunannag ti inaudi.