IDI Agosto 15-18, 1963, ginasut nga agibumbunannag manipud iti intero a pagilian ken 122 a kakabsat manipud kadagiti sabali a pagilian ti nagtataripnong iti siudad ti Bandung, West Java, para iti “Agnanayon a Naimbag a Damag” nga Asamblea. Dayta ti kaunaan nga internasional nga asamblea a naangay iti Indonesia.

Iti panagsagana para iti dayta nga okasion, adu a problema ti masapul a sanguen dagiti kakabsat. Namitlo a nabaliwan ti pakaangayan ti asamblea gapu iti selebrasion ti Independence Day ti pagilian. Gapu iti agtultuloy nga ingingina dagiti gagatangen, ingngato ti gobierno iti 400 a porsiento ti plete. Gapuna, maysa a brother ti nagnagna iti innem nga aldaw tapno laeng makapan iti pagasambleaan. Lima nga aldaw met a naglugan ti 70 a delegado manipud Sulawesi kadagiti bangka a napusek iti pasahero tapno laeng makaatenderda.

Iti kombension, maragragsakan dagiti kakabsat a taga-Indonesia a makaam-ammo kadagiti kakabsat manipud iti sabali a pagilian, a pakairamanan ti dua a miembro ti bagi a manarawidwid a da Frederick Franz ken Grant Suiter. Kuna ti maysa a delegado manipud iti sabali a pagilian: “Nakaragragsak dagiti kakabsat ditoy; agkakatawa ken nakaisemda a kanayon.”

Nasurok a 750 ti immatender iti asamblea, ken 34 ti nabautisaran. “Daytoy a nakapatpateg a taripnong ti nangtignay kadagiti interesado a mangawat iti kinapudno,” kinuna ni Ronald Jacka. “Ad-adda a rimmegta dagiti kakabsat a mangaramid iti trabaho nga intalek ti Dios.”