ITI rugrugi ti 1916, nasurok idin a makatawen a mapaspasamak ti Dakkel a Gubat a naawagan idi agangay iti Gubat Sangalubongan I. Nakaad-adu ti napapatay.

Kinuna ti Enero 1, 1916 a ruar ti The Watch Tower: “Ti maysa kadagiti resulta ti dakkel a gubat iti Europa ket nagbalin a relihioso ti adu a tattao ken madandanaganda iti masanguananda.” Innayon ti isu met laeng nga artikulo: “Agbalintayo koma a natured ken naregta iti panagserbitayo iti Dios ken iti panangipakaammotayo iti mensahena.”

Imparegta ti teksto iti tawen 1916 nga agtalinaed dagiti kakabsat a ‘nabileg iti pammati,’ kas nadakamat iti Roma 4:20 iti King James Version. Kasta ti inaramid ti adu kadagiti Estudiante ti Biblia, ket nakaad-adu ti inawatda a bendision manipud ken Jehova.

Pilgrim idi ti awag kadagiti agdaldaliasat a pannakabagi ti Watch Tower Society. Napanda kadagiti nagduduma nga ili tapno mangparegta ken mangipaay iti instruksion kadagiti Estudiante  ti Biblia. Idi 1916, dandani maysa a milion a kilometro ti nabiahe ti 69 wenno nasursurok pay a pilgrim.

Iti palawagna iti kombension idiay Norfolk, Virginia, pinagkompara ti maysa a pilgrim a ni Walter Thorn ti pannakilaban dagiti Kristiano ken ti Dakkel a Gubat. Kinunana: “Matantia nga adda 20 agingga iti 30 a milion a lallaki a makiramraman ita iti gubat. . . . Ngem adda pay sabali a grupo [dagiti soldado] a saan nga ammo ti lubong. Soldado ida ti Apo, ken kas iti buyot ni Gideon, makilablabanda met, ngem awan ti literal nga armasda. Makilablabanda para iti kinapudno ken kinalinteg ken makilablabanda iti nasayaat a dangadang iti pammati.”

Idi Hulio agingga iti Nobiembre 1916, nasurok a maysa a milion a lallaki idiay France ti nasugatan wenno napapatay iti Umuna a Panaglalaban iti Somme. Iti dadduma a paset ti France, sinuportaran latta dagiti nagagaget a kakabsat a lallaki dagiti klase, wenno kongregasion, uray no narigat gapu iti  gubat. Naipablaak iti Enero 15, 1916, a ruar ti The Watch Tower ti maysa a surat ni Joseph Lefèvre, maysa nga Estudiante ti Biblia a napilitan a nangpanaw iti lugarda a Denain, France, idi rinaut dagiti German a soldado idi 1914. Napan isuna idiay Paris, nga adda iti abagatan ti Denain, ken nakikadua iti kakaisuna a klase dagiti Estudiante ti Biblia iti dayta a siudad. Di nagbayag, isunan ti mangikonkondukta iti amin a gimong uray nakapuy ti salun-atna.

Idi agangay, nakikadua ken Joseph ni Théophile Lequime, a pimmanaw met laeng iti Denain. Sakbay dayta, napan ni Brother Lequime idiay Auchel, France. Nagipatarus sadiay kadagiti artikulo iti The Watch Tower sana impatulod kadagiti kakabsat nga adda kadagiti saan pay a nasakup a paset ti France. Pinapanaw isuna dagiti militar idiay Auchel gapu ta pinagsuspetsaanda ti ar-aramidenna. Para ken Brother Lefèvre, sungbat kadagiti kararagna ti isasangpet ni Brother Lequime iti Paris.

Nasayaat ti resulta ti trabahoda idiay Paris. Inreport ni Brother Lefèvre: “Addan 45 a miembro iti klasemi . . . Makitan ti dadduma ti pagsayaatan ti panagdedikar ken ibilangda daytan kas pribilehio. Napartak ti panagrang-ayda iti naespirituan. Nganngani awan lumangan iti linawas a testimony meeting (gimong a nadisenio tapno ibagada dagiti kapadasanda).”

Bayat ti gubat, naipasango ti adu a kakabsat a lallaki iti isyu ti neutralidad. Naipaulog idiay Great Britain ti Military Service Act ket inkapilitanen nga agsoldado ti amin a lallaki nga agtawen iti 18 agingga iti 40. Ngem nagtalinaed latta a neutral ti adu nga Estudiante ti Biblia.

Kas pagarigan, naipablaak iti Abril 15, 1916, a ruar ti The Watch Tower ti maysa a surat ni W. O. Warden a taga-Scotland. Kinunana: “Agtawenen iti 19 ti maysa kadagiti annakko a lallaki. Nakaipaayen iti nasayaat a panangsaksi iti Apo idi saanna a kinayat ti agsoldado. Ket no kas pagarigan man ta mapaltogan gapu ta saan latta nga agsoldado, agtalekak a tulongan  ni Apo Jehova tapno matakderanna dagiti prinsipio mainaig iti kinapudno ken kinalinteg.”

Nabista ni James Frederick Scott, maysa nga agtutubo a colporteur a taga-Edinburgh, Scotland, gapu ta saanna a kayat ti agsoldado. Ngem kalpasan a nangngegan ti korte ti amin nga ebidensia, naikeddeng nga isu ket “saan a karaman [kadagiti mapilit nga agsoldado] sigun iti linteg,” ket naabsuelto.

Nupay kasta, saan a napatgan ti kiddaw ti adu a kakabsat a maipuerada iti panagsoldado. Iti bulan ti Septiembre, addan 264 a kakabsat a nagkiddaw ket 23 ti naikkan iti trabaho a saan a kasapulan ti makigubat. Naipaaramid kadagiti nabatbati dagiti “trabaho a Napateg iti Pagilian, kas iti panagaramid iti kalsada, panagtebbag, ken dadduma pay.” Sumagmamano kadakuada ti datin a “nagpasar iti nagduduma a dusa,” kinuna ti report ti Oktubre 15, 1916, a ruar ti The Watch Tower. Lima laeng a kakabsat ti napatgan a maipuera nga agsoldado.

Idi Oktubre 16, 1916, ni Charles Taze Russell, a mangidadaulo idi kadagiti Estudiante ti Biblia, ket napan kadagiti lugar iti makinlaud a paset ti United States tapno mangipaay kadagiti lektiur, ngem saanen a nakaawid. Iti malem ti Martes, Oktubre 31, natay ni Brother Russell iti edad nga 64 bayat a nakalugan iti tren idiay Pampa, Texas.

Para iti adu a kakabsat, kasla awan ti makabael a mangsukat ken Brother Russell. Iti testamentona a naipablaak iti Disiembre 1, 1916, a ruar ti The Watch Tower, nailista dagiti kayatna a mapasamak iti trabaho a nabayag nga indauluanna. Ngem awan latta ti sungbat daytoy a saludsod: Asino ti mangsukat kenkuana?

Madesisionan dayta iti tinawen a miting ti Watch Tower Bible and Tract Society of Pennsylvania iti Enero 1917. Agpapada ti imbotos dagiti immatender. Ngem kadagiti simmaruno a bulbulan, saandan nga agkaykaysa. Naipasango dagiti kakabsat kadagiti arig-apuy a pannubok.