Kapitulo Dise Nuebe

Itultuloyyo a Situtured nga Ipakaammo ti Sao ti Dios

1. (a) Ania a naimbag a damag ti impakaammo dagiti adalan ni Jesus, ngem ania ti reaksion ti dadduma kadagiti Judio? (b) Aniada a saludsod ti mabalintayo nga utoben?

AGARUP 2,000 a tawen ti napalabas, napulotan ti Anak ti Dios, ni Jesu-Kristo, kas ti masanguanan nga Ari iti intero a daga. Napapatay ni Jesus gapu iti panangisungsong dagiti relihioso a kabusorna, ngem pinagungar ni Jehova. Babaen ken Jesus, posible itan ti biag nga agnanayon. Ngem naidadanes dagiti adalan ni Jesus idi impakaammoda iti publiko daytoy naimbag a damag. Dadduma kadakuada ti naibalud, a nasapsaplitda pay ken nabilin nga isardengda ti agsao maipapan ken Jesus. (Aramid 4:1-3, 17; 5:17, 18, 40) Ania ngay ti aramidenda? Ania koma ti inaramidyo? Itultuloyyo kadi ti mangasaba a situtured?

2. (a) Ania a nagsayaat a damag ti nasken a maipakaammo iti kaaldawantayo? (b) Siasino ti addaan iti responsabilidad a mangikasaba iti naimbag a damag?

² Idi 1914, naitrono idiay langit ti Ari ti Pagarian ti Dios, ni Jesu-Kristo, tapno agturay ‘iti tengnga dagiti kabusorna.’ (Salmo 110:2) Kalpasanna, naitapuak ditoy daga ni Satanas ken dagiti demoniona. (Apocalipsis 12:1-5, 7-12) Nangrugin ti maudi nga al-aldaw ti agdama a dakes a sistema. Inton agpatingga dayta a periodo, dadaelen ti Dios ti intero a sataniko a sistema ti bambanag. (Daniel 2:44; Mateo 24:21) Dagiti makalasat ti addaan iti namnama  a biag nga agnanayon ditoy daga a mapagbalin a paraiso. No inakseptaryo daytoy a naimbag a damag, nasken nga iranudyo iti sabsabali. (Mateo 24:14) Ngem ania a reaksion ti manamnamayo?

3. (a) Ania ti reaksion dagiti tattao iti mensahe ti Pagarian? (b) Ania a saludsod ti nasken nga amirisentayo?

³ No iwaragawagyo ti naimbag a damag ti Pagarian, dadduma ti mangipangag iti dayta, ngem iyaleng-aleng ti kaaduan. (Mateo 24:37-39) Mabalin nga umsien wenno busorendakayo ti dadduma. Impakdaar ni Jesus a mabalin a busorendakayo dagiti kabagianyo. (Lucas 21:16-19) Mabalin a busorendakayo met dagiti katrabahuan wenno kaeskuelaanyo. Iti dadduma a paset ti daga, dagiti gobierno paritanda pay ketdi dagiti Saksi ni Jehova. No maipasangokayo iti kasta a kasasaad, itultuloyyo kadi nga ipakaammo a situtured ti sao ti Dios ket “agtakderkayo a sititibker iti pammati”?​—1 Corinto 16:13.

Ditay Agpannuray iti Bukodtayo a Pigsa

4. (a) Tapno mapaneknekantay a matalektayo nga adipen ti Dios, ania ti maysa a makalikaguman? (b) Apay a napateg unay dagiti Nakristianuan a gimong?

⁴ Napateg kadagiti matalek nga adipen ni Jehova ti panagpannuray kadagiti probisionna. Maysa kadagitoy isu dagiti gimong ti kongregasion. Idagadag kadatayo ti Kasuratan a ditay liwayan dagita. (Hebreo 10:23-25) Nakapagtultuloy a matalek a Saksi ni Jehova ti dadduma gapu ta ikagkagumaanda ti regular a makigimong a kadua dagiti padada nga agdaydayaw. Kadagitoy a gimong, mapalawa ti pannakaammotayo iti Kasuratan. Maysa pay, umuneg ti pannakaawattayo kadagiti kinapudno a datin nga ammotayo, ken ad-adda a masursurotayo no kasano nga usaren dagita. Ad-adda a sumingedtayo kadagiti Kristiano  a kakabsat iti nagkaykaysa a panagdayaw ken mapabilegtayo nga agaramid iti pagayatan ti Dios. Iwanwannatayo ti espiritu ni Jehova babaen ti kongregasion, ket babaen dayta nga espiritu, adda ni Jesus iti nagtetengngaantayo.​—Mateo 18:20; Apocalipsis 3:6.

5. Kadagiti lugar a maparparitan dagiti Saksi ni Jehova, kasano ti pannakaangay dagiti gimong?

⁵ Regular kadi a tabtabunuanyo ti amin a gimong, ken iyap-aplikaryo kadi dagiti mangngegyo a mapagsasaritaan sadiay? No dadduma, kadagiti lugar a maparparitan dagiti Saksi ni Jehova, nasken a maangay dagiti gimong iti babassit a grupo kadagiti pribado a pagtaengan. Mabalin nga agbaliwbaliw dagiti lugar ken oras ket mabalin a saan a kanayon a kombiniente, a dadduma ti aggigimong no adalem ti rabii. Ngem nupay di kombiniente wenno napeggad, pagreggetan dagiti matalek a kakabsat ti tumabuno iti tunggal gimong.

6. Kasano a maipakitatayo nga agtalektayo ken Jehova, ket kasano a makatulong daytoy tapno makapagtultuloytayo nga agsao a situtured?

⁶ Mapatanor ti panagtalek ken Jehova babaen ti regular ken naimpusuan a panagkararag kenkuana, a bigbigen a kasapulantayo ti tulong ti Dios. Ar-aramidenyo kadi dayta? Maulit-ulit a nagkararag ni Jesus kabayatan ti ministeriona ditoy daga. (Lucas 3:21; 6:12, 13; 22:39-44) Ket iti rabii sakbay ti pannakailansana, indagadagna kadagiti adalanna: “Agtultuloykayo nga agbantay ken agkararag, tapno saankayo a dumteng iti pannakasulisog.” (Marcos 14:38) No iyaleng-alengda ti mensahe ti Pagarian, mabalin a masulisogtayo a guminad iti ministerio. No umsien wenno idadanesdatayo dagiti tattao, mabalin a masulisogtayo nga agsardeng a mangasaba tapno maliklikantayo dagiti parikut. Ngem no napasnek nga ikararagtayo ti  espiritu ti Dios tapno tumulong kadatayo a makapagsao a situtured, maliklikantayo ti matnag kadagita a sulisog.​—Lucas 11:13; Efeso 6:18-20.

Maysa a Rekord ti Natured a Panangasaba

7. (a) Apay a nangnangruna a paginteresantayo ti rekord ti Aramid? (b) Sungbatanyo dagiti saludsod iti ngudo daytoy a parapo, nga ipaganetgetyo no kasano a makagunggona kadatayo dagita nga impormasion.

⁷ Ti rekord a linaon ti libro nga Aramid ket nangnangruna a paginteresantayo amin. Salaysayenna no kasano a dagiti apostol ken dadduma a nagkauna nga adalan​—tattao nga addaan iti rikna a kas kadatayo​—dinaeranda dagiti tubeng ket pinaneknekanda a natured ken matalekda a saksi ni Jehova. Usigentayo ti dadduma a paset dayta a rekord iti tulong dagiti sumaganad a saludsod ken naisitar a teksto. Bayat nga aramidentayo dayta, panunotenyo no kasano a personal a magunggonaankayo iti basbasaenyo.

Nangato kadi ti adal dagiti apostol? Sigud kadin a naturedda, aniaman ti mapasamak? (Juan 18:17, 25-27; 20:19; Aramid 4:13)

Apay a nakapagsao a situtured ni Pedro iti saklang ti korte dagiti Judio a nangkondenar iti mismo nga Anak ti Dios? (Mateo 10:19, 20; Aramid 4:8)

Ania ti inaramid dagiti apostol kabayatan dagiti lawas sakbay a naisaklangda iti Sanhedrin? (Aramid 1:14; 2:1, 42)

Idi imbilin dagiti agtuturay nga isardeng dagiti apostol ti mangasaba iti nagan ni Jesus, ania ti insungbat da Pedro ken Juan? (Aramid 4:19, 20)

Kalpasan a naruk-atanda, asino ti nagpatulongan manen dagiti apostol? Inkararagda kadi nga agsardeng  koma ti pannakaidadanesda, wenno ania? (Aramid 4:24-31)

Babaen ti ania a pamay-an a nangipaay ni Jehova iti tulong idi pinadas dagiti bumusbusor a pasardengen ti trabaho a panangasaba? (Aramid 5:17-20)

Kasano nga impakita dagiti apostol a naawatanda ti rason no apay a nawayawayaanda? (Aramid 5:21, 41, 42)

Uray no naiwarawara ti adu nga adalan gapu iti pannakaidadanes, ania ti intultuloyda nga inaramid? (Aramid 8:3, 4; 11:19-21)

8. Ania dagiti makapagagar a resulta ti ministerio dagiti nagkauna nga adalan, ket kasano a nairamantayo iti dayta a ministerio?

⁸ Saan nga ubbaw ti pannakaikasaba ti naimbag a damag. Agarup 3,000 nga adalan ti nabautisaran idi Pentecostes 33 K.P. “Dagiti manamati iti Apo nagtultuloy a nainayonda, dagiti umariwekwek agpadpada dagiti lallaki ken dagiti babbai.” (Aramid 2:41; 4:4; 5:14) Idi agangay, uray ti maysa a nauyong a manangidadanes iti ili ti Dios, ni Saulo a taga Tarso, nagbalin a Kristiano ket situtured a rinugianna nga inkasaba ti kinapudno. Isu ti nagbalin nga apostol Pablo. (Galacia 1:22-24) Saan a nagsardeng ti trabaho a nairugi idi umuna a siglo. Ad-adda a dimmakkel dayta kadagitoy maudi nga al-aldaw ken dimmanon iti amin a paset ti daga. Addaantayo iti pribilehio a makiraman iti dayta a trabaho, ket bayat nga ar-aramidentayo dayta, makasursurotayo kadagiti ulidan dagiti nasungdo a saksi a nagserbi sakbay kadatayo.

9. (a) Kadagiti ania a gundaway a nangasaba ni Pablo? (b) Kadagiti ania a pamay-an nga ipakpakaammoyo ti mensahe ti Pagarian iti sabsabali?

⁹ Idi naammuan ni Pablo ti kinapudno maipapan ken Jesu-Kristo, ania ti inaramidna? ‘Dagus a rinugianna nga inkasaba ni Jesus, a Daytoy ti Anak ti Dios.’ (Aramid 9:20)  Inapresiarna ti di kaikarian a kinamanangngaasi ti Dios kenkuana, ket nabigbigna a kasapulan ti amin a tattao ti naimbag a damag a naammuanna. Judio ni Pablo, ket sigun iti kaugalian idi, napan kadagiti sinagoga tapno mangsaksi. Nangasaba met iti binalaybalay ken nakipatang kadagiti tattao iti tiendaan. Situtulok pay a napan kadagiti baro a teritoria tapno ikasabana ti naimbag a damag.​—Aramid 17:17; 20:20; Roma 15:23, 24.

10. (a) Kasano nga impakita ni Pablo a nupay natured, naannad met ti wagasna a nangasaba? (b) Kasano a matuladtayo dagiti wagas ni Pablo no mangasabatayo kadagiti kabagian, katrabahuan, wenno kaeskuelaantayo?

¹⁰ Natured ngem naannad ni Pablo, ket kastatayo met koma. Nakirinnason kadagiti Judio maibatay kadagiti inkari ti Dios kadagiti ammada. Nakisarita kadagiti Griego maibatay kadagiti bambanag a pamiliar kadakuada. Addada gundaway nga inusarna a nangasaba ti mismo a kapadasanna no kasano a naammuanna ti kinapudno. Kinunana: “Aramidek ti amin a bambanag maipagapu iti naimbag a damag, tapno agbalinak a manangiranud iti dayta iti sabsabali.”​—1 Corinto 9:20-23; Aramid 22:3-21.

11. (a) Ania ti inaramid ni Pablo tapno maliklikanna ti kanayon a makirikiar kadagiti bumusbusor? (b) Kaano a mabalintayo a nainsiriban a tuladen ti ulidan ni Pablo, ken kasano? (c) Paggapuan ti pannakabalin tapno makapagtultuloy nga agsao a situtured?

¹¹ No adda dagiti bumusbusor, mapan pay la mangasaba ni Pablo iti sabali a lugar imbes a kanayon a makirikiar kadakuada. (Aramid 14:5-7; 18:5-7; Roma 12:18) Ngem dina pulos imbain ti naimbag a damag. (Roma 1:16) Nupay makapainsulto​—naranggas pay ketdi​—ti panangtrato dagiti bumusbusor ken Pablo, ‘nagurnong iti kinatured babaen iti Diostayo’ tapno makapagtultuloy a mangasaba. Kinunana: “Ti Apo nagtakder iti sibayko ket nangipastrek kaniak iti pannakabalin, tapno babaen kaniak  naan-anay a maitungpal ti panangaskasaba.” (1 Tesalonica 2:2; 2 Timoteo 4:17) Ni Jesus, kas Ulo ti kongregasion Kristiano, agtultuloy nga ipapaayna ti pannakabalin a kasapulantayo tapno maibanagtayo ti trabaho nga impakaunana iti kaaldawantayo.​—Marcos 13:10.

12. Ania ti mangipakita a natured dagiti Kristiano, ket ania ti makagapu iti dayta?

¹² Adda ngarud rasontayo nga agtultuloy a mangipakaammo a situtured iti sao ti Dios, kas iti inaramid ni Jesus ken ti dadduma a matalek nga adipen ti Dios idi umuna a siglo. Di kayat a sawen daytoy nga agbalintayo nga awanan iti konsiderasion wenno ipilittayo ti mensahe kadagidiay di interesado iti dayta. Ngem ditay sumuko gapu laeng ta mangyaleng-aleng dagiti tattao, ket didatay met mapagulimek dagiti bumusbusor. Kas ken Jesus, isurotayo a ti Pagarian ti Dios ti nainkalintegan a mangituray iti intero a daga. Adda kompiansatayo nga agsao gapu ta datayo ti mangibagi ken Jehova, ti Sapasap a Soberano, ken naggapu kenkuana ti mensahe nga iwarwaragawagtayo, saan a kadatayo. Ti panagayattayo ken Jehova ti kangrunaan koma a makagapu nga idaydayawtayo ti Dios.​—Filipos 1:27, 28; 1 Tesalonica 2:13.

Panagrepaso

• Apay a napateg nga iranud ti mensahe ti Pagarian iti amin a tattao no mabalbalin, ngem ania ti namnamaentayo a reaksion?

• Kasano a maipakitatayo a ditay agpannuray iti bukodtayo a pigsa no maipapan iti panagserbi ken Jehova?

• Aniada a napateg a leksion ti maadaltayo iti libro nga Aramid?

[Salsaludsod]

 [Dagiti Ladawan iti panid 173]

Kas idi un-unana, situtured nga ipakaammo ita dagiti adipen ni Jehova ti sao ti Dios