Idiay Georgia, adda lalaki nga immasideg iti cart ket imbugkawna: “Dikay palubosan a mangasaba ditoy! Orthodox Christian a pagilian ti Georgia.” Siaalumamay nga insaludsod ti brother nga adda iti abay ti cart no nakabasan ti lalaki iti publikasiontayo. Insungbat ti lalaki, “Saan pay.” Insingasing ti brother a padasenna ti mangbasa iti maysa. Gapu iti nataktika a pannakisarita ti  brother, limmamiis ti ulo ti lalaki ket nangala kadagiti publikasion. Kalpasan ti sumagmamano nga aldaw, nagsubli ti lalaki ken nagpadispensar. Imbagana nga imbasana ti magasintayo iti bulsek a nanangna. Nagustuanda unay dayta ket kayatda pay ti agbasa iti sabali. Regular itan a mapmapan ti lalaki iti cart tapno mangala iti kabaruan a magasin.

Bayat ti panangasaba ti dua a brother idiay Azerbaijan, inasitganda ti maysa a lalaki a nakatakder iti sango ti maysa a pasdek sa kinasabaanda. Imbaga ti lalaki, “Makabasolak no denggek ti ibagbagayo.” Idi kuan, innalana ti kutsilio iti makinlikud a bulsana sa imbagana: “Adda lalaki a dakes ti panangtratona kaniak. Mapanak agibales ket usarek daytoy a kutsilio.”

Nakigtot dagiti kakabsat, ngem imbagada, “Basol ti pumatay.”

Imbaga ti lalaki, “Ania ti aramidek?” Imbasada ti Roma 12:17-21 ket inlawlawagda a kukua ti Dios ti pammales ken masapul a ditay ‘ipalubos a parmekennatayo ti dakes, no di ket itultuloytayo a parmeken ti dakes babaen ti naimbag.’ Imbagada kenkuana ti maaramidan ti naalumamay a dila, ken imbagada a no adda masaktan wenno mapatayna, riribukento ti konsiensiana. Nagustuan ti lalaki ti nangngegna ket pimmanaw.

Kalpasan ti agarup maysa nga oras, nakita ti lalaki dagiti kakabsat ket imbagana: “Kagapgapuk iti lalaki a planok a patayen. Diak sinaktan, sinolbarmi ketdi ti  problemami. Pagyamanan ta linapdandak a mangirugi iti gulo.” Imbaga dagiti kakabsat a ni Jehova a talaga ti timmulong kenkuana.

Sumagmamano a tawenen ti napalabas idi immadayo iti kinapudno ti maysa a sister idiay Norway. Ngem idi nangrugi a mausar dagiti cart iti panangasaba iti publiko, masansan nga adda malablabsanna no mapan aggatang.

Uray no saan nga immas-asideg kadagiti Saksi iti cart, napaliiwna dagiti makaatrakar a poster ken displey dagiti publikasion. Nadlawna met a mannakigayyem ken nasayaat ti panaglanglanga dagiti Saksi. Dagita ti nakatignayanna nga agsubli ken Jehova ken iti ilina.

Nakitana met ti logo ti website-tayo a jw.org, isu a linuktanna ti website. Nagbilib idi nakitana a naglaka ti agbirok iti adres ti kaasitgan a Kingdom Hall ken iti eskediul dagiti gimong. Nag-download ti sister kadagiti publikasion ken napan iti Kingdom Hall a medio madandanagan. Nagsayaat ti panangawat dagiti kakabsat kenkuana, ken inyurnos dagiti panglakayen nga iyadalan isuna ti maysa a sister. Di nagbayag, naaddaan kadagiti nasayaat a gagayyem iti kongregasion ket naisublina manen dagiti naespirituan a rutinana. Regular itan a makiramraman iti gimong ken panangasaba, ket maragragsakan ta nadekket manen ti relasionna ken Jehova.

Iti maysa nga school bus idiay Norway, pagsasaritaan ti 15 anyos a ni Ronja ken ti tallo a kaklasena a lallaki ti maipapan iti ebolusion. Saan a resrespetuen dagiti kaklasena ti patpatienna isu a madi ti riknana. Panagriknana,  saan a nakasagana a makisarita maipapan iti dayta a topiko, isu a nagpatulong ken nanangna nga agbirok kadagiti makakombinsir nga argumento nga adda Namarsua.

Iti school bus iti simmaruno nga aldaw, inusar ni Ronja dagiti argumento nga insaganana. Ngem inuy-uyaw laeng dagiti kaklasena ti pammatina ken Jehova. Impukkaw ti maysa kadakuada: “Awan ti mamati ken Jehova iti daytoy a bus! Asino ti mamati iti ebolusion, ken asino ti mamati ken Jehova? Itayagyo ti imayo.” Nasorpresa ni Ronja idi adda ub-ubing a lalaki a nakatugaw iti asidegna a nangitayag iti imana ket imbagana, “Mamatiak ken Jehova!” Imbaga pay ti dua nga ubbing, “Uray siak!” Nangngeg ti dadduma nga estudiante ti pannakisarita ni Ronja kadagiti kaklasena, ket nakombinsir ti dadduma kadakuada iti argumentona!

Iti maysa a malem, napan iti sanga nga opisina ti Denmark ti dua a lallaki a taga-Syria nga agsasao iti Arabic. Imbagada kadagiti sister iti reception desk a birbirokenda dagiti Saksi ni Jehova. Idi imbaga dagiti sister a husto ti napananda, naragsakanda. Kasanoda a naammuan ti adres? Impakitada iti agtrabtrabaho iti pangpubliko a libraria ti maysa a picture iti selponda. Picture dayta ti maysa a panid ti libro nga Ania a Talaga ti Isursuro ti Biblia? iti Arabic a nakaisuratan ti nangipablaak iti libro. Gapu iti dayta, naited ti empleado ti adres ti sanga nga opisina.

Marigatan dagiti lallaki nga agsao iti Danish, isu a maysa a brother nga agsasao iti Arabic ti naayaban iti reception area. Nakita ti brother a talaga nga interesado ti maysa kadagiti lallaki a mangammo iti ad-adu pay maipapan iti Biblia. Innala ti brother ti adres ti lalaki sa inkarina a bisitaenna a dagus ken mangikadua iti maysa pay a brother nga agsasao iti Arabic.

Idi binisita dagiti kakabsat ti lalaki iti balayna, naammuanda nga awan pay a pulos ti bimmisita kenkuana a Saksi ni Jehova. Imbagana nga adda nangikabil iti libro nga Isursuro ti Biblia iti mailbox-na, uray no awan met ti naikabil a nagan iti mailbox a mangipakita nga agsasao isuna iti Arabic. Dina ammo ti agbasa isu nga impabasana ti libro iti gayyemna, ket nalpasda dayta iti tallo nga aldaw. Gapu iti nangngegna, nakombinsir a nabirokannan ti kinapudno.

Malidlidayan ti lalaki gapu ta maysa a refugee nga adayo iti pamiliana, ngem naliwliwa iti mensahe ti Biblia. Idi damo a binisita dagiti kakabsat, insaludsodna: “Apay nga  itakayo laeng a bimmisita? Kasapulak unay daytoy.” Agtultuloy ti pannakipagadalna iti Biblia kadagiti kakabsat ken maragragsakan unay iti maad-adalna.

Manedyer ni Dmitry iti maysa a kompania ti sigarilio idiay Ukraine, ngem idi mas naawatanna ti dakes nga epekto ti panagsigarilio iti salun-at, nagikkat iti trabahona uray dakkel ti sueldona. Idi kuan, iti uneg ti tallo a bulan, natay ni nanangna ken ti katuganganna a babai. Arigna nagtupak ti langit kenkuana. Ninamnamana a liwliwaen isuna ti simbaan ken masungbatanda dagiti saludsodna, ngem napaay. Imbaga kenkuana ti maysa a gayyemna a nupay nakakuentas iti krus ti maysa nga Orthodox Christian, awan ti ammona maipapan iti Dios. Kasta a kasta ti narikna ni Dmitry. Nabigbigna nga awan a pulos ammona maipapan iti Dios wenno iti Biblia. Gapu ta saannan nga ammo ti aramidenna, nagkararag ket nagpatulong iti Dios. Idi kuan, nalagipna a nangnangngegna idi ti maipapan kadagiti Saksi ni Jehova. Nabirokanna ti website-tayo iti Internet ket nagbilib iti kinaadu ti impormasion a linaonna maipapan iti Biblia. Kalpasanna, binirokna ti kaasitgan a Kingdom Hall. Idi addan iti pagparkingan, nainggayyeman a sinabat ti maysa nga attendant ken dinamagna no ania ti maitulongna. Imbaga ni Dmitry, “Kasapulak ti mayadalan iti Biblia.” Innem a bulanen a mayad-adalan ni Dmitry iti Biblia ken regular nga umat-atender ken makipaspaset kadagiti gimong.

Idiay Britain, nagmayat ti pannakisarita da Paul ken Faith iti bumalay a ni Susan ket imbagada a sarungkarandanto. Idi nagsublida, saanda a nadanon. Sinurot da Paul  ken Faith ti singasing Ti Ministeriotayo iti Pagarian a Nobiembre 2014 ket nangibatida iti surat a mangibagbaga nga agsublida iti sumaruno nga aldaw. Idi nagsublida, dida ekspektaren a nangibati ni Susan iti surat para kadakuada iti ridaw. Imbagana a napan naggatang para iti kasar ti balasangna. Nangibati manen da Paul ken Faith iti surat a mangibagbaga nga agsublida iti sumaruno a lawas. Idi nagsublida, nadanonda ni Susan nga agur-uray, ket nairugida nga iyadalan iti libro nga Isursuro ti Biblia.

Gapu ta dandanin agkasar ti balasang ni Susan, kiniddawna a saanda pay laeng agadal iti sumaruno nga eskediulda. Idi nagsubli da Paul ken Faith, awan ti sumungsungbat, isu a nangibatida iti surat a nakabilan iti numero ti selponda. Naragsakanda idi nagteks ni Susan nga agpadpadispensar ta dida nakasarita. Imbagana a kasarsaritana ngamin idi ti kaarrubana iti garden. Idi agangay,  regularen a makipagad-adal ni Susan iti Biblia, ket itay nabiit, nakigimong iti umuna a gundaway.

Maragragsakan da Paul ken Faith nga agibati iti surat kadagiti sarsarungkaranda. Imbaga ni Paul: “Adu pay a sarsarungkaranmi ti nangbasa kadagiti imbatimi a surat. Nakaep-epektibo dayta!”

Idi Agosto 2014, nayospital ti maysa a brother idiay Hungary gapu iti sakit iti bara. Makapaladingit ta di nagbayag, natay ti brother. Insurat ti asawana maipapan ken Tünde, ti nurse a timmultulong kadakuada:

“Idi 2015, immatenderkami iti anakko iti ‘Tuladenyo ni Jesus!’ a Rehional a Kombension. Kalpasan ti sesion iti maikatlo nga aldaw, idi addakami iti pagparkingan ket agsagsaganakamin nga agawid, adda babai a napan iti sangok, inibbatanna dagiti bagna, inarakupnak, sa nagsangit. Isu ti nurse a nangaywan ken lakayko iti intensive care unit dandani makatawenen ti napalabas. Imbagana a kada rugi ti trabaho, tunggal nurse ket maibaon a mangaywan iti maysa a pasiente. Kanayonna idi nga ikarkararag nga isu koma ti maibaon ken lakayko. Ket namin-adu a kasta ti napasamak!

“Imbaga ni Tünde nga isu ket natignay a makipagadal iti Biblia kadagiti Saksi ni Jehova gapu iti kanayon a panangibagbaga ni lakayko iti namnamana ken iti nasayaat a kababalinna gapu iti pammatina.

“Makipagad-adalen ni Tünde iti Biblia ket padpadaananna ti tiempo inton makitana manen ni lakayko. Kayatna nga ibaga ken lakayko a ti nasayaat a kababalinna ken ti nabileg a pammatina ti timmulong kenkuana  tapno maam-ammona ni Jehova ken dagiti agkakaimbag a karina.”

Gapu kadagiti protesta ken kadagiti barikada, maserserraan no dadduma dagiti checkpoint iti beddeng ti Greece ken Bulgaria isu a kinilkilometro ti pila dagiti agur-uray a lugan. Ginundawayan dayta ti maysa a kongregasion idiay Bulgaria nga asideg iti pagbeddengan ket nangipaimada kadagiti naibatay-Biblia a publikasion kadagiti adda iti lugan. Mangitugtugot dagiti kakabsat kadagiti publikasion iti 12 a lengguahe. Adu kadagiti drayber ti trak ti nabambannog ken masursuron, ngem kayatda ti makisarita. Dumdumngeg a naimbag dagiti kakabsat sada mangted kadagiti makaliwliwa ken makapabileg a mensahe. Insaludsod ti maysa a drayber, “Maysakayo a Saksi ni Jehova?” Idi nagwen dagiti kakabsat, imbagana: “Kunakto pay. Dagiti Saksi ni Jehova laeng ngamin ti mangaskasaba a kas iti ar-aramidenyo.” Inyangaw ti maysa a drayber ti trak a taga-Austria: “Congrats! Didakay mailemmengan uray ditoy! Pangngaasiyo, itultuloyyo a liwliwaen ken ipaayan iti namnama dagiti tattao.” Imbaga pay ti maysa a drayber: “Diak pulos kayat idi a basaen dagiti publikasionyo. Ngem maragsakanak itan a mangbasa kadagita.” Nakalua ti maysa a drayber idi kinasabaan ti maysa a brother. Imbagana nga adun a tawen a di aktibo. Imparegta kenkuana dagiti kakabsat a saanna laeng a basaen dagiti publikasion, mangbirok pay iti kongregasion a pakitimpuyoganna.