Leksion 1

No Kasanoyo a Maammuan ti Kalikaguman ti Dios

Ania a napateg nga impormasion ti linaon ti Biblia? (1)

Siasino ti autor ti Biblia? (2)

Apay a rumbeng nga adalenyo ti Biblia? (3)

1. Napateg a sagut ti Dios ti Biblia. Mayarig dayta iti maysa a surat ti naayat nga ama kadagiti annakna. Ibagana kadatayo ti kinapudno maipapan iti Dios—no siasino ken no ania dagiti pagalagadanna. Ilawlawagna no kasano a sanguen dagiti parikut ken no kasano a masarakan ti pudno a kinaragsak. Ti laeng Biblia ti makaibaga kadatayo no ania ti masapul nga aramidentayo tapno maay-ayo ti Dios.—Salmo 1:1-3; Isaias 48:17, 18.

2. Agarup 40 a nadumaduma a lallaki ti nagsurat iti Biblia iti las-ud ti nasurok a 1,600 a tawen, nangrugi idi 1513 K.K.P. Innem a pulo ket innem a babassit a libro ti mangbukel iti dayta. Pinaltiingan ti Dios dagidiay nagsurat iti Biblia. Insuratda ti pampanunotna, saan a ti bukodda a pampanunot. Isu a ti Dios sadi langit, saan a ti asinoman a tao ditoy daga, ti Autor ti Biblia.—2 Timoteo 3:16, 17; 2 Pedro 1:20, 21.

3. Sinigurado ti Dios a siuumiso a nasakar ken naitalimeng ti Biblia. Ad-adu ti Biblia a naimaldit ngem iti aniaman a sabali a libro. Saan a maragsakan ti amin no makitadakayo nga agad-adal iti Biblia, ngem diyo ipalubos a pasardengennakay dayta. Agpannuray ti agnanayon a masakbayanyo iti panangammo iti Dios ken panangaramid iti pagayatanna iti laksid ti aniaman nga ibubusor.—Mateo 5:10-12; Juan 17:3.