Patgenmi a Pada a Katulong:

Maragsakankami nga agsurat kadakayo iti rugi daytoy nakapatpateg a tawen! Inton maud-udi a paset ti 2014, makompleton ti 100 a tawen sipud nangrugi nga agturay ti ipatpategtayo a ni Ari Jesu-Kristo iti tengnga dagiti kabusorna.—Sal. 110:1, 2.

Iti rugrugi daytoy a tawen serbisio, bayat ti tinawen a miting ti Watch Tower Bible and Tract Society of Pennsylvania, inruar ti New World Bible Translation Committee ti baro a rebisado nga edision iti English ti kasayaatan a patarus ti Biblia a magun-od dagiti tattao. Inusar ni Jehova dagiti napulotan iti espiritu nga annakna a mangipaay iti orihinal a New World Translation. (Roma 8:15, 16) Saan kadi a pammaneknek laeng dayta nga espesial daytoy a patarus?

Iti adu a tawen, impangpangruna ti Writing Committee ti Bagi a  Manarawidwid ti pannakaipatarus ti Biblia. Magun-odanen iti 121 a lengguahe ti intero a Baro a Lubong a Patarus wenno dadduma a pasetna. Paregtaendakayo a mangipakita ken Jehova nga ap-apresiarenyo unay ti Bibliayo. Basaen ken mennamennaenyo dayta iti inaldaw tapno ad-adda a sumingedkayo iti Autorna a ni Jehova a Dios.—Sant. 4:8.

Maladingitankami no madamagmi a maipaspasango dagiti ipatpategtayo a kakabsat kadagiti pakasuotan. Isu a maawatanmi a marigatanda no dadduma a makipagragsak kadagiti kakabsatda. Kas pagarigan, maysa a pamilia iti Asia ti nabiit pay a nagbalbaliw ti situasionda idi giddato a naparalisado ti ina ti pamilia. Nakalkaldaang ta saanen a kabaelan dagiti espesialista nga isubli ti dati a kasasaadna! Ita, 24-oras a kasapulanen nga aywanan ni lakayna. Mangipakpakita met iti nagsayaat nga ulidan kas Kristiano ti baroda ken ti dua a babbalasangda babaen ti naayat a panangsuporta kadagiti nagannakda. Daytoy a mapagulidanan a pamilia ken dakayo amin a nakapagballigi iti nadumaduma a pakasuotan iti pammati ket makarikna iti rag-o nga itden ti panangibtur kadagita. (Sant. 1:2-4) Ipatpatalged ni Jehova kadagiti napulotan ken iti sabsabali a karnero a naragsaktayo no itultuloytayo nga ibturan dagiti pakasuotan, gapu ta mabendisionantayto iti sagut nga agnanayon a biag!—Sant. 1:12.

Ti timmabuno iti Memorial idi napan a tawen ket 19,241,252. Makaparegta a makita a nakaad-adu dagiti mangidaydayaw ken Jehova ken ni Jesu-Kristo babaen ti itatabunoda iti kapatgan a taripnong ti tawen para iti ili ti Dios! Idi panawen ti Memorial, nagallungogan ti dakkel nga ikkis ti panangidaydayaw gapu ta minilion ti nag-auxiliary pioneer iti Marso ken Abril. Anian a makaparegta  dayta! Ken makaparagsak a maammuan a dagidiay ag-auxiliary pioneer bayat ti ibibisita ti manangaywan iti sirkito mabalindan a tabunuan ti intero a miting para kadagiti payunir, uray no saan nga iti bulan ti Marso wenno Abril ti ibibisitana. Dagidiay sipapanunot iti naespirituan ammoda a napateg ti panagbalin nga aktibo iti panangasaba ken kadagiti aktibidad ti kongregasion. No okupadotayo, makapagtalinaedtayo a natibker ket masarangettayo dagiti panangikagumaan ti Diablo a mangisiasi ken mangpakapuy iti pammatitayo.—1 Cor. 15:58.

Makapabileg a maammuan nga iti napalabas a tawen serbisio, 277,344 ti nangisimbolo iti dedikasionda babaen ti bautismo ken magmagnadan iti dalan ti biag a kadua dagiti kakabsatda iti intero a lubong! (Mat. 7:13, 14) Kasapulan dagitoy a kabbaro ti tulongtayo tapno ‘tumibker ti pammatida.’ (Col. 2:7) Itultuloyyo ti agpipinnaregta nga agibtur agingga iti panungpalan. (Mat. 24:13) “Agsaokayo iti makaliwliwa kadagiti malmaldaangan a kararua, saranayenyo dagiti nakapuy, maaddaankayo iti mabayag a panagitured [wenno, panaganus] iti isuamin.” (1 Tes. 5:14) Kamaudiananna, sapay koma ta di agressat nga ikararag ti tunggal maysa kadatayo: “Umay koma ti pagariam.”—1 Tes. 5:17; Mat. 6:10.

Pangngaasiyo ta basaenyo daytoy Tinawen a Libro, ken laglagipenyo nga ay-ayatenmi ti tunggal maysa kadakayo a mangipatpateg ken Jehova!

Dagiti kakabsatyo,

Bagi a Manarawidwid Dagiti Saksi ni Jehova