Idi Hulio 13, 1957, nagsurat ni Inspektor Colón iti secretary of state: “Adda idi nalatak a pagsasaoda a: ‘Puntaam ti ulo ti uleg.’ Mapasardengtayo dagiti Saksi ni Jehova iti pagilian no mapapanawtayo dagiti misioneroda tapno maawananda iti ulo, ket dinto agballigi dagiti planoda.”

Di nagbayag, imbilin ti Secretary of Security a ni Arturo Espaillat a mapapanaw iti pagilian dagiti sangapulo a nabatbati pay a misionero. Idi Hulio 21, 1957, nagsurat ni Roy Brandt ken Trujillo ket imbagana nga agkitada tapno ilawlawagna ti takdertayo. Kastoy ti paset ti surat: “Ti panangpadpadakes ti dadduma nga umili iti nagan ni Jehova a Dios ket kas iti inaramid dagiti tattao a nakaawat iti di umiso nga impormasion isu nga indadanesda dagiti apostol ni Jesus.” Imparegta ni Brother Brandt a basaen ni Trujillo ti Aramid kapitulo 2 agingga iti 6, ken inlawlawagna, “Ti nalawag ken prangka a balakad nga impaay ti Ukom a ni Gamaliel ket agpadpada a praktikal idi ken ita.” Iti dadakkel a letra, insurat ni Brother Brandt ti kababagas ti Aramid 5:38, 39: “DIKAY MAKIBIANG KADAGITOY A TATTAO, AGSIPUD TA NO DAYTOY NGA ARAMID KET AGGAPU ITI DIOS,  AMANGAN TA ITI KINAAGPAYSUANNA MASARAKANKAYO A MANNAKILABAN ITI DIOS.” Ngem saanna nga impangag dayta. Idi Agosto 3, 1957, naipan dagiti misionero iti eropuerto ket naideportada.

Ania ngata ti mapasamak kadagiti kakabsat ita ta awanen dagiti misionero? Agpayso ngata a ‘maawananda iti ulo’ kas iti kinuna ni Inspektor Colón? Saan, ta ni Jesus “ti ulo ti bagi, ti kongregasion.” (Col. 1:18) Gapuna, saan a ‘naawanan iti ulo’ ti ili ni Jehova iti Dominican Republic, no di ket nagtultuloy a tinulongan ida ni Jehova ken ti organisasionna.

Ni Donald Nowills ti natudingan a mangaywan iti trabaho ti sangay kalpasan a naideporta dagiti misionero. Agtawen laeng idi iti 20 ken uppat a tawen pay laeng a nabautisaran. Nupay nagserbi idin kas manangaywan iti  sirkito iti sumagmamano a bulan, kabbaro kenkuana ti trabaho iti sangay. Simple ken bassit ti opisina ni Brother Nowills iti balayna, a naaramid iti kayo ken galba, daga ti suelona, ken adda dayta iti Gualey, maysa a delikado a paset ti Ciudad Trujillo. Ni Félix Marte ti timmulong kenkuana a nangaramid kadagiti kopia ti Pagwanawanan para iti intero a pagilian.

Ni Mary Glass, nga asawa ni Enrique a nakabalud iti daydi a tiempo, ti tumultulong pay ken ni Brother Nowills. “Pumanawak iti pagtrabahuak iti alas singko ti malem,” kinunana, “sa mapanak iti opisina ni Brother Nowills tapno imakiniliak ti Pagwanawanan kadagiti stencil ti mimeograph. Kalpasanna, agaramid ni Brother Nowills iti adu a kopia dagita babaen ti mimeograph machine. Maysa a sister nga aw-awaganda iti ‘anghel’ a taga-Santiago ti mangikabil kadagiti nai-mimeograph a magasin iti awan nagyanna a dakkel a lata ti manteka.  Abbonganna iti lupot dagiti magasin sana parabawan kadagiti kamoteng kahoy, patatas, wenno aba. Abbonganna dayta iti sako. Kalpasanna, agsakay iti pangpasahero a lugan a mapan iti makin-amianan a paset ti pagilian ken mangibati iti saggaysa a kopia iti kada kongregasion. Agsisinnublat dagiti pamilia a mangbulod iti dayta tapno pagadalanda.”

“Masapul idi a nakaan-annadkami,” innayon pay ni Mary, “ta adda laeng kadagiti kalsada dagiti imbaon ti gobierno a mangtakuat iti pakayim-imprentaan ti Pagwanawanan. Ngem dida pulos nabirokan dayta. Kanayon a sinalaknibannakami ni Jehova.”